2
Daan, chonan byen wzenagchcho do yic̱hj do lallꞌcho dillꞌ wen dillꞌ kobaꞌ daa ba benicho kwenc̱he bi ḻaacho lo xṉezeꞌnaꞌ.
2 Ḻaꞌ diikaꞌ bllia Chiozaꞌ biaꞌ goncho, diikaꞌ wdix̱jee anjlkaꞌ, gokgakan to dii zakii, naꞌ yogꞌ beṉꞌkaꞌ wdishjgakeꞌ choꞌa xtilleenaꞌ naꞌ bi bzenaggakeꞌn wxakꞌziꞌgakeꞌ kon ka chiyaḻꞌ gak c̱hegakeꞌ.
3 ¿Alechlə ṉaa aga wilacho lao yeḻꞌ zakꞌziꞌnaꞌ shi gonicho nakzi daa nak to dii zakii nlleb daa ba ben Chiozaꞌ c̱hecho kwenc̱he yisleꞌ choꞌ naꞌ bi kwiayiꞌcho? Zigaate X̱ancho Jesúzaꞌ wdix̱jiꞌe daa yisleꞌ choꞌ, naꞌtech beṉꞌkaꞌ bzenag c̱heꞌ bizc̱hopgakeꞌ dillaa biꞌe.
4 Naꞌ ḻekzkaꞌ Chiozaꞌ bliꞌe nan nakan dii ḻi daa beneꞌ ka ben beṉꞌkaꞌ dii zan yeḻꞌ wak naꞌ dii chon ka chibanicho, naꞌ bseḻee Espíritu Santo c̱heꞌnaꞌ beṉeꞌ wde wdeli dii gak gon to tocho kon ka chaklallꞌ Chiozaꞌ.
5 Aga bllia Chiozaꞌ biaꞌ iṉabiaꞌ anjlkaꞌ lo yell-lio kobaꞌ daa ba ngwee xṉezin goneꞌ, dga choꞌa dillꞌ c̱heyin ṉaa.
6 San nakan ka wna to beṉꞌ bzej Choꞌa Xtillꞌ Chiozaꞌ kaniꞌyi daa na:
¿Nora nakntoꞌ, netoꞌ beṉꞌ yell-lio, chiꞌ yic̱hjzoꞌ netoꞌ,
naꞌ zezoꞌ wṉeyi c̱he netoꞌ nakntoꞌ xiiṉ beṉec̱h?
7 Zi latꞌzə ki benoꞌ netoꞌ ka anjl c̱hoꞌkaꞌ,
naꞌ noṉoꞌ netoꞌ to balaaṉ xen wal.
Naꞌ bzoꞌ netoꞌ iṉabiaꞌntoꞌ lao yogꞌte diikaꞌ benoꞌ.
8 Naꞌ benoꞌ yogꞌḻoḻten lallꞌ naꞌntoꞌ.
Naꞌ daa beneꞌ lallꞌ naꞌ beṉꞌ yell-lioni yogꞌḻoḻ dii de, zejin aga bi de dii bi gak lallꞌ naꞌcho, ḻaꞌkzi ṉaa biṉꞌ ileꞌicho gak yogꞌḻoḻ dii de lallꞌ naꞌcho.
9 Per ṉezicho Jesúzaꞌ ba yoꞌe to balaaṉ xen wal, ḻaꞌkzi bi bllin sakee ka anjlkaꞌ shlak wdeꞌ lo yell-lioni gokeꞌ beṉec̱h kwenc̱he wxakꞌziꞌe naꞌ witeꞌ ni c̱hecho. Ḻaꞌ daa nak Chiozaꞌ beṉꞌ wenan, bzanileꞌneꞌ bleꞌileꞌ yeḻꞌ witaꞌ lo laz yogꞌḻoḻ beṉꞌ.
10 Dii ḻi, Chiozaꞌ, beenaꞌ bx̱e bsil yogꞌḻoḻte dii de naꞌ nakgakan c̱heꞌ, cheenileꞌ beṉꞌ be beṉꞌ zil gakgakeꞌ xiiṉeꞌ kwenc̱he yic̱hiꞌe ḻegakeꞌ ganaꞌ de balaaṉ xen c̱heꞌnaꞌ. Daan, benan byen bzanileꞌ Jesúzaꞌ wxakꞌziꞌe naꞌ witeꞌ kwenc̱he bisleꞌ choꞌ. Naꞌ kaꞌ, biyoll bido beneꞌ yogꞌḻoḻ daa nllia Chiozaꞌ biaꞌ goneꞌ.
11 Jesúzaꞌ, beenaꞌ ba bix̱is biyibeꞌ choꞌ, naꞌ choꞌ ba bixi biyechcho, toz X̱achon nak. Daan, bi chiyiyi Jesucrístonaꞌ iṉeꞌ nakcho bishꞌ ljwelleꞌ.
12 Naꞌ chiꞌe Chiozaꞌ:
Wiꞌa dillꞌ c̱hoꞌ lao bishꞌ ljwellꞌkaꞌ,
naꞌ goḻ iṉiaꞌ liꞌ ladj beṉꞌkaꞌ chdop chllag choeꞌlaꞌogakeꞌ liꞌ.
13 Naꞌ wizneꞌ:
Nadꞌ wx̱enilallaa Chiozaꞌ.
Naꞌ sto shii chiꞌe:
Ni zoalenꞌ beṉꞌki nak xiiṉ Chiozaꞌ, beṉꞌki beneꞌ lallꞌ naꞌ.
14 Naꞌ daa nak xiiṉeꞌkaꞌ beṉꞌ de beli chen, ḻekzkaꞌ Jesúzaꞌ goljeꞌ gokeꞌ beṉꞌ de beli chen kwenc̱he witeꞌ ni c̱hecho. Naꞌ ka witeꞌ, bsol bṉiteꞌ yeḻꞌ wṉabiaꞌ c̱he dii x̱iwaa daa gok lallꞌ naꞌyin wlliayiꞌn beṉꞌ.
15 Naꞌ bisleꞌ choꞌ beṉꞌ yell-lio, choꞌ nakcho ka beṉꞌ ndoo lao yeḻꞌ witaꞌ shlak mbancho daa chllebcho guetcho.
16 Ḻaꞌ dii ḻi, aga bid Jesúzaꞌ kwenc̱he gakleneꞌ anjlkanꞌ, san kwenc̱he gakleneꞌ xiiṉ dia c̱he dii Abrahamanꞌ.
17 Daan, benan byen gokeꞌ beṉꞌ de beli chen doxen ka nakcho, choꞌ bishꞌ ljwelleꞌ, kwenc̱he yiyeshꞌlallileꞌ choꞌ naꞌ soeꞌ goneꞌ ka ben Chiozaꞌ lo nee goneꞌ daa nakeꞌ bx̱oz choo bx̱oz xen c̱hecho. Naꞌ bzani kwineꞌ witeꞌ kwenc̱he biziꞌxen Chiozaꞌ saaxya c̱hechokaꞌ.
18 Naꞌ daa bizo bizakileꞌ btiḻeꞌ daa nan kooyeḻaan ḻeꞌ bi goneꞌ ka cheeni Chiozaꞌ, wak gakleneꞌ choꞌ katꞌ zaꞌ daa cheenin kooyeḻaan choꞌ goncho daa bi chazlallꞌ Chiozaꞌ.