5
Chiozaꞌ chbejeꞌ yogꞌ bx̱oz choo bx̱oz xenkaꞌ ladj beṉꞌ Israelkaꞌ, naꞌ chzoeꞌneꞌ kwenc̱he iṉabeꞌ gakleneꞌ beṉꞌ wlall c̱heꞌkaꞌ naꞌ lljwee laweꞌnaꞌ yogꞌ daa chzangakileꞌ, naꞌ chiteꞌ bayix̱ꞌkaꞌ kwenc̱he chiziꞌxen Chiozaꞌ saaxya c̱heꞌkaꞌ.
2 Naꞌ beenaꞌ nak bx̱oz choo bx̱oz xen napeꞌ yeḻꞌ chxenlallꞌ c̱he beṉꞌkaꞌ chx̱iṉj chḻen daa bi ntegakileꞌ, ḻaꞌ ḻekzkaꞌ zoeꞌ dii nxoll wx̱iṉj wḻeneꞌ daa nakeꞌ beṉꞌ de beli chen.
3 Daan, chonan byen chiteꞌ bayix̱ꞌkaꞌ kwenc̱he yiziꞌxen Chiozaꞌ saaxya c̱heꞌnaꞌ, naꞌ kaꞌkz choneꞌ c̱he beṉꞌ wlall c̱heꞌkaꞌ.
4 Naꞌ kono chzoa kwinin gakeꞌ bx̱oz choo bx̱oz xen tobiaꞌlozeꞌ, san Chiozanꞌ chbejeꞌ beenaꞌ gak bx̱oz choo bx̱oz xen c̱heꞌ, ka beneꞌ c̱he dii Aarónnaꞌ.
5 Naꞌ ḻekzkaꞌ Crístonaꞌ, aga tobiaꞌlozenꞌ ben kwineꞌ bx̱oz choo bx̱oz xen, san Chiozanꞌ wloꞌeneꞌ balaaṉ daa bzoeꞌneꞌ nakeꞌ bx̱oz choo bx̱oz xen. Naꞌ kwineꞌ golleꞌneꞌ:
Liꞌ nakoꞌ Xiiṉꞌ,
naꞌ ṉaa daa solo iṉabiꞌo iṉezi beṉꞌ nadꞌ nakꞌ X̱oꞌ.
6 Naꞌ ḻekzkaꞌ Choꞌa Xtillꞌ Chiozaꞌ nan:
Liꞌ nakoꞌ bx̱oz zejḻi kaṉi,
ka bx̱oz Melquisedecaꞌ.
7 Naꞌ Crístonaꞌ, shlak wbaneꞌ yell-lioni, wchelleꞌ naꞌ wṉieꞌ zilljə, wṉabileꞌ Chiozaꞌ, beenaꞌ nap yeḻꞌ wak kwenc̱he yisleꞌneꞌ lao yeḻꞌ witaꞌ, naꞌ daa gokeꞌ beṉꞌ wizoa dillꞌ, Chiozaꞌ bzenagueꞌ c̱heꞌ.
8 Naꞌ ḻaꞌkzi gokeꞌ Xiiṉ Chios, diikaꞌ bllagloeꞌ benan ka wyajniileꞌ daa nak yeḻꞌ wizoa dillꞌ.
9 Naꞌ kaꞌ, biyoll bido gokeꞌ ka chiyaḻꞌ gakeꞌ kwenc̱he wiꞌe yeḻꞌ mban daa bi te c̱heyin beṉꞌkaꞌ chzoa xtilleenaꞌ.
10 Naꞌ Chiozaꞌ bzoeꞌneꞌ gokeꞌ bx̱oz choo bx̱oz xen ka gok Melquisedecaꞌ.
11 Dii zanch de dii weꞌlenꞌ leꞌ dillꞌ c̱he diiki ba wniaꞌ, per chonan lallj wzajniidaꞌn leꞌ daa bi chonle ka dii le.
12 Ṉaa ba gok ssha nombiaꞌle choꞌa xtillꞌ Chiozaꞌ, lenꞌ ba chiyaḻꞌ wliꞌ wsedilen beṉꞌ yoblə, sheḻꞌkaꞌ. Per leꞌlə ni chyalljzile no wzajniꞌchi leꞌ diikaꞌ bi chontek lallj shajniile c̱he choꞌa xtillꞌ Chiozaꞌ daa ba bsedle. Ni chonzle ka biꞌdoꞌ ni challꞌ naꞌ biṉꞌ gak gaobꞌ yeḻꞌ wao.
13 Naꞌ nottezə beṉꞌ biṉꞌ shajniileꞌ bi daa nak wen naꞌ bi daa nak mal nakeꞌ ka biꞌdoꞌ ni challꞌ.
14 San beṉꞌkaꞌ chzoac̱hec̱h chzenaggakeꞌ c̱he Chiozaꞌ, chakbeꞌgakileꞌ daa nak wen naꞌ daa nak mal. Ḻegakenꞌ nakgakeꞌ ka beṉꞌ ba cheej chao yeḻꞌ wao, aga ka biꞌdoꞌnaꞌ ni challꞌ.