7
Melquisedecaꞌ gokeꞌ beṉꞌ wṉabiaꞌ c̱he yellaꞌ le Salem naꞌ gokeꞌ bx̱oz c̱he Chiozaꞌ, beenaꞌ ḻiizelozi nak beṉꞌ choo beṉꞌ xen. Naꞌ ka zizaꞌ dii Abrahamaꞌ lo wdiḻaꞌ ganaꞌ beneꞌ gan beṉꞌ wṉabiaꞌkaꞌ, jatiḻ Melquisedecaꞌ ḻeꞌ naꞌ wṉabeꞌ ka gak wen c̱heꞌ.
2 Naꞌ dii Abrahamaꞌ beneꞌ shi kwen yogꞌ diikaꞌ bikee c̱he beṉꞌ wṉabiaꞌkaꞌ lo wdiḻaꞌ naꞌ wlejeꞌ tkwenana biꞌen Melquisedecaꞌ. Naꞌ Melquisedec zejin Beṉꞌ wṉabiaꞌ beṉꞌ chon daa nak shḻicha. Naꞌ ḻekzkaꞌ nakeꞌ beṉꞌ wṉabiaꞌ c̱he yell Salemaꞌ, naꞌ zejin beṉꞌ wṉabiaꞌ, beenaꞌ chon ka soalen ljwellin mbalaz.
3 Kono ṉezi no gok x̱axṉee ni no gok dii x̱ozxtoꞌe, ni kono ṉezi bat goljeꞌ naꞌ bat witeꞌ. Daan nakeꞌ bx̱oz zejḻi kaṉi ka nak Xiiṉ Chiozaꞌ.
4 Ḻi wwia ka beṉꞌ zakii nlleb gok Melquisedecaꞌ, ḻaꞌ kwin dii x̱ozxtoꞌcho Abrahamaꞌ biꞌeneꞌ tkwen c̱he de shi kwen c̱he yogꞌ diikaꞌ bikee c̱he beṉꞌkaꞌ beneꞌ gan lo wdiḻaꞌ.
5 Ley c̱he dii Moisézaꞌ nan beṉꞌkaꞌ nak xiiṉ dia c̱he dii Levínaꞌ, beṉꞌkaꞌ nak bx̱oz, chiyaḻꞌ ikaagakeꞌ tkwen c̱he de shi kwen c̱he yogꞌ daa chon to to beṉꞌ wlall c̱heꞌkaꞌ gan, beṉꞌkaꞌ nak bishꞌ ljwellgakeꞌ, ḻaꞌkzi lengakeꞌ nakgakeꞌ xiiṉ dia c̱he dii Abrahamaꞌ.
6 Per Melquisedecaꞌ, ḻaꞌkzi bi gokeꞌ dia c̱he dii Levínaꞌ, dii Abrahamaꞌ biꞌeneꞌ tkwen de shi kwen c̱he yogꞌ diikaꞌ bikee c̱he beṉꞌkaꞌ beneꞌ gan lo wdiḻaꞌ. Naꞌ Melquisedecaꞌ wṉabeꞌ gak wen c̱he dii Abrahamaꞌ, beenaꞌ bc̱heb Chiozaꞌ shesh shan xiiṉ dia c̱heꞌnaꞌ naꞌ gaki c̱heꞌ yell-lionaꞌ ganaꞌ wzoeꞌ.
7 Naꞌ ṉezicho kwasḻoḻ beenaꞌ chṉabeꞌ ka gak wen c̱he beṉꞌ, nakcheꞌ beṉꞌ zakꞌchi aga ka beenaꞌ chṉab gak wen c̱heꞌ.
8 Naꞌ ka nak bx̱ozkaꞌ chkaa tkwen c̱he de shi kwen c̱he yogꞌ diikaꞌ chatꞌ chbeꞌ c̱he beṉꞌ wlall c̱heꞌkaꞌ, nakgakeꞌ beṉꞌ chet. San c̱he bx̱oz Melquisedecaꞌ, Choꞌa Xtillꞌ Chiozaꞌ choꞌen dillꞌ mbaneꞌ toshiizi.
9 Naꞌ bx̱ozkaꞌ, beṉꞌkaꞌ chkaagakeꞌ tkwen c̱he de shi kwen c̱he yogꞌ diikaꞌ chon beṉꞌ wlall c̱heꞌkaꞌ gan, nakgakeꞌ xiiṉ dia c̱he dii Levínaꞌ, naꞌ wak iṉacho lenkzgakenꞌ beꞌgakeꞌ Melquisedecaꞌ daa beꞌ dii Abrahamaꞌ ḻeꞌ,
10 ḻaꞌ kanaꞌ jatiḻ Melquisedecaꞌ dii Abrahamaꞌ, ba nakkzan galj dii Levínaꞌ naꞌ gakeꞌ xiiṉ dia c̱he dii Abrahamaꞌ.
11 Chiozaꞌ wlejeꞌ dii Aarónnaꞌ, beenaꞌ nak xiiṉ dia c̱he dii Levínaꞌ, gakeꞌ bx̱oz kanaꞌ biꞌe dii x̱ozxtoꞌchokaꞌ ley c̱heꞌnaꞌ. Per bx̱ozkaꞌ wzoa lo dia c̱he dii Aarónnaꞌ bi gok yiyongakeꞌ choꞌ beṉꞌ ḻi beṉꞌ shaoꞌ lao Chiozaꞌ. Daan, benan byen soa sto bx̱oz yoblə, beenaꞌ gak ka bx̱oz Melquisedecaꞌ.
12 Naꞌ kwenc̱he to beṉꞌ bi nak xiiṉ dia c̱he dii Levínaꞌ gakeꞌ bx̱oz, ḻekzkaꞌ chonan byen yillaꞌ leyaꞌ.
13 Ḻaꞌ bx̱oz c̱hechonaꞌ, beenaꞌ choeꞌ Choꞌa Xtillꞌ Chiozaꞌ xtillee, aga goljeꞌ lo dia c̱he dii Levínaꞌ, san goljeꞌ lo dia c̱he dii Judánaꞌ, beenaꞌ konoṉ bx̱oz ichej lo dia c̱heꞌnaꞌ.
14 Ṉezteicho kwasḻoḻ X̱ancho Jesúzaꞌ goljeꞌ lo dia c̱he dii Judánaꞌ, naꞌ Moisézaꞌ bi bzetjeꞌ dia c̱he Judánaꞌ ka biꞌe dillꞌ no xiiṉ dia c̱heyin gak bx̱oz.
15 Wyajniꞌchicho dga ba wniaꞌ shi ichej to bx̱oz kob, beenaꞌ gak ka bx̱oz Melquisedecaꞌ,
16 to beṉꞌ bi nakeꞌ bx̱oz daa goljzeꞌ lo dia c̱he dii Levínaꞌ kon ka wna leyaꞌ, san nakeꞌ bx̱oz daa bibi de dii gak wlliayiꞌn yeḻꞌ mban c̱heꞌnaꞌ.
17 Ḻaꞌ ki wna Chiozaꞌ c̱heꞌ:
Liꞌ nakoꞌ bx̱oz zejḻi kaṉi,
ka bx̱oz Melquisedecaꞌ.
18 Naꞌ daa golleꞌ kaꞌ, zejin ba wde c̱he leyaꞌ daa bi gok gaklenan beṉꞌ.
19 Ḻaꞌ leyaꞌ bi gok yiyonan choꞌ beṉꞌ ḻi beṉꞌ shaoꞌ lao Chiozaꞌ, naꞌ bich chiyaḻꞌ goncho lez gaklenan choꞌ. San goncho lez beenaꞌ ba bzoa Chiozaꞌ yiyoneꞌ choꞌ beṉꞌ ḻi beṉꞌ shaoꞌ, naꞌ kaꞌ gak ibigꞌcho laweꞌnaꞌ.
20 Naꞌ Chiozaꞌ bzoa kwineꞌ de tasc̱hiw ka bc̱hebeꞌ goneꞌ kaꞌ. Ka wlejeꞌ beṉꞌkaꞌ nak xiiṉ dia c̱he dii Levínaꞌ gakgakeꞌ bx̱oz bi bzoa kwineꞌ de tasc̱hiw gakgakeꞌ bx̱oz toshiizi.
21 Per ka nak X̱ancho Jesúzaꞌ, Chiozaꞌ bzoa kwineꞌ de tasc̱hiw ka bc̱hebeꞌ wzoeꞌneꞌ gakeꞌ bx̱oz, ḻaꞌ choꞌa xtilleenaꞌ choꞌen dillꞌ chiꞌeneꞌ:
Nadꞌ Chios ba bzoaꞌ kwinꞌ de tasc̱hiw naꞌ aga wiyajidꞌ c̱heyi dga niaꞌ:
“Liꞌ nakoꞌ bx̱oz zejḻi kaṉi,
ka bx̱oz Melquisedecaꞌ.”
22 Naꞌ daa bzoeꞌ Jesúzaꞌ nakeꞌ bx̱oz zejḻi kaṉi, nxenlallꞌcho gon Chiozaꞌ c̱hecho sto dii wentech aga ka daa bc̱hebeꞌ goneꞌ dii nech.
23 Beṉꞌ zan ba gok bx̱oz choo bx̱oz xen, ḻaꞌ daa chetgakeꞌ benan byen yizoa lwaagakeꞌ.
24 San ka nak Jesúzaꞌ, daa mbaneꞌ zejḻi kaṉi, nakeꞌ bx̱oz choo bx̱oz xen toshiizi.
25 Daan, wak yisleꞌ choꞌ toshiizi, ḻaꞌ daa nonḻilallꞌchoneꞌ wak ibigꞌcho lao Chiozaꞌ, ḻaꞌ ḻenꞌ zoeꞌ toshiizi chṉabeꞌ gaklen Chiozaꞌ choꞌ.
26 Naꞌ Jesúzaꞌ, ḻeyeṉꞌenꞌ beenaꞌ chyalljicho gakeꞌ bx̱oz choo bx̱oz xen c̱hecho. Nakeꞌ beṉꞌ nxi nyech, beṉꞌ bibi saaxya beneꞌ, beṉꞌ bi ndaꞌ ncheneꞌ ni to dii mal, beṉꞌ bi wlallꞌ lao dii malaꞌ chon beṉꞌ saaxyakaꞌ, naꞌ biyepeꞌ jazoeꞌ yabanaꞌ ganaꞌ chgoogakeꞌneꞌ balaaṉ.
27 Naꞌ bi choneꞌ ka ben bx̱oz choo bx̱oz xenkaꞌ, beṉꞌkaꞌ benan byen betgakeꞌ bayix̱ꞌkaꞌ yogꞌ lla naꞌ bzeygakeꞌb lao Chiozaꞌ kwenc̱he zigaate ḻegakeꞌ chiyakxen saaxya daa chongakeꞌ, naꞌ ḻekzkaꞌ betgakeꞌ bayix̱ꞌkaꞌ kwenc̱he chiyakxen saaxya c̱he beṉꞌ wlall c̱heꞌkaꞌ. San Jesúzaꞌ, shlin shlax̱jzan bzani kwineꞌ witeꞌ ni c̱he saaxya c̱hechokaꞌ, naꞌ daa beneꞌ shlinz chonan llin zejḻi kaṉi.
28 Ley c̱he dii Moisézaꞌ bzoan beṉꞌ gokeꞌ bx̱oz choo bx̱oz xen ḻaꞌkzi bi gokgakeꞌ dowalj beṉꞌ wen. Per ka ba gok ssha chon bx̱ozkaꞌ llin, Chiozaꞌ wneꞌ wzoeꞌ Xiiṉeꞌnaꞌ, beenaꞌ toshiizi nak dowalj beṉꞌ wen, gakeꞌ bx̱oz choo bx̱oz xen, naꞌ bzoa kwineꞌ de tasc̱hiw gak ka wneꞌ.