4
Daan, shlak ni de latj idoḻicho yeḻꞌ wixiꞌlallaa daa ba bc̱heb Chiozaꞌ goṉeꞌ choꞌ, chiyaḻꞌ goncho byen kwenc̱he idoḻꞌ illonichon naꞌ ni tocho bi igaaṉzcho kaꞌz.
2 Ḻaꞌ choꞌ ba benicho dillꞌ wen dillꞌ kob c̱he Chiozaꞌ, ka daa beni dii x̱ozxtoꞌchokaꞌ. Per ḻaꞌkzi bengakileꞌn, bi goklenan ḻegakeꞌ daa bi wyajḻeꞌgakeꞌ c̱heyin.
3 San choꞌ ba wyajḻeꞌcho c̱heyin ba nakten goṉ Chiozaꞌ choꞌ yeḻꞌ wixiꞌlallaa daa bllonileꞌ beṉꞌkaꞌ kanaꞌ wneꞌ:
Daa bllaa ḻegakeꞌ naꞌ wniaꞌ:
ṉezganz wiꞌa latj gaki c̱hegakeꞌ yeḻꞌ wixiꞌlallꞌ c̱haꞌnaꞌ.
Per ka nak Chiozaꞌ, wzoloeꞌ chiziꞌlallee ka biyoll bx̱e bsileꞌ yell-lioni.
4 Ḻaꞌ Choꞌa Xtilleenaꞌ choꞌen dillꞌ c̱he lla gall llanaꞌ, ganaꞌ nan:
Ka bllin lla gall llayinaꞌ, ba biyoll ben Chiozaꞌ yogꞌḻoḻ daa beneꞌ, naꞌ biziꞌlallee.
5 Naꞌ ḻekzkaꞌ choꞌen dillꞌ kanaꞌ wneꞌ:
Ṉezganz wiꞌa latj gaki c̱hegakeꞌ yeḻꞌ wixiꞌlallꞌ c̱haꞌnaꞌ.
6 Per ni de latj gatꞌ to yeḻꞌ wixiꞌlallꞌ c̱he zi baḻ beṉꞌ cheeni, ḻaꞌ beṉꞌkaꞌ bengakileꞌ dii nech dillꞌ wen c̱he Chiozaꞌ bi gok yillingakeꞌ ganaꞌ yiziꞌlallꞌgakeꞌ daa bi bzenaggakeꞌ c̱heꞌ.
7 Daan, bllia Chiozaꞌ biaꞌ c̱he sto lla, naꞌ wde zan yiz wṉieꞌ dii Davinaꞌ kwenc̱he wiꞌe dillꞌ c̱he llani ṉaa, naꞌ wneꞌ:
Shi chenile daa na Chiozaꞌ ṉaanlla,
bi gakle lallꞌdoꞌ wal.
8 Sheḻꞌ dii Josuénaꞌ beneꞌ ka yiziꞌlallꞌ dii x̱ozxtoꞌchokaꞌ ka bc̱heb Chiozaꞌ goneꞌ c̱hegakeꞌ, aga bllia Chiozaꞌ biaꞌ sto lla yoblə gatꞌ yeḻꞌ wixiꞌlallꞌ, sheḻꞌkaꞌ.
9 Daan, ṉezicho ni de latj idoḻꞌ beṉꞌkaꞌ nak lallꞌ naꞌ Chiozaꞌ yeḻꞌ wixiꞌlallꞌ c̱heꞌnaꞌ.
10 Ḻaꞌ beenaꞌ ba bdoḻi yeḻꞌ wixiꞌlallaa daa bc̱heb Chiozaꞌ, ba chiziꞌlallee ka biziꞌlallꞌ Chiozaꞌ kanaꞌ biyoll bx̱e bsileꞌ yogꞌḻoḻ dii de.
11 Naꞌ choꞌ chiyaḻꞌ goncho byen idoḻicho yeḻꞌ wixiꞌlallaa daa bc̱heb Chiozaꞌ kwenc̱he ni tocho bi gakcho beṉꞌ widenag ka gok beṉꞌkaꞌ kaniꞌyi.
12 Naꞌ choꞌa xtillꞌ Chiozaꞌ nsaꞌn yeḻꞌ mban naꞌ yeḻꞌ wak, naꞌ nakan ka to dii chc̱hogch aga ka to spad dii nḻatit c̱hop ḻaa. Ḻaꞌ chazan ga zeelo ḻoo yic̱hjlallꞌdoꞌchonaꞌ. Naꞌ chliꞌn lao daa chzaꞌlallꞌcho ḻoo yic̱hjlallꞌdoꞌchonaꞌ shi nakan wen wa shi nakan mal.
13 Ni to diikaꞌ bx̱e bsil Chiozaꞌ bi ngashaan laweꞌnaꞌ. Yogꞌḻoḻte ṉez nḻeꞌi beenaꞌ yiziꞌe choꞌ kwent.
14 Jesús, Xiiṉ Chiozaꞌ, beenaꞌ billin yabanaꞌ, nakeꞌ bx̱oz choo bx̱oz xen c̱hecho, naꞌ daan chiyaḻꞌ soac̱hec̱hcho gonḻilallꞌcho beenaꞌ choeꞌcho xtilliinnaꞌ.
15 Naꞌ bx̱oz choo bx̱oz xen c̱hechonaꞌ chiyeshꞌlallileꞌ choꞌ daa nakcho beṉꞌ yell-lioz, ḻaꞌ ḻekzkaꞌ btiḻeꞌ daa nan kooyeḻaan ḻeꞌ wx̱iṉj wḻeneꞌ ka chak c̱hecho, per ḻeꞌ, wzo wzakileꞌ bi bx̱iṉj bḻeneꞌ.
16 Daan, do lallꞌcho chiyaḻꞌ ibigꞌcho xṉiꞌa Chiozaꞌ, beenaꞌ chṉabiaꞌ naꞌ nakeꞌ beṉꞌ chiyeshꞌlallii, kwenc̱he yiziꞌxeneꞌ c̱hecho naꞌ gakleneꞌ choꞌ katꞌ bittezə dii chak c̱hecho.