9
Kanaꞌ bc̱heb Chiozaꞌ dii nech gakleneꞌ beṉꞌ Israelkaꞌ, bllieꞌ biaꞌ ka chiyaḻꞌ weꞌlaꞌogakeꞌneꞌ, naꞌ ḻekzkaꞌ bllieꞌ biaꞌ gongakeꞌ to lill xḻatjeꞌ ga weꞌlaꞌogakeꞌneꞌ lo yell-lioni.
2 Naꞌ ki nak lill xḻatj Chiozaꞌ daa bengakeꞌ: bengakeꞌ ḻoꞌinnaꞌ c̱hoplə, naꞌ latj nechaꞌ bsiꞌgakeꞌn Latj c̱he Chios, naꞌ bzoagakeꞌ to candeler naꞌ to mes ganaꞌ bkwaꞌgakeꞌ yetxtilkaꞌ lao Chiozaꞌ.
3 Naꞌ lechaa daa bzegakeꞌ ḻoo lill xḻatj Chiozaꞌ kwenc̱he bengakeꞌn c̱hoplə bkwashaan latjaꞌ sto daa bsiꞌgakeꞌ Latj Ga Zoa Chios,
4 ganaꞌ bzoagakeꞌ to diidoꞌ nongakeꞌ ka mes de or ganaꞌ bzeygakeꞌ yalaꞌ, naꞌ sto yiiṉ dii nwazjgakeꞌ or ka ḻoolə ka kollꞌlin, naꞌ bsiꞌgakeꞌn yiiṉ daa yoo daa chonḻi daa bc̱heb Chiozaꞌ. Naꞌ ḻoꞌinnaꞌ wyooshaoꞌ to xwag de or daa yoo yeḻꞌ wawaꞌ beꞌ Chiozaꞌ ḻegakeꞌ daa le maná, naꞌ ḻekzkaꞌ ḻoo yiiṉaꞌ wyoo bar c̱he dii Aarónnaꞌ daa bigaa, naꞌ yaj taakaꞌ ganaꞌ nyoj daa nllia Chiozaꞌ biaꞌ gongakeꞌ.
5 Naꞌ kollꞌ yiiṉaꞌ bzoagakeꞌ lwaa lsakꞌ anjlkaꞌ le kerubin kwenc̱he chliꞌn zoa Chiozaꞌ naꞌ, beenaꞌ yoo balaaṉ xen. Naꞌ x̱il anjlkaꞌ zen chx̱olgakan kolliinnaꞌ ganaꞌ chx̱itꞌ bx̱ozaꞌ xc̱hen bayix̱ꞌkaꞌ kwenc̱he chiziꞌxen Chiozaꞌ saaxya c̱heꞌkaꞌ. Per aga diikiyeṉꞌan cheenidꞌ wseesꞌchidꞌ leꞌ ṉaa.
6 Naꞌ ka ba nzoagakeꞌ yogꞌ diikaꞌ, naꞌch bx̱ozkaꞌ wzolo choogakeꞌ lleꞌ zil ḻoo latj nechaꞌ kwenc̱he chongakeꞌ ka bllia Chiozaꞌ biaꞌ gongakeꞌ katꞌ weꞌlaꞌogakeꞌneꞌ.
7 Per latj wchopinaꞌ tochga bx̱oz choo bx̱oz xennaꞌ de lsens shoꞌe shlin non twiz. Naꞌ katꞌ choꞌe, chonan byen lljwee xc̱hen bayix̱ꞌkaꞌ daa wx̱itee ḻoo latjaꞌ kwenc̱he yiziꞌxen Chiozaꞌ xtoḻeenaꞌ naꞌ xtoḻꞌ beṉꞌ wlall c̱heꞌkaꞌ daa bi chakbeꞌgakileꞌ chongakeꞌ.
8 Naꞌ Espíritu Sántonaꞌ chzajniileꞌ choꞌ daa chon bx̱ozaꞌ kaꞌ zejin shlak ni chon lill xḻatj Chiozaꞌ llin daa bengakeꞌ yell-lioni, biṉꞌ gatꞌ lsens shoꞌcho Latjaꞌ Ganaꞌ Zoa Chiozaꞌ.
9 Naꞌ yogꞌ diiki chzajniin choꞌ zoacho ṉaa nan ḻaꞌkzi beꞌgakeꞌ diikaꞌ bzangakileꞌ lao Chiozaꞌ naꞌ betgakeꞌ bayix̱ꞌkaꞌ naꞌ bzeygakeꞌb laweꞌnaꞌ kwenc̱he beꞌlaꞌogakeꞌneꞌ, diikaꞌ bengakeꞌ bi bizogakin yix̱is yiyibgakan yic̱hjlallꞌdoꞌekaꞌ kwenc̱he gongakeꞌ lez ba biziꞌxen Chiozaꞌ xtoḻeekaꞌ toshiizi.
10 Diiki zeelo bengakan llin c̱he to beli chen c̱heꞌkaꞌchga: ka c̱he no dii bi gak yeej gaogakeꞌ wa ka c̱he daa chiyaḻꞌ gongakeꞌ kwenc̱he yix̱is yiyib kwingakeꞌ. Naꞌ yogꞌ diiki bengakeꞌ benan llin shlak biṉꞌ gon llin dii kobaꞌ bc̱heb Chiozaꞌ goneꞌ.
11 Per ṉaa ba bid Crístonaꞌ, beenaꞌ nak bx̱oz choo bx̱oz xen c̱hecho, naꞌ nsee dii wenkaꞌ chbezcho gak. Naꞌ lill xḻatj Chiozaꞌ ganaꞌ billin Crístonaꞌ nakan dii zakꞌchi naꞌ dowalj daa aga no beṉꞌ yell-lio bx̱e bsileꞌn, ḻaꞌ bi nakan c̱he yell-lioni.
12 Naꞌ Crístonaꞌ, aga bex̱ee no xc̱hen shib wa no xc̱hen gooṉ ka wyoꞌe Latjaꞌ ganaꞌ zoa Chiozaꞌ, san daa wlalj xc̱heneꞌnanꞌ wyoꞌe shlin shlax̱jz, naꞌ c̱he toshiizin wdixjeꞌ xtoḻꞌchokaꞌ.
13 Bx̱ozaꞌ bc̱hineꞌ xc̱hen gooṉ naꞌ xc̱hen shib, naꞌ de c̱he bakdoꞌnaꞌ chzeygakeꞌ, naꞌ bx̱iteen beṉꞌkaꞌ bi nxi nyech lao Chiozaꞌ, ḻaꞌ kanꞌ na leyaꞌ chiyaḻꞌ gak kwenc̱he bixi biyech kwerp c̱heꞌkaꞌ lao Chiozaꞌ.
14 Naꞌ shi kanꞌ nakan, ¿alechlə xc̱hen Crístonaꞌ, beenaꞌ ni to dii mal bi ndaꞌ ncheneꞌ, nsaꞌchan yeḻꞌ wak? Espíritu Sántonaꞌ, beenaꞌ zoa zejḻi kaṉi, gokleneꞌneꞌ kwenc̱he ben kwineꞌ lallꞌ naꞌ Chiozaꞌ naꞌ wlalj xc̱heneꞌnaꞌ daa yix̱is yiyib diikaꞌ ndaꞌ nchen yic̱hjlallꞌdoꞌchokaꞌ, diikaꞌ chon ka kwiayiꞌcho. Naꞌ kaꞌ, iṉezicho ba biyakxen xtoḻꞌchokaꞌ naꞌ gak goncho daa cheeni Chiozaꞌ, beenaꞌ nak beṉꞌ yaa beṉꞌ ban.
15 Daan, Crístonaꞌ bx̱ieꞌ dii kobaꞌ daa bc̱heb Chiozaꞌ goneꞌ c̱hecho, choꞌ gox wṉabeꞌ. Ḻaꞌ daa biꞌe yeḻꞌ mban c̱heꞌnaꞌ witeꞌ ni c̱hecho, wdixjeꞌ saaxyakaꞌ bencho shlak ben leyaꞌ llin, kwenc̱he gak ikaacho daa bc̱heb Chiozaꞌ goṉeꞌ c̱hecho zejḻi kaṉi.
16 Shi to beṉꞌ ba beneꞌ ḻishi daa yikwaaṉleneꞌ to beṉꞌ, aga wak ikaa beenaꞌ diikaꞌ chwaḻꞌ yishaꞌ shi biṉꞌ guet beenaꞌ chikwaaṉan.
17 Ḻaꞌ yishaꞌ daa beneꞌ solo gonan llin katꞌ ba witeꞌ, naꞌ bibi zakiin shlak ni mbaneꞌ.
18 Daan, ka bx̱e Chiozaꞌ dii nechaꞌ bc̱hebeꞌ goneꞌ, beneꞌ byen betgakeꞌ bayix̱ꞌkaꞌ blalj xc̱hemkaꞌ.
19 Ḻaꞌ biyoll bzajnii dii Moisézaꞌ dii x̱ozxtoꞌchokaꞌ yogꞌ diikaꞌ nllia leyaꞌ biaꞌ, naꞌch bex̱ee latꞌ xa xilꞌ dii mben dii xṉa naꞌ txis daa le hisopo naꞌ bḻeejeꞌn ḻoo chen c̱he shibkaꞌ naꞌ c̱he gooṉkaꞌ betgakeꞌ naꞌ zi latꞌ nis, naꞌ bx̱iteen ḻee libraꞌ ganaꞌ nyoj leyaꞌ, naꞌ ḻekzkaꞌ bx̱iteen yogꞌḻoḻ beṉꞌkaꞌ lleꞌ naꞌ.
20 Naꞌ golleꞌ ḻegakeꞌ: “Chennin chonan ka chakḻi daa nc̱heb Chiozaꞌ goneꞌ c̱hecho naꞌ ḻekzkaꞌ zejin chiyaḻꞌ goncho yogꞌ daa nllieꞌ biaꞌ goncho.”
21 Naꞌ ḻekzkaꞌ bx̱itꞌ dii Moisézaꞌ chennaꞌ lill xḻatj Chiozaꞌ daa bengakeꞌ de lechꞌ naꞌ yogꞌ diikaꞌ bc̱hingakeꞌ ḻoꞌinnaꞌ ka beꞌlaꞌogakeꞌneꞌ.
22 Leyaꞌ bllian biaꞌ nan de dii zan daa chiyaḻꞌ wx̱itꞌgakeꞌ xc̱hen bayix̱ꞌkaꞌ kwenc̱he yixi yiyechgakan lao Chiozaꞌ; naꞌ kono yiyakxen c̱heyin shi bi ḻalj chennaꞌ.
23 Benan byen wlalj xc̱hen bayix̱ꞌkaꞌ kwenc̱he bixi biyech diikaꞌ ben llin lill xḻatj Chiozaꞌ yell-lioni, diikaꞌ nak ka bx̱en c̱he diikaꞌ de yabanaꞌ. Per diikaꞌ de yabanaꞌ, byalljin ḻalj to chen dii zakꞌchi aga ka xc̱hen bayix̱ꞌkaꞌ.
24 Ḻaꞌ Crístonaꞌ aga wyoꞌe ḻoo lill xḻatj Chiozaꞌ daa ben beṉꞌ yell-lioni daa bi nakan dowalj ka daa de yabanaꞌ, san yabananꞌ wyoꞌe kwenc̱he chṉabileꞌ Chiozaꞌ yiziꞌxeneꞌ c̱hecho.
25 Naꞌ aga zekizezin wyoꞌe beꞌ kwineꞌ blalj xc̱heneꞌnaꞌ, ka ben bx̱oz choo bx̱oz xennaꞌ ze twiz wej wyoꞌe ganaꞌ le Latj Ga Zoa Chios kwenc̱he bx̱itee xc̱hen bayix̱ꞌkaꞌ.
26 Sheḻꞌ byalljin goneꞌ ka chon bx̱ozkaꞌ, ba beꞌ kwineꞌ witeꞌ zan shii, sheḻꞌkaꞌ, wzolozan ka wxe wzil yell-lioni. Per aga kanꞌ nakan. San ṉaa llaki zeelo, shlin shlax̱jzan bzani kwineꞌ witeꞌ ni c̱hecho kwenc̱he bsol bṉiteꞌ saaxya c̱hechokaꞌ.
27 Naꞌ kon ka llia biaꞌ gak c̱he to to beṉꞌ yell-lioni gueteꞌ shlinz, naꞌtech wc̱hoglo Chiozaꞌ nak gak c̱he to toeꞌ,
28 kaꞌkzə Crístonaꞌ beꞌ kwineꞌ witeꞌ shlinzə kwenc̱he bsol bṉiteꞌ xtoḻꞌ beṉꞌ yell-lioki. Naꞌ ka yiyedeꞌ de wchop shiyi, aga yiyedeꞌ kwenc̱he wsol wṉiteꞌ xtoḻꞌ beṉaan, san yidixiꞌe beṉꞌkaꞌ chbezgakeꞌnenꞌ.