8
Dga nak dii llialoch lao diiki choꞌa dillꞌ c̱heyin: bx̱oz choo bx̱oz xen c̱hechonaꞌ zoeꞌ zejḻi kaṉi naꞌ ba chiꞌe shḻaa de shḻi c̱he Chiozaꞌ yabanaꞌ ganaꞌ chṉabiꞌe.
2 Naꞌ nakeꞌ bx̱oz yabanaꞌ ganaꞌ non X̱ancho Chiozaꞌ dowalj lill xḻatjeꞌ, naꞌ aga nakan dii ben beṉꞌ yell-lioni.
3 Yogꞌ bx̱oz choo bx̱oz xenkaꞌ chzoa Chiozaꞌ ḻegakeꞌ kwenc̱he chjwaꞌgakeꞌ laweꞌnaꞌ yogꞌ daa chzani beṉꞌ wiꞌeneꞌ, naꞌ chitgakeꞌ bayix̱ꞌkaꞌ laweꞌnaꞌ. Daan, ḻekzkaꞌ benan byen bx̱oz choo bx̱oz xen c̱hechonaꞌ bzanileꞌ daa biꞌe Chiozaꞌ.
4 Sheḻꞌ zoeꞌ yell-lioni aga nakeꞌ bx̱oz, sheḻꞌkaꞌ, ḻaꞌ zoakz bx̱ozkaꞌ choeꞌgakeꞌ Chiozaꞌ diikaꞌ nllia leyaꞌ biaꞌ weꞌgakeꞌ.
5 Diikaꞌ chon bx̱ozkaꞌ bi nakan dowalj ka daa de yabanaꞌ. Daan, ka ziꞌ gon dii Moisézaꞌ lill xḻatj Chiozaꞌ, Chiozaꞌ bzajniileꞌneꞌ, chiꞌeneꞌ: “Ben byen gonle yogꞌte diikaꞌ kon ka ba bzajniidꞌ liꞌ lo yaanaꞌ.”
6 Daa chon bx̱oz choo bx̱oz xen c̱hechonaꞌ ṉaa zakꞌchin aga ka daa chon bx̱ozkaꞌ sto. Naꞌ daa ba bizoeꞌ choꞌ wen kon Chiozaꞌ, Chiozaꞌ ba bc̱hebeꞌ goneꞌ to dii zakꞌchi c̱hecho aga ka daa bc̱hebeꞌ lao dii x̱ozxtoꞌchokaꞌ.
7 Sheḻꞌ daa bc̱heb Chiozaꞌ dii nech goneꞌ c̱he dii x̱ozxtoꞌchokaꞌ benan ka yiyakgakeꞌ beṉꞌ ḻi beṉꞌ shaoꞌ, bi benan byen bc̱hebeꞌ goneꞌ sto dii yoblə, sheḻꞌkaꞌ.
8 Per Chiozaꞌ bleꞌileꞌ bi ben beṉꞌkaꞌ ka bllieꞌ biaꞌ, naꞌ beneꞌ ka wna dii beenaꞌ wdix̱jee xtilleenaꞌ:
X̱ancho Chiozaꞌ neꞌ: Wllin lla
katꞌ wc̱hebꞌ sto dii kob dii gaklenan leꞌ,
leꞌ zoale Israelaꞌ naꞌ leꞌ zoale Judánaꞌ.
9 Naꞌ aga gakan ka daa bc̱hebꞌ gonꞌ c̱he dii x̱ozxtoꞌlekaꞌ
llanaꞌ bibejꞌ ḻegakeꞌ Egíptonaꞌ.
Ḻaꞌ ḻegakeꞌ bi bengakeꞌ daa bc̱hebgakeꞌ gongakeꞌ,
naꞌ daan wchooṉlallꞌgakee, na X̱ancho Chiozaꞌ.
10 Naꞌ ṉaa de sto dii wc̱hebꞌ gonꞌ katꞌ illin llanaꞌ kwenc̱he gaklenꞌ beṉꞌ Israelkaꞌ.
Gonꞌ ka kweꞌ yic̱hjgakeꞌ diikaꞌ ba blliaꞌ biaꞌ gongakeꞌ,
naꞌ gonꞌ ka kooshaoꞌgakeꞌn ḻoo yic̱hjlallꞌdoꞌekaꞌ.
Naꞌ nadꞌ gakꞌ Chios c̱hegakeꞌ,
naꞌ ḻegakeꞌ gakgakeꞌ yell c̱haꞌ.
11 Naꞌ bich gonan byen no wliꞌ wsedi bishꞌ ljwellin,
ni bich gonan byen no wliꞌ wsedi beṉꞌ dialla c̱heyin, yeꞌzeꞌneꞌ:
“Chiyaḻꞌ gombiꞌo X̱ancho Chiozaꞌ”,
ḻaꞌ yogꞌz beṉꞌ gombiꞌe nadꞌ, ka biꞌdoꞌ ka beṉꞌ gol.
12 “Nadꞌ yiziꞌxenꞌ xtoḻeekaꞌ,
naꞌ bich lljadinidꞌ saaxya c̱heꞌkaꞌ.”
13 Naꞌ daa wna Chiozaꞌ goneꞌ to dii kob dii gaklenan ḻegakeꞌ, zejin daa bc̱hebeꞌ goneꞌ kaniꞌyi ba nakan dii wde c̱heyin. Naꞌ daa ba nakan dii gol dii ba wde c̱heyin ba zoa yinitlon.