Kart daa bzej Páblonaꞌ naꞌ bseḻeen lao Filemónnaꞌ
1
Nadꞌ Pablo, diaꞌ lillyani daa chyix̱jiꞌa xtillꞌ Cristo Jesúzaꞌ, chzejꞌ liꞌ Filemón. Naꞌ len beṉꞌ bishꞌcho Timotewi chwapntoꞌ liꞌ chiox, daa ḻe chakintoꞌ liꞌ, naꞌ daa nakcho txen choncho xshin Chiozaꞌ.
2 Naꞌ ḻekzkaꞌ chwapntoꞌ chiox beṉꞌ zancho Ápianaꞌ, naꞌ beṉꞌ bishꞌcho Arquíponaꞌ, beenaꞌ nakcho txen chdiḻ-lencho dii malaꞌ daa choncho xshin Chiozaꞌ, naꞌ beṉꞌkaꞌ chdop chllag lilloꞌnaꞌ choeꞌlaꞌole Crístonaꞌ.
3 X̱acho Chiozaꞌ naꞌ X̱ancho Jesucrístonaꞌ gaklenshgagakeꞌ leꞌ naꞌ wzoagakeꞌ leꞌ mbalaz.
4 Toshiizi katꞌ choeꞌḻwillꞌ Chiozaꞌ chjadinidꞌ liꞌ naꞌ choꞌaneꞌ yeḻꞌ chox̱ken ni c̱hoꞌ,
5 ḻaꞌ ba ṉezidꞌ ka nonḻilalloo X̱ancho Jesucrístonaꞌ naꞌ chakiloꞌ yogꞌ beṉꞌkaꞌ nak lallꞌ naꞌ Chiozaꞌ.
6 Chṉabidꞌ Chiozaꞌ gakleneꞌ liꞌ gonoꞌ ka dii le weꞌlenoꞌ beṉꞌ choꞌa xtilleenaꞌ daa ba wyajḻiꞌo kwenc̱he shajniꞌchiloꞌ kwasḻoḻ ka nak dii wenkaꞌ naki c̱hecho daa nakcho Crístonaꞌ txen.
7 Beṉꞌ bishꞌ, chiba chizakidꞌ daa chakiloꞌ bishꞌ ljwelloꞌkaꞌ, naꞌ dii xen chtipan lallaa, ḻaꞌ ṉezidꞌ chtipoꞌ lallꞌ beṉꞌkaꞌ nak lallꞌ naꞌ Chiozaꞌ.
8 Naꞌ daan, ḻaꞌkzi napꞌ yeḻꞌ wṉabiaꞌnaꞌ beṉ Crístonaꞌ, naꞌ wak gonꞌ byen iṉiaꞌ liꞌ daa chiyaḻꞌ gonoꞌ, sheḻꞌkaꞌ,
9 chakidꞌ wenlan gatꞌyoidꞌ liꞌ gonoꞌ daa cheenidꞌ daa chaki ljwellcho. Nadꞌ Pablo ba nakꞌ beṉꞌ gol naꞌ diaꞌ lillyani daa chyix̱jiꞌa xtillꞌ Cristo Jesúzaꞌ,
10 chṉabidꞌ liꞌ to goklen c̱he Onésimoni, beeni nak ka xiiṉꞌ daa beꞌlenee xtillꞌ Crístonaꞌ shlak diaꞌ lillyani.
11 Kanaꞌ wzoaleneꞌ liꞌ bi beneꞌ ka dii le goneꞌ xshinoꞌnaꞌ, san ṉaa wak gakleneꞌ liꞌ ka chakleneꞌ nadꞌ.
12 Naꞌ chiseḻaaneꞌ lawoꞌnaꞌ, ḻaꞌkzi ḻe chakyeshii lallꞌdawaani yizee daa chakchgaidee. Naꞌ liꞌ ṉaa, bilebsheꞌ, kon gakiloꞌ nadꞌkzanꞌ chileboꞌ.
13 Goklallaa wkwaaṉaꞌneꞌ gakleneꞌ nadꞌ lo xḻatjoꞌ shlak diaꞌ lillyani ni c̱he dillꞌ wen dillꞌ kob c̱he Crístonaꞌ.
14 Per bi goklallaa wkwaaṉaꞌneꞌ shi bi wc̱hebgaxjoꞌ, kwenc̱he yeḻꞌ goklen daa gonoꞌ c̱haꞌ bi gonyaadiazoꞌn, san gonoꞌn do yic̱hj do lalloo.
15 Shi bizee lilloꞌnaꞌ shloll kwenc̱he ṉaa gakeꞌ lallꞌ noꞌ toshiizi.
16 Naꞌ bich gakeꞌ to beṉꞌ ndoo lla yel choneꞌ xshin beṉꞌ san gakeꞌ beṉꞌ bishoo, beṉꞌ gakiloꞌ. Nadꞌ ḻe chakidee, naꞌ liꞌ chiyaḻꞌ gakchiloꞌneꞌ aga ka bishꞌ ljwellzoꞌ, san ka dowalj beṉꞌ bishoo daa nakle toz nonḻilallꞌle X̱ancho Jesucrístonaꞌ.
17 Naꞌ shi nakoꞌ nadꞌ txen lo xshin Crístonaꞌ, bilebsheꞌ, kon gakiloꞌ nadꞌkzan chleboꞌ.
18 Naꞌ shi bi beneꞌ c̱hoꞌ wa shi bi chbaguee c̱hoꞌ, naꞌ wc̱hixjoꞌn nadꞌ.
19 Kwin nadꞌ, Pablo chzejꞌ dga, naꞌ niaꞌ liꞌ: Nadꞌ c̱hixjaan. Naꞌ bi niaꞌ liꞌ ḻekzkaꞌ chbagoo c̱haꞌ daa ba napoꞌ yeḻꞌ mban zejḻi kaṉi.
20 Beṉꞌ bishꞌ, chṉabidꞌ liꞌ yeḻꞌ goklenni daa chakicho X̱ancho Jesucrístonaꞌ. Ben ka soaꞌ mbalaz daa nakcho toz nx̱enilallꞌcho Crístonaꞌ.
21 Chzejꞌ liꞌ daa ṉezidꞌ nakoꞌ beṉꞌ wizoa dillꞌ, naꞌ ṉezidꞌ ax̱t dii xenchlə gonoꞌ aga ka daa chṉabidꞌ liꞌ.
22 Naꞌ ḻekzkaꞌ niaꞌ liꞌ, benshaoꞌsha ganaꞌ soaꞌ, ḻaꞌ daa choeꞌḻwill-le Chiozaꞌ ni c̱haꞌ, nonꞌ lez yichejꞌ ni naꞌ wiꞌe latj yidwiaꞌ leꞌ.
23 Chwap Epáfrazi liꞌ chiox, beeni nakꞌ txen dentoꞌ lillyani ni c̱he xtillꞌ Cristo Jesúzaꞌ.
24 Naꞌ ḻekzkaꞌ Márconi, Aristárconi, Démazi, naꞌch Lúcazi, beṉꞌki chaklen nadꞌ lo xshin Chiozaꞌ, chwapgakeꞌ liꞌ chiox.
25 X̱ancho Jesucrístonaꞌ soalenshgueꞌ leꞌ naꞌ gakleneꞌ leꞌ.