Kart daa bseḻꞌ to beṉꞌ lao beṉꞌ hebreokaꞌ, beṉꞌkaꞌ nonḻilallꞌ Jesucrístonaꞌ
1
Kaniꞌyi zan shii Chiozaꞌ bc̱hineꞌ dii beṉꞌkaꞌ wdix̱jee daa golleꞌ ḻegakeꞌ naꞌ aga toz ka bc̱hineꞌ to toeꞌ kwenc̱he beꞌleneꞌ dii x̱ozxtoꞌchokaꞌ dillꞌ.
2 Naꞌ ṉaa ba zoa te c̱he yell-lioni, Chiozaꞌ bseḻee Xiiṉeꞌnaꞌ beꞌleneꞌ choꞌ choꞌa xtilleenaꞌ, naꞌ ḻenꞌ nzoeꞌ gak lallꞌ nee yogꞌte dii de, naꞌ ḻekzenꞌ beneꞌ yabanaꞌ len yell-lioni, diikaꞌ bllia Chiozaꞌ biaꞌ gak.
3 Ḻenꞌ chliꞌe ka beṉꞌ choo beṉꞌ xen inlleb nak Chiozaꞌ, naꞌ chliꞌe ka nakyeṉꞌ X̱eꞌ Chiozaꞌ. Naꞌ ḻenꞌ choneꞌ kwenc̱he yabanaꞌ len yell-lioni naꞌ yogꞌḻoḻ diikaꞌ lleꞌ llaꞌ lawinkaꞌ chongakan kon ka bllieꞌ biaꞌ gongakan daa napeꞌ yeḻꞌ wak kwenc̱he chak kon ka neꞌ. Naꞌ ḻenꞌ bix̱is biyibeꞌ yic̱hjlallꞌdoꞌchonaꞌ ka bikwaseꞌ saaxya c̱hechokaꞌ, naꞌ biyollaꞌ biyepeꞌ yabanaꞌ ganaꞌ chiꞌe shḻaa de shḻi c̱he X̱eꞌ Chiozaꞌ, beenaꞌ nak beṉꞌ choo beṉꞌ xen, naꞌ chṉabiaꞌleneꞌneꞌ.
4 Naꞌ daa beneꞌ dga, bliꞌe nakeꞌ beṉꞌ zakꞌchi aga ka anjlkaꞌ, naꞌ ḻekzkaꞌ daa goll Chiozaꞌneꞌ “Xiiṉꞌ”, nakbiaꞌ nakeꞌ beṉꞌ zakꞌchi aga ka ḻegakeꞌ.
5 Ḻaꞌ Chiozaꞌ biga golleꞌ ni to anjlkaꞌ ka dga golleꞌ Xiiṉeꞌnaꞌ:
Liꞌ nakoꞌ Xiiṉꞌ,
naꞌ ṉaa daa solo iṉabiꞌo iṉezi beṉꞌ nadaan nakꞌ X̱oꞌ.
Naꞌ ni to anjlkaꞌ bi golleꞌ:
Nadꞌ gakꞌ X̱oꞌ,
naꞌ liꞌ gakoꞌ Xiiṉꞌ.
6 Naꞌ ḻekzkaꞌ ka bseḻꞌ Chiozaꞌ Xiiṉeꞌnaꞌ, beenaꞌ nak tlishꞌ tyaj, lo yell-lioni, wneꞌ:
Weꞌlaꞌoshga yogꞌḻoḻ anjl c̱haꞌkaꞌ ḻeꞌ.
7 Naꞌ Choꞌa Xtillꞌ Chiozaꞌ choꞌen dillꞌ c̱he anjlkaꞌ, nan:
Choneꞌ anjl c̱heꞌkaꞌ beṉꞌkaꞌ chon xshineꞌnaꞌ,
ka beꞌ naꞌ ka beḻ yiꞌ.
8 San c̱he Xiiṉ Chiozaꞌ nan:
Liꞌ nakoꞌ Chios naꞌ iṉabiꞌo zejḻi kaṉi.
Naꞌ yeḻꞌ wṉabiaꞌ c̱hoꞌnaꞌ nakan dii zej shḻi.
9 Chibailoꞌ yeḻꞌ ḻi yeḻꞌ shawaa naꞌ chwiiloꞌ daa nak mal.
Daan Chiozaꞌ, beenaꞌ nak Chios c̱hoꞌ, ba bzoeꞌ liꞌ kwenc̱he iṉabiꞌo,
naꞌ ba beneꞌ ka soachoꞌ mbalaztech aga ka beṉꞌkaꞌ nakoꞌ txen.
10 Naꞌ ḻekzkaꞌ nan:
Linꞌ nakoꞌ Chios, naꞌ linꞌ bx̱e bsiloꞌ yell-lioni ka wzolon,
naꞌ liꞌkzan bx̱e bsiloꞌ yabanaꞌ.
11 Yogꞌ diikaꞌ te c̱hegakin, san liꞌ zoakzoꞌ zejḻi kaṉi.
Naꞌ yogꞌ diikaꞌ yiyigakan ka chiyi to xalaan beṉꞌ.
12 Naꞌ yikwasgakoꞌn,
naꞌ yikobgakoꞌn ka to beṉꞌ chikob xalaaneꞌ.
San liꞌ, toz ka zoꞌ zejḻi kaṉi;
biga llia te c̱hoꞌ.
13 Ni shlin biṉꞌ yeꞌ Chiozaꞌ ni to anjl c̱heꞌkaꞌ:
Wcheꞌ kwitꞌ de shḻi ni, shlak wzoaꞌ xṉiꞌonaꞌ beṉꞌkaꞌ chakzbani liꞌ.
14 San yogꞌ anjlkaꞌ nakgakeꞌ wen llin c̱he Chiozaꞌ, naꞌ chseḻee ḻegakeꞌ chaklengakeꞌ choꞌ nakcho beṉꞌ yisleꞌ kwenc̱he bi kwiayiꞌcho.