3
Naꞌ ṉaa, leꞌ beṉꞌ bishꞌ naꞌ leꞌ beṉꞌ zanꞌ, leꞌ ba nxi nyech yic̱hjlallꞌdoꞌlenaꞌ naꞌ ba gox wṉab Chiozaꞌ leꞌ kwenc̱he nakle lallꞌ nee, ḻi se wṉeyi ka nak daa ben Cristo Jesúzaꞌ, beenaꞌ choeꞌcho dillꞌ nonḻilallꞌchoneꞌ. Nakeꞌ beenaꞌ bseḻꞌ Chiozaꞌ naꞌ naktieꞌ bx̱oz choo bx̱oz xen c̱hecho.
2 Ḻenꞌ beneꞌ yogꞌḻoḻ daa goll Chiozaꞌneꞌ, kon ka ben dii Moisézaꞌ ladj beṉꞌkaꞌ nak yell c̱he Chiozaꞌ.
3 Naꞌ chidoḻꞌch Jesúzaꞌ balaaṉ xench aga ka dii Moisézaꞌ, ka chak c̱he to beṉꞌ choneꞌ to yoo choocheꞌ balaaṉ xench aga ka yoonaꞌ daa beneꞌ.
4 Yogꞌz yoo zoa beṉꞌ beneꞌn, per Chiozaꞌ nakeꞌ beenaꞌ ben yogꞌḻoḻte dii de.
5 Dii Moisézaꞌ, beenaꞌ gok wen llin c̱he Chiozaꞌ, beneꞌ yogꞌḻoḻ diikaꞌ golleꞌ goneꞌ ladj beṉꞌkaꞌ nak yell c̱he Chiozaꞌ. Naꞌ diikaꞌ beneꞌ chaklenan kwenc̱he shajniicho diikaꞌ ziꞌ weꞌ Chiozaꞌ dillꞌ c̱heyin.
6 Per Crístonaꞌ, beenaꞌ nak Xiiṉ Chiozaꞌ, ḻekzkaꞌ beneꞌ yogꞌḻoḻ diikaꞌ golleꞌneꞌ, naꞌ ngoo lallꞌ nee beṉꞌkaꞌ nak lallꞌ naꞌ Chiozaꞌ. Naꞌ chonꞌ, nakcho lallꞌ naꞌ Chiozaꞌ shi soac̱hec̱hcho gonḻilallꞌchoneꞌ naꞌ yibaicho daa noncho lez lljazoalenchoneꞌ.
7 Daan, Espíritu Sántonaꞌ wneꞌ:
Shi chenile daa na Chiozaꞌ ṉaanlla,
8 bi gakle beṉꞌ lallꞌdoꞌ wal ka gok dii x̱ozxtoꞌlekaꞌ
naꞌ bshaagakeꞌ Chiozaꞌ daa bi wyajḻeꞌgakeꞌ goneꞌ ka bc̱hebeꞌ
kanaꞌ wdagakeꞌ ganaꞌ bibi chashj chḻeb.
9 Naꞌ wna Chiozaꞌ: Kanaꞌ dii x̱ozxtoꞌlekaꞌ gokgakeꞌ beṉꞌ widenag daa bi wyajḻegakeꞌ gonꞌ daa bc̱hebꞌ gonꞌ c̱hegakeꞌ,
ḻaꞌkzi c̱hoa yiz bleꞌgakileꞌ diikaꞌ benꞌ c̱hegakeꞌ.
10 Daan, bllaa ḻegakeꞌ,
naꞌ wniaꞌ: “Toshiizi chongakeꞌ kon ka nazan c̱hegakeꞌ,
naꞌ bi chzenaggakeꞌ c̱haꞌ.”
11 Daan, lo yeḻꞌ chllaa c̱haꞌnaꞌ bc̱hebꞌ, wniaꞌ:
Ṉezganz wiꞌa latj gaki c̱hegakeꞌ yeḻꞌ wixiꞌlallꞌ c̱haꞌnaꞌ.
12 Leꞌ beṉꞌ bishꞌ naꞌ leꞌ beṉꞌ zanꞌ, ḻi wsakꞌ kwenc̱he ni tole bi x̱iṉjz yic̱hjlallꞌdoꞌlenaꞌ naꞌ gonan ka bich shajḻeꞌle naꞌ yiḻaalaꞌole Chios yaa Chios bannaꞌ.
13 San ḻi wtip lallꞌ ljwell-le yogꞌ lla shlak ṉaa ni de latj wzenagle c̱he Chiozaꞌ, kwenc̱he bi siyeꞌ dii malaꞌ leꞌ naꞌ yiyonan leꞌ lallꞌdoꞌ wal.
14 Nakkzcho Crístonaꞌ txen shi shnon mbancho soac̱hec̱hcho wx̱enilallꞌchoneꞌ kon ka wzoacho kanaꞌ ziꞌ bx̱enilallꞌchoneꞌ.
15 Kon ka na Choꞌa Xtillꞌ Chiozaꞌ:
Shi chenile daa na Chiozaꞌ ṉaanlla,
bi gakle lallꞌdoꞌ wal ka gok dii x̱ozxtoꞌlekaꞌ kanaꞌ wdagakeꞌ ganaꞌ bibi chashj chḻeb, kanaꞌ biyec̱hj bibiitezgakeꞌ Chiozaꞌ.
16 ¿Nora beṉꞌkaꞌ beni daa goll Chiozaꞌ naꞌ biyec̱hj bibiitezgakeꞌneꞌ, lla? Yogꞌ beṉꞌkaꞌ bibej dii Moisézaꞌ Egíptonanꞌ ben kaꞌ.
17 Naꞌ ¿nora beṉꞌkaꞌ bllaa Chiozaꞌ c̱hoa yiz, lla? Beṉꞌkaꞌ bx̱iṉj bḻenan, beṉꞌkaꞌ wit ganaꞌ bibi chashj chḻeb.
18 Naꞌ ¿nora beṉꞌkaꞌ wna Chiozaꞌ c̱hegakeꞌ bat lljaziꞌlallꞌgakeꞌ lo yell-lionaꞌ bc̱hebeꞌ wiꞌe ḻegakeꞌ, lla? Ḻegakenꞌ beṉꞌkaꞌ gok beṉꞌ widenag laweꞌnaꞌ.
19 Naꞌ ṉezicho bi gok yillingakeꞌ ganaꞌ yiziꞌlallꞌgakeꞌ daa bi wyajḻeꞌgakeꞌ c̱heꞌ.