3 Naꞌ daa nonḻilallꞌcho Chiozaꞌ, ṉezicho ḻenꞌ bx̱e bsileꞌ yabanaꞌ len yell-lioni naꞌ ka beneꞌn aga bi bc̱hineꞌ, san kon ka wṉieꞌ wxe wzil yogꞌ diikaꞌ chleꞌicho.

4 Daa benḻilallꞌ dii Abelaꞌ Chiozanꞌ, biꞌeneꞌ to dii zakꞌchi aga ka daa beꞌ dii Caínnaꞌ. Naꞌ daa benḻilalleeneꞌ, Chiozaꞌ wneꞌ c̱heꞌ gokeꞌ beṉꞌ ḻi beṉꞌ shaoꞌ naꞌ bibaileꞌ diikaꞌ biꞌeneꞌ. Naꞌ ḻaꞌkzi ba wit dii Abelaꞌ, daa benḻilallee Chiozaꞌ ni chzajniin choꞌ ka chiyaḻꞌ goncho.

5 Naꞌ daa benḻilallꞌ Enocaꞌ Chiozanꞌ, bi bleꞌileꞌ yeḻꞌ witaꞌ, san Chiozaꞌ bikeeneꞌ shiꞌa shbaneꞌ naꞌ koch no bleꞌi ḻeꞌ. Naꞌ ka ziꞌ yikaa Chiozaꞌneꞌ wzeyi c̱heꞌ choneꞌ ka chazlallꞌ Chiozaꞌ.

6 Naꞌ shi bi gonḻilallꞌcho Chiozaꞌ, aga wak goncho ka ileꞌshiileꞌ choꞌ, ḻaꞌ chonan byen beenaꞌ cheenileꞌ gombiꞌe Chiozaꞌ chiyaḻꞌ shajḻiꞌe c̱heꞌ nan zoakzeꞌ naꞌ choneꞌ wen c̱he beṉꞌkaꞌ chiyilj ḻeꞌ.

7 Daa benḻilallꞌ dii Noénaꞌ Chiozanꞌ, wyajḻiꞌe ka bsiꞌnileꞌneꞌ c̱he yejsiwaa daa ziꞌ zaꞌ gak daa konoṉꞌ yen ileꞌi. Naꞌ daa bllebeꞌ Chiozanꞌ, bzenagueꞌ c̱heꞌ naꞌ beneꞌ barkwaꞌ ganaꞌ wyoo do bxooṉeꞌ kwenc̱he bilagakeꞌ. Naꞌ daa benḻilallee Chiozaꞌ naꞌ bzoeꞌ xtilleenaꞌ, bliꞌn beṉꞌkaꞌ wlliayiꞌ yell-lioni gokgakeꞌ beṉꞌ mal. Naꞌ Chiozaꞌ bleꞌileꞌneꞌ beṉꞌ ḻi beṉꞌ shaoꞌ daa benḻilalleeneꞌ.

8 Naꞌ kaꞌkzə dii Abrahamaꞌ, daa benḻilallee Chiozanꞌ, bzenagueꞌ ka goxeꞌ ḻeꞌ naꞌ golleꞌneꞌ shajeꞌ lljsoeꞌ to latj dii bc̱hebeꞌ wiꞌeneꞌ gakin c̱heꞌ. Naꞌ wzee lalleꞌnaꞌ zejeꞌ ḻaꞌkzi bi wṉezileꞌ gan illineꞌ.

9 Naꞌ daa benḻilallee Chiozanꞌ, jsoeꞌ ka beṉꞌ zitꞌ lo yell-lionaꞌ bc̱heb Chiozaꞌ wiꞌeneꞌ. Naꞌ beneꞌ lilleꞌnaꞌ de lechꞌ, kaꞌkzə dii Isaacaꞌ naꞌ dii Jacobaꞌ, beṉꞌkaꞌ ḻekzkaꞌ goki c̱hegakeꞌ daa bc̱heb Chiozaꞌ lao dii Abrahamaꞌ.

10 Naꞌ dii Abrahamaꞌ jsoeꞌ naꞌ, ḻaꞌ ṉezileꞌ wllin lla lljazoaleneꞌ Chiozaꞌ to latj wen daa ben kwin Chiozaꞌ, daa bi te c̱heyin.

11 Naꞌ ḻekzkaꞌ daa benḻilallee Chiozanꞌ, wyajḻiꞌe gon Chiozaꞌ ka soa xiiṉeꞌ ḻaꞌkzi ba nakeꞌ beṉꞌ gol naꞌ nakte dii xooleꞌ Sáranaꞌ nool will.

12 Kaꞌ gok wzoa beṉꞌ zan inlleb xiiṉ dia c̱heꞌ, ka beljkaꞌ llia xan yabanaꞌ naꞌ ka yoxaꞌ chiꞌ choꞌa nisdoꞌnaꞌ daa kono ibabi, ḻaꞌkzi ba nakeꞌ beṉꞌ gol ka wzoa xiiṉeꞌnaꞌ.

13 Yogꞌ beṉꞌki ni nonḻilallꞌgakeꞌ Chiozaꞌ ka witgakeꞌ ḻaꞌkzi lo yell-lioni bi wxiꞌ wkaagakeꞌ diikaꞌ bc̱heb Chiozaꞌ wiꞌe ḻegakeꞌ. Per wṉezgakileꞌ wllin lla gak ka wneꞌ, naꞌ bibagakileꞌ daa ziꞌ gak. Naꞌ wnagakeꞌ nakgakeꞌ ka beṉꞌ zitꞌ, beṉꞌ zaꞌ xtit shlollz lo yell-lioni.

14 Naꞌ daa wnagakeꞌ kaꞌ, zejin ni chbezgakeꞌ ganaꞌ gak dowalj lallgakeꞌ.

15 Ḻaꞌ sheḻꞌ gokgakileꞌ yellaꞌ ganaꞌ wzaꞌgakeꞌ nakan dowalj lallgakeꞌ, zak biyajgakeꞌ naꞌ dii yoblə sheḻꞌkaꞌ.

16 San ḻegakeꞌ wzelallꞌgakeꞌ yillingakeꞌ yabanaꞌ ganaꞌ zoa to lallgakeꞌ dii wench. Daan, Chiozaꞌ bi chiyiileꞌ daa nagakeꞌ nakeꞌ Chios c̱hegakeꞌ, naꞌ ba nonshawee ganaꞌ lljazoagakeꞌ.

17 Naꞌ dii Abrahamaꞌ, beenaꞌ bc̱heb Chiozaꞌ gak xiiṉ dia c̱heꞌnaꞌ beṉꞌ zan, daa benḻilalleenenꞌ bzenagueꞌ c̱heꞌ kanaꞌ golleꞌneꞌ izani xiiṉeꞌnaꞌ, biꞌnaꞌ nak tlishꞌ tyaj, witeꞌb lao Chiozaꞌ kwenc̱he gakbiaꞌ shi dii ḻi nx̱enilalleeneꞌ,

18 ḻaꞌkzi ba goll Chiozaꞌneꞌ: “Xiiṉ dia c̱hoꞌkaꞌ galjgakeꞌ lo xiiṉ dia c̱he dii Isaacaꞌ.”

19 Naꞌ daa wyajḻeꞌ dii Abrahamaꞌ nap Chiozaꞌ yeḻꞌ wak yisbaneꞌ beṉꞌ wetkaꞌ, wak iṉacho Chiozaꞌ bisbaneꞌ xiiṉeꞌnaꞌ ladj beṉꞌ wetkaꞌ daa biz biꞌe latj witeꞌbꞌ.

20 Naꞌ ḻekzkaꞌ dii Isaacaꞌ, daa benḻilallee Chiozanꞌ, wṉabileꞌneꞌ goneꞌ ka gak wen c̱he xiiṉeꞌ Jacobaꞌ naꞌ Esaúnaꞌ llakaꞌ ziꞌ zaꞌ.

21 Naꞌ ḻekzkaꞌ dii Jacobaꞌ, daa benḻilallee Chiozanꞌ, ka ba zoa gueteꞌ wṉabileꞌneꞌ goneꞌ ka gak wen c̱he c̱hopte xiiṉ dii Josénaꞌ, naꞌ de nc̱hishꞌzi yag bar c̱heꞌnaꞌ beꞌlawee Chiozaꞌ.

22 Naꞌ ḻekzkaꞌ dii Josénaꞌ, daa benḻilallee Chiozanꞌ, kanaꞌ ba zoa gueteꞌ, biꞌe dillꞌ wllin lla yichej beṉꞌ Israelkaꞌ Egíptonaꞌ, naꞌ golleꞌ ḻegakeꞌ yisaꞌgakeꞌ llit wet c̱heꞌnaꞌ katꞌ yilleshgakeꞌ.

23 Naꞌ ḻekzkaꞌ daa benḻilallꞌ dii x̱axṉaꞌ dii Moisézaꞌ Chiozanꞌ, ka goljbꞌ bkwashꞌgakeebꞌ shoṉ beoꞌ daa bleꞌgakileꞌ ka xochi gokbꞌ. Naꞌ bi bllebgakeꞌ daa bc̱hoglo faraónnaꞌ guet bdoꞌkaꞌ.

24 Naꞌ ḻekzkaꞌ daa benḻilallꞌ dii Moisézaꞌ Chiozanꞌ, ka bgoleꞌ bi goonileꞌ iṉa beṉꞌ nakeꞌ xiiṉ biꞌ nool c̱he faraónnaꞌ.

25 Wyazlallꞌcheꞌ biya dii sakꞌziꞌleneꞌ beṉꞌ wlall c̱heꞌkaꞌ, beṉꞌkaꞌ nak yell c̱he Chiozaꞌ, aga ka daa goneꞌ dii malkaꞌ nak toldezə daa chibayi beṉꞌ.

26 Gokbeꞌileꞌ zakꞌchi kwell iṉe beṉꞌ c̱heꞌ ni c̱he Crístonaꞌ, aga ka daa siꞌe banez c̱he yeḻꞌ wniꞌanaꞌ de Egíptonaꞌ, daa bzoa yic̱hjeꞌ dii wennaꞌ weꞌ Chiozaꞌneꞌ.

27 Daa benḻilallꞌ dii Moisézaꞌ Chiozanꞌ, bizee Egíptonaꞌ naꞌ bi bllebeꞌ illaa faraónnaꞌ ḻeꞌ, san gokeꞌ wal daa wṉezileꞌ Chiozaꞌ, beenaꞌ kono chleꞌi, wzoaleneꞌ ḻeꞌ.

28 Naꞌ daa benḻilallee Chiozanꞌ, beneꞌ lṉi Paskwaꞌ. Naꞌ golleꞌ beṉꞌ wlall c̱heꞌkaꞌ witgakeꞌ twej xilꞌdoꞌ naꞌ wx̱itꞌgakeꞌ xc̱hemaꞌ yic̱hj puert c̱heꞌkaꞌ kwenc̱he anjlaꞌ, beenaꞌ lljet biꞌ byo nechkaꞌ, bi witeꞌ biꞌ byo nech c̱heꞌkaꞌ.

29 Naꞌ daa benḻilallꞌ beṉꞌ Israelkaꞌ Chiozanꞌ, gok bidegakeꞌ ḻoo nisdoꞌnaꞌ le Nisdoꞌ Xṉa, ḻaꞌ Chiozaꞌ beneꞌn c̱hop ḻaalə kwenc̱he gok bidegakeꞌ lo yo billaꞌ. Naꞌ ka nan te beṉꞌ Egíptokaꞌ, to biyejzan naꞌ wcheꞌgakeꞌ yel.

30 Ḻekzkaꞌ daa benḻilallꞌgakeꞌ Chiozanꞌ, beneꞌ ka billee zeekaꞌ nec̱hj yell Jericónaꞌ ka biyoll wyec̱hjgakeꞌn gall lla.

31 Naꞌ ḻekzkaꞌ nool wdanaꞌ wle Rahab, daa benḻilallee Chiozanꞌ, blebeꞌ beṉꞌ Israelkaꞌ lilleꞌnaꞌ ka bllingakeꞌ jawia jayigakeꞌ lalleꞌnaꞌ naꞌ bi wlliayiꞌleneꞌ beṉꞌ Jericókaꞌ beṉꞌkaꞌ bi bzenag c̱he Chiozaꞌ.

32 Dii zanch dii de iṉiaꞌ, per bich bi latj de wiꞌa dillꞌ ka ben dii Gedeónnaꞌ, dii Barácaꞌ, dii Sansónnaꞌ, dii Jefténaꞌ, dii Davinaꞌ, dii Samuelaꞌ naꞌ dii beṉꞌkaꞌ wdix̱jee daa goll Chiozaꞌ ḻegakeꞌ.

33 Daa benḻilallꞌgakeꞌ Chiozanꞌ, wkaagakeꞌ yell-lio c̱he beṉꞌkaꞌ wdiḻ-lengakeꞌ, naꞌ wṉabiaꞌgakeꞌ xochi ka wyazlallꞌ Chiozaꞌ, naꞌ goki c̱hegakeꞌ daa bc̱heb Chiozaꞌ wiꞌe ḻegakeꞌ. Naꞌ Chiozaꞌ bisleꞌ baḻgakeꞌ lao bell zṉiakaꞌ,

34 naꞌ zi baḻeꞌ beneꞌ kwenc̱he bi bzey yiꞌ walaꞌ ḻegakeꞌ, naꞌ zi baḻeꞌ bilagakeꞌ bi witgakileꞌ spadaꞌ. Naꞌ baḻ beṉꞌ bḻanꞌkaꞌ, ben Chiozaꞌ ḻegakeꞌ beṉꞌ wal, naꞌ ka wdiḻ-lengakeꞌ soldadkaꞌ nak beṉꞌ zitꞌ, bengakeꞌ ḻegakeꞌ gan.

35 Naꞌ Chiozaꞌ gokleneꞌ baḻ noolkaꞌ, bisbaneꞌ no xiiṉ c̱heꞌkaꞌ ba wit.

36 Naꞌ zi baḻgakeꞌ btitjgakileꞌ naꞌ bet wdingakeꞌ ḻegakeꞌ, naꞌ bc̱hejgakeꞌ ḻegakeꞌ gdennaꞌ naꞌ wdix̱jgakeꞌ ḻegakeꞌ lillyanaꞌ.

37 Naꞌ zi baḻgakeꞌ betgakileꞌ yaj, naꞌ zi baḻgakeꞌ wlejgakeꞌ c̱hoplə kon sierraꞌ, naꞌ zi baḻgakeꞌ betgakileꞌ spad. Naꞌ zi baḻgakeꞌ biga wzoa lill xḻatjgakeꞌ naꞌ bc̱hingakeꞌ no xa xilꞌkaꞌ no xa shibkaꞌ lwaa xagakeꞌ, naꞌ gokgakeꞌ beṉꞌ yeshꞌdoꞌ naꞌ dii zan dii ben bleꞌgakileꞌ daa bc̱hiꞌ bsakꞌ beṉꞌ ḻegakeꞌ.

38 Wdagakeꞌ latjaꞌ ganaꞌ bibi chashj chḻeb naꞌ do yaa yaokaꞌ, naꞌ bigaaṉgakeꞌ do xan blejkaꞌzə naꞌ no ḻoo yech. Naꞌ beṉꞌkaꞌ kanaꞌ, ni latꞌ bi nan chidoḻꞌgakeꞌ soa beṉꞌ wenkaꞌ ladjeꞌkaꞌ, sheḻꞌkaꞌ.

39 Naꞌ ḻaꞌkzi Chiozaꞌ wyazlallee ka benḻilallꞌgakeꞌneꞌ, ni togakeꞌ shlak wzoagakeꞌ yell-lioni bi bleꞌgakileꞌ gak daa bc̱hebeꞌ goneꞌ c̱hegakeꞌ.

40 Ḻaꞌ wloꞌe xṉezin kwenc̱he aga to ḻezgakeꞌ yiziꞌgakeꞌ banez ka nak daa bc̱hebeꞌ goneꞌ, san cheenileꞌ lencho yiziꞌcho banez c̱he to dii zakꞌchi kwenc̱he yogꞌcho yiyakcho kwasḻoḻ ka cheenileꞌ.