10
Ley c̱he dii Moisézaꞌ chzajniin choꞌ latꞌ c̱he dii wenkaꞌ ziꞌ zaꞌ gon Chiozaꞌ, naꞌ bi nakan ka daa nak dowalj. Daan, bi chzaki leyaꞌ yiyonan beṉꞌ ḻi beṉꞌ shaoꞌ beṉꞌkaꞌ yogꞌ yiz chitgakeꞌ bayix̱ꞌkaꞌ chzangakileꞌ weꞌgakeꞌ Chiozaꞌ ka nllian biaꞌ gongakeꞌ.
2 Sheḻꞌ daa chitgakeꞌ bayix̱ꞌkaꞌ gok bix̱is biyiban saaxya c̱heꞌkaꞌ, aga wyooch yic̱hjgakeꞌ nan nakgakeꞌ beṉꞌ saaxya naꞌ bich betgakeꞌ bayix̱ꞌkaꞌ, sheḻꞌkaꞌ.
3 Per daa betgakeꞌ bayix̱ꞌkaꞌ lao Chiozaꞌ ze twiz wej bisaꞌlan lallꞌgakeꞌ saaxya c̱heꞌkaꞌ,
4 ḻaꞌ xc̱hen gooṉkaꞌ naꞌ xc̱hen shibkaꞌ bi gak yisol yiṉitan saaxyakaꞌ.
5 Daan, ka bid Crístonaꞌ yell-lioni, golleꞌ Chiozaꞌ:
Aga cheenchiloꞌ no wit bayix̱ꞌ lawoꞌnaꞌ wa izangakileꞌ bichlə dii goṉgakeꞌ liꞌ,
san ba benoꞌ nadꞌ beṉꞌ de beli chen kwenc̱he izanidꞌ kwinꞌ lo lazgakin.
6 Bi chibailoꞌ no wit bayix̱ꞌkaꞌ wa wzeygakeꞌb lawoꞌnaꞌ kwenc̱he wsol wṉitoꞌ saaxya c̱heꞌkaꞌ.
7 Naꞌch wniaꞌ liꞌ: “Ka choeꞌ libr c̱hoꞌnaꞌ xtillaa,
Chios c̱haꞌ, ni zoaꞌ kwenc̱he gonꞌ daa cheeniloꞌ.”
8 Naꞌ zigaate wneꞌ: “Aga cheenchiloꞌ no wit bayix̱ꞌ naꞌ wzeygakeꞌb lawoꞌnaꞌ wa goṉgakeꞌ bichlə dii goṉgakeꞌ liꞌ kwenc̱he yiziꞌxenoꞌ xtoḻeekaꞌ”, ḻaꞌkzi nakgakan daa nllia leyaꞌ biaꞌ gongakeꞌ.
9 Naꞌtech chiꞌeneꞌ: “Chios c̱haꞌ, ni zoaꞌ kwenc̱he gonꞌ daa cheeniloꞌ.” Naꞌ daa golleꞌ kaꞌ zejin bzoeꞌ kaꞌlə dii golaꞌ ben bx̱ozkaꞌ naꞌ bx̱ieꞌ to dii kob lwaayi daa bzoeꞌ kaꞌlə.
10 Naꞌ daa ben Jesucrístonaꞌ ka cheeni Chiozaꞌ, beꞌ kwerp c̱heꞌnaꞌ naꞌ witeꞌ shlin shlax̱j ni c̱hecho, kwenc̱he bixi biyech yic̱hjlallꞌdoꞌchonaꞌ lao Chiozaꞌ.
11 Bx̱ozkaꞌ chilaḻgakileꞌ choeꞌlaꞌogakeꞌ Chiozaꞌ yogꞌ lla, naꞌ zekizezi chitgakeꞌ bayix̱ꞌkaꞌ laweꞌnaꞌ, ḻaꞌkzi biga gak yisol yiṉitgakan saaxya c̱heꞌkaꞌ.
12 San Crístonaꞌ bzani kwineꞌ witeꞌ shlin shlax̱j kwenc̱he bsol bṉiteꞌ xtoḻꞌchokaꞌ. Naꞌ ka bibaneꞌ, jachiꞌe shḻaa de shḻi c̱he Chiozaꞌ ganaꞌ chṉabiaꞌleneꞌneꞌ.
13 Naꞌ naꞌ zoeꞌ chbezeꞌ shlak wzoa Chiozaꞌ beṉꞌkaꞌ chwiyi ḻeꞌ xṉiꞌenaꞌ.
14 Naꞌ daa bzani kwineꞌ witeꞌ, biyoneꞌ beṉꞌkaꞌ beneꞌ lallꞌ naꞌ Chiozaꞌ beṉꞌ ḻi beṉꞌ shaoꞌ zejḻi kaṉi.
15 Naꞌ ḻekzkaꞌ Espíritu Sántonaꞌ biꞌe dillꞌ c̱heyi dga, kanaꞌ wneꞌ:
16 Ki nak daa chc̱hebꞌ gonꞌ c̱hegakeꞌ katꞌ illin llanaꞌ, na X̱ancho Chiozaꞌ:
Gonꞌ ka kooshaoꞌgakeꞌ ḻoo yic̱hjlallꞌdoꞌekaꞌ diikaꞌ nlliaꞌ biaꞌ gongakeꞌ,
naꞌ gonꞌ ka kweꞌ yic̱hjgakeꞌn.
17 Naꞌ wnacheꞌ:
Bichga lljadinidꞌ saaxya c̱heꞌkaꞌ ni xtoḻeekaꞌ.
18 Naꞌ shi Chiozaꞌ ba biziꞌxeneꞌ xtoḻꞌ beṉꞌ, aga chyalljch witgakeꞌ bayix̱ꞌkaꞌ kwenc̱he yiyakxenan.
19 Leꞌ beṉꞌ bishꞌ naꞌ leꞌ beṉꞌ zanꞌ, daa ba wit Jesucrístonaꞌ naꞌ blalj xc̱heneꞌnaꞌ ni c̱hecho, wak shoꞌcho do lallꞌcho Latjaꞌ Ganaꞌ Zoa Chiozaꞌ.
20 Daa biꞌe kwerp c̱heꞌnaꞌ, bsaljeꞌ to nez kob dii lljwaꞌn choꞌ ganaꞌ de yeḻꞌ mban zejḻi kaṉi. Ḻaꞌ kwerp c̱heꞌnaꞌ zaklebin lechaa daa ze ḻoo lill xḻatj Chiozaꞌ daa bchezꞌ ka witeꞌ, naꞌ zejin byalj latjaꞌ ganaꞌ zoa Chiozaꞌ kwenc̱he gak shoꞌcho.
21 Naꞌ Jesucrístonaꞌ, beenaꞌ nak ḻiizelozi bx̱oz choo bx̱oz xen, nakeꞌ bx̱oz c̱hecho, choꞌ nakcho lallꞌ naꞌ Chiozaꞌ.
22 Daan, chiyaḻꞌ ibigꞌcho lao Chiozaꞌ do yic̱hj do lallꞌcho, naꞌ wx̱enilallꞌcho wlebeꞌ choꞌ, ḻaꞌ ṉezicho ba nxi nyech yic̱hjlallꞌdoꞌchonaꞌ daa ba bsol bṉiteꞌ xtoḻꞌchokaꞌ, naꞌ ba bixi biyechi kwerp c̱hechoki nis xtilaꞌ.
23 Chiyaḻꞌ soac̱hec̱hcho goncho lez lljazoalencho Chiozaꞌ, kon ka choeꞌcho dillꞌ, ḻaꞌ ṉezicho choneꞌ ka nc̱hebeꞌ.
24 Naꞌ chiyaḻꞌ yiyiljlallꞌcho naklə ka goncho gaklen ljwellcho kwenc̱he to tocho gakchi ljwellcho naꞌ gonchcho dii wen.
25 Bi chiyaḻꞌ kwej yic̱hjcho daa chdop chllagcho choeꞌlaꞌocho Chiozaꞌ ka chonz baḻ beṉꞌ, san chiyaḻꞌ wtip lallꞌ ljwellcho, ¿alechli ṉaa daa chakbeꞌicho ba zoa yiyed X̱anchonaꞌ?
26 Naꞌ shi ni chonchcho dii malaꞌ daa ṉezicho bi chiyaḻꞌ goncho katꞌ ba nombiaꞌcho dillꞌ ḻi c̱he Chiozaꞌ, bich bi de weꞌcho Chiozaꞌ kwenc̱he yiziꞌxeneꞌ xtoḻꞌchokaꞌ.
27 Ḻechozə kwezcho do chall chllebzcho wc̱hoglo Chiozaꞌ c̱hecho llanaꞌ wzaḻee beṉꞌkaꞌ chakzbangakileꞌneꞌ lo yiꞌnaꞌ chaḻꞌṉiṉ daa wlliayiꞌ ḻegakeꞌ.
28 Katꞌ to beṉꞌ bi chzenagueꞌ c̱he ley c̱he dii Moisézaꞌ, shi zoa c̱hop shoṉ beṉꞌ bleꞌgakileꞌ daa beneꞌ, naꞌ chchoglo gueteꞌ naꞌ kono gak yiyeshꞌlallii ḻeꞌ.
29 ¿Alechlin ki gak yeḻꞌ zakꞌziꞌnaꞌ idoḻꞌ beenaꞌ chonileꞌ nakzi Xiiṉ Chiozaꞌ naꞌ xc̱heneꞌnaꞌ daa blaljeꞌ, naꞌ chṉieꞌ zban c̱he Espíritu Sántonaꞌ beenaꞌ chiyeshꞌlallii choꞌ? Ḻaꞌ xc̱heneꞌnanꞌ bix̱is biyiban yic̱hjlallꞌdoꞌchonaꞌ, naꞌ ka blaljeꞌn bx̱ieꞌ dii kobaꞌ daa bc̱heb Chiozaꞌ goneꞌ c̱hecho.
30 Naꞌ ṉezicho Chiozaꞌ wneꞌ: “Nadꞌ yiziꞌa wzon c̱he beenaꞌ chon dii malaꞌ, naꞌ wsakꞌziꞌaneꞌ ka chiyaḻꞌ gak c̱heꞌ.” Naꞌ ḻekzkaꞌ wneꞌ: “Nadꞌ X̱anle wc̱hogloaꞌ c̱hele, leꞌ nakle yell c̱haꞌ.”
31 ¡Nyeshꞌlaz wal inlleb gak c̱he beenaꞌ wc̱hoglo Chios yaa Chios bannaꞌ c̱heꞌ sakꞌziꞌe!
32 Ḻi lljadini ka nak dii lalljkaꞌ bleꞌile ka bleble beeniꞌ c̱he Chiozaꞌ ḻoo yic̱hjlallꞌdoꞌlenaꞌ, naꞌ bizo bizakileꞌ yeḻꞌ zakꞌziꞌkaꞌ bdiḻ bllagle.
33 Baḻ-le biya dii ben wna beṉꞌ leꞌ naꞌ biya dii bc̱hiꞌ bsakꞌgakeꞌ leꞌ lao lkweꞌ beṉꞌ. Naꞌ zi baḻ-le goklenle beṉꞌkaꞌ biya dii gok c̱hegakeꞌ.
34 Naꞌ biyeshileꞌ beṉꞌkaꞌ gotꞌ lillyanaꞌ, naꞌ wzoale mbalaz ḻaꞌkzi bikaa beṉꞌ bi dii de c̱hele, daa ṉezile de to dii wench c̱hele yabanaꞌ daa bi te c̱heyin.
35 Daan, bi kwej yic̱hjle daa nx̱enilallꞌle Chiozaꞌ, ḻaꞌ to banez choo banez xen siꞌle c̱heyin.
36 Chiyaḻꞌ so sakile diikaꞌ chen chleꞌile kwenc̱he yiyoll yido gonle ka cheeni Chiozaꞌ naꞌ gaki c̱hele daa nc̱hebeꞌ goṉeꞌ.
37 Ḻaꞌ Choꞌa Xtillꞌ Chiozaꞌ nan:
Ba zoa gaoshosh yiyed beenaꞌ chiyaḻꞌ yiyed,
naꞌ aga wllachileꞌ.
38 Naꞌ beenaꞌ nak beṉꞌ ḻi beṉꞌ shaoꞌ daa nonḻilallee nadꞌ ibaneꞌ zejḻi kaṉi.
Naꞌ shi bich gonḻilallee nadꞌ, bich ileꞌshiidee.
39 Per choꞌ, aga nakcho ka beṉꞌkaꞌ kwiayiꞌ daa chibiigakeꞌ bich chonḻilallꞌgakeꞌneꞌ, san choꞌ zoacho nonḻilallꞌchoneꞌ yilacho bi kwiayiꞌcho.