6
Daan, chiyaḻꞌ goncho ka dii le gakchachcho lo xṉez Crístonaꞌ, naꞌ bi yiyec̱hj yibiilenzcho diikaꞌ ba ṉezkzicho: ka daa chiyaj chilenicho dii malkaꞌ bencho daa nsaꞌ yeḻꞌ wit, daa gonḻilallꞌcho Chiozaꞌ,
2 daa chchoa beṉꞌ nis, daa chx̱oa naꞌchokaꞌ yic̱hj beṉꞌ katꞌ chṉabcho gaklen Chiozaꞌneꞌ, daa yiban beṉꞌ ladj beṉꞌ wetkaꞌ, naꞌ daa wc̱hoglo Chiozaꞌ c̱he beṉꞌ ga idoḻꞌ to toeꞌ zejḻi kaṉi.
3 Chiozaꞌ gakleneꞌ choꞌ kwenc̱he goncho ka dii le gakchacho.
4 Beṉꞌkaꞌ ba yoo beeniꞌ c̱he Chiozaꞌ ḻoo yic̱hjlallꞌdoꞌekaꞌ, naꞌ ba bnix̱ blliagakeꞌ dii wennaꞌ choꞌe beṉꞌkaꞌ nak lallꞌ nee, naꞌ zoalen Espíritu Sántonaꞌ ḻegakeꞌ,
5 naꞌ ba bnix̱ blliagakeꞌ dillꞌ wen c̱he Chiozaꞌ naꞌ yeḻꞌ wak c̱heꞌnaꞌ daa yiyoll yido ileꞌicho katꞌ illin llanaꞌ,
6 shi yiḻaalaꞌogakeꞌ lo xṉez Chiozaꞌ, bich iṉan yiyaj yilengakileꞌ sto shii. Ḻaꞌ lengakeꞌ ba chongakeꞌ ka ben beṉꞌkaꞌ betgakeꞌ Xiiṉ Chiozaꞌ ḻee yag cruzaꞌ naꞌ chsiꞌgakeꞌneꞌ yeḻꞌ ztoꞌ ladj lkweꞌ beṉꞌ.
7 Beṉec̱haꞌ zaklebileꞌ to yell-lio dii chiyaalli katꞌ cheejan nis yejaꞌ daa chxop zekizezi lawinnaꞌ. Shi nakan yell-lio wen, beenaꞌ chaz chaaṉ yitopeꞌ daa yeej gaweꞌ lawinnaꞌ, naꞌ Chiozaꞌ goneꞌ ka gashj iḻebchan dii wenkaꞌ.
8 San shi chashj chḻebzan no yag yeshꞌ naꞌ no yag ḻey, aga bi zakii yell-lionaꞌ naꞌ c̱hishj Chiozaꞌ biaꞌ blagꞌ c̱heyin naꞌ wzey wtieꞌn.
9 Naꞌ leꞌ beṉꞌ bishꞌdawaa naꞌ leꞌ beṉꞌ zandawaa, ḻaꞌkzi ba wniaꞌ kaꞌ, ṉezidꞌ kwasḻoḻ gonle wen ḻega beṉꞌ ba bisla Chiozaꞌ.
10 Naꞌ Chiozaꞌ nakeꞌ beṉꞌ ḻi beṉꞌ shaoꞌ, naꞌ bi gaḻ-lallee dii wenkaꞌ ba benle naꞌ daa ba bliꞌle chakileneꞌ daa goklenle beṉꞌkaꞌ naklenle lallꞌ nee, kon ka ni chonle ṉaa.
11 Naꞌ cheenidꞌ to tole soale gonchle wen do yic̱hj do lallꞌle shnon mbanle, kwenc̱he gak c̱hele ka ba nonle lez.
12 Bi gakle beṉꞌ lia, san ḻi gonto ka ba chon beṉꞌkaꞌ zoatezi zoagakeꞌ chonḻilallꞌgakeꞌ Chiozaꞌ naꞌ chziꞌgakeꞌ banez daa bc̱hebeꞌ wiꞌe ḻegakeꞌ.
13 Ka bc̱heb Chiozaꞌ goneꞌ wen c̱he dii Abrahamaꞌ, bzoa kwineꞌ de tasc̱hiw goneꞌ ka bc̱hebeꞌ, ḻaꞌ koch no zoa beṉꞌ zakꞌchi ka ḻeꞌ wzoeꞌ de tasc̱hiw.
14 Naꞌ golleꞌ: “Dii ḻi gonḻeeyꞌ liꞌ naꞌ gonꞌ ka shesh shan xiiṉ dia c̱hoꞌkaꞌ.”
15 Naꞌ dii Abrahamaꞌ wdapeꞌ yeḻꞌ chxenlallꞌ wlezeꞌ ax̱t ki bllin lla gok ka bc̱heb Chiozaꞌ goneꞌ c̱heꞌ.
16 Katꞌkaꞌ beṉꞌ yell-lioki chc̱hebgakeꞌ to dii gongakeꞌ, chzoagakeꞌ to beṉꞌ zakꞌchi ka ḻegakeꞌ kwenc̱he chakbal daa chc̱hebgakeꞌ, naꞌ ḻen chonan ka shajḻeꞌ beṉꞌ c̱hegakeꞌ.
17 Naꞌ kaꞌkzə Chiozaꞌ, goklallee iṉezi beṉꞌkaꞌ ikaa dii wennaꞌ ziꞌ goneꞌ nan aga wde daa bc̱hebeꞌ, san dii ḻi, gonkzeꞌ ka wneꞌ. Daan, bzoa kwineꞌ de tasc̱hiw.
18 Naꞌ ka nak daa bc̱hebeꞌ goneꞌ len daa bzoa kwineꞌ de tasc̱hiw zejin aga wishee daa wneꞌ goneꞌ, ni bi chziyee. Naꞌ daa ṉezicho dga, chtipan lallꞌcho, choꞌ ba wbigꞌcho laweꞌnaꞌ naꞌ ba nx̱enilallꞌcho goneꞌ ka ba bc̱hebeꞌ.
19 Ka chak c̱he barkwaꞌ chc̱hinan to dii chbekwan daa tozga, kanꞌ chon daa ba noncho lez Crístonaꞌ, chaklenan choꞌ chajḻeꞌchacho naꞌ bi gak c̱hoplallꞌcho. Ḻoo lill xḻatj Chiozaꞌ wze lechaa daa bkwashaan latjaꞌ ganaꞌ wzoeꞌ naꞌ bi gok shoꞌgakeꞌ, san choꞌ ba noncho lez shoꞌcho
20 ganaꞌ ba wyoo Jesúzaꞌ naꞌ chṉabeꞌ c̱hecho, choꞌ ziꞌ yillincho naꞌ. Naꞌ nakeꞌ bx̱oz choo bx̱oz xen c̱hecho zejḻi kaṉi ka bx̱oz Melquisedecaꞌ.