2 Leꞌ beṉꞌ bishꞌdawaa naꞌ leꞌ beṉꞌ zandawaa, ḻi yiba yizaki katꞌ ileꞌile yiya yeḻꞌ zakꞌziꞌ.

3 Ḻaꞌ ba ṉezkzile katꞌ chzakꞌziꞌcho daa nonḻilallꞌcho Chiozaꞌ, chaklenan choꞌ soatipchcho gonḻilallꞌchoneꞌ.

4 Naꞌ ḻi gap yeḻꞌ chxenlallꞌ lao bittez daa gak c̱hele kwenc̱he yiyoll yido gakchale kon ka chazlallꞌ Chiozaꞌ.

5 Shi nole chyalljile yeḻꞌ sinꞌnaꞌ, ḻi iṉabin Chiozaꞌ naꞌ goṉeꞌn. Ḻaꞌ Chiozaꞌ choꞌen nottezə beṉꞌ chṉabeꞌn, aga no chllonileꞌn.

6 Ḻi iṉaban naꞌ ḻi gonyeṉꞌ lez goṉeꞌn naꞌ bi gakc̱hoplallꞌle. Ḻaꞌ beenaꞌ chonc̱hoplallꞌ nakeꞌ ka bḻi c̱he nisdoꞌnaꞌ daa choaꞌ beꞌnaꞌ to ni to naꞌlə.

7 Beenaꞌ chakc̱hoplallꞌ, bi goneꞌ lez weꞌ X̱ancho Chiozaꞌ daa chṉabeꞌ,

8 ḻaꞌ chiya dii na yic̱hjlallꞌdoꞌenaꞌ goneꞌ, naꞌ shaḻꞌ ki shaḻꞌ kaꞌlə chakeꞌ lao yogꞌḻoḻ daa choneꞌ.

9 Beṉꞌ bishꞌchonaꞌ, beenaꞌ nak beṉꞌ yeshꞌdoꞌ, chiyaḻꞌ yiba yizakileꞌ daa nakeꞌ beṉꞌ zakii lao Chiozaꞌ.

10 Naꞌ beṉꞌ bishꞌchonaꞌ, beenaꞌ nak beṉꞌ wniꞌa, chiyaḻꞌ yibaileꞌ daa ba biyakbeꞌileꞌ aga no nakeꞌ lao Chiozaꞌ. Ḻaꞌ ka chde c̱he yejdoꞌkaꞌ llia lyix̱aa kaꞌkzan te c̱he beṉꞌ wniꞌakaꞌ.

11 Katꞌ chlaꞌ wbilldoꞌnaꞌ naꞌ chṉaꞌn ziꞌbiaꞌ naꞌ chbill yag yejaꞌ, naꞌ chllib yejaꞌ llian naꞌ yeḻꞌ mba c̱heyinnaꞌ chbiayiꞌn. Kaꞌkzan beṉꞌ wniꞌanaꞌ, yiyol yiniteꞌ lao delgens c̱heꞌnaꞌ choneꞌ.

12 Chakomba beenaꞌ chzo chzaki chtiḻeꞌ bittez dii mal. Ḻaꞌ katꞌ ba wdieꞌ lawinnaꞌ, Chiozaꞌ wiꞌeneꞌ yeḻꞌ mban zejḻi kaṉi daa bc̱hebeꞌ wiꞌe beṉꞌkaꞌ chakgakileꞌneꞌ.

13 Nottez beṉꞌ katꞌ chzaꞌlallee goneꞌ dii malkaꞌ, bi chiyaḻꞌ iṉeꞌ: “Chiozaꞌ bzoeꞌ dii mali lawaꞌni”. Ḻaꞌ Chiozaꞌ aga bi dii mal choneꞌ ni bibi dii mal chzoeꞌ lao beṉꞌ kwenc̱he goneꞌn.

14 San daa chzelallꞌcho goncho dii malanꞌ, ḻennanꞌ chgooyeḻaan choꞌ kwenc̱he ixopcho lawinnaꞌ.

15 Naꞌ daa chzelallꞌcho dii malaꞌ, chxopcho lao saaxyanaꞌ, naꞌ saaxyanaꞌ daa choncho chlliayiꞌn choꞌ.

16 Leꞌ beṉꞌ bishꞌdawaa naꞌ leꞌ beṉꞌ zandawaa, bi siyeꞌz kwinle.

17 Chiozaꞌ, beenaꞌ zoa yabanaꞌ naꞌ bx̱e bsileꞌ yogꞌ diikaꞌ chzeeniꞌ xan yabanaꞌ, ḻenꞌ choṉeꞌ choꞌ yogꞌḻoḻ daa nak dii wen dii shaoꞌ naꞌ toshiizi zoeꞌ choneꞌ wen naꞌ biga chillee.

18 Ḻenꞌ wyazlallee goṉeꞌ yeḻꞌ mban c̱hecho zejḻi kaṉi daa wyajḻeꞌcho dillꞌ ḻi c̱heꞌnaꞌ, kwenc̱he ladj yogꞌ beṉꞌkaꞌ bx̱e bsileꞌ gokcho beṉꞌ nech beṉꞌ biyaꞌo biziꞌe, naꞌ zaklebicho diikaꞌ chiziꞌ chilapgakeꞌ dii nech daa chzangakileꞌ choeꞌgakeꞌ Chiozaꞌ.

19 Leꞌ beṉꞌ bishꞌdawaa naꞌ leꞌ beṉꞌ zandawaa, ḻi wzoa yic̱hjle dga: yogꞌḻoḻ beṉꞌ chiyaḻꞌ wsedeꞌ wzenagueꞌ, naꞌ wsakee bin iṉeꞌ, naꞌ gapeꞌ to yeḻꞌ chxenlallꞌ bi illaa ilokeꞌ.

20 Ḻaꞌ yeḻꞌ chllaa chlokaꞌ chllonan goncho ka cheeni Chiozaꞌ.

21 Daan, ḻi c̱hooṉlallꞌ yogꞌḻoḻ dii zbankaꞌ chonle naꞌ yogꞌḻoḻ dii malkaꞌ chonle, naꞌ ḻi wḻex̱j yic̱hjle wzenagle choꞌa xtillꞌ Chiozaꞌ daa ba ṉezile. Ḻaꞌ ḻennanꞌ napan yeḻꞌ wak yislan leꞌ kwenc̱he bi kwiayiꞌle.

22 Aga to wzenagzcho choꞌa xtillꞌ Chiozanꞌ, san chiyaḻꞌ goncho ka nan. Naꞌ shi bi goncho ka nan, chziyeꞌzə kwinchon, shi ṉaa.

23 Beenaꞌ to chzenagz choꞌa xtillꞌ Chiozaꞌ naꞌ bi choneꞌ ka nan, choneꞌ ka beenaꞌ chwia choꞌalaweꞌnaꞌ lo wannaꞌ,

24 naꞌ ka chikwaseꞌ chiyoll chwia choꞌalaweꞌnaꞌ, ḻi chaḻ-lallꞌtieꞌ nakan nakeꞌ.

25 Beenaꞌ bi chaḻ-lallꞌ dii wennaꞌ nllia Chiozaꞌ biaꞌ goneꞌ daa yisell yiḻaan ḻeꞌ lao dii malaꞌ, naꞌ zieꞌn wṉeyi, naꞌ toshiizi zoaꞌtip zoashosheꞌ choneꞌ ka nan, beenanꞌ zoa mbalaz.

26 Shi no chakzi choneꞌ ka cheeni Chiozaꞌ, per bi chak gox̱ꞌ choꞌa ḻolleenaꞌ, chziyeꞌz kwinenꞌ naꞌ bibi zakii daa neꞌ choneꞌ ka cheeni Chiozaꞌ.

27 Daa cheeni X̱acho Chiozaꞌ goncho naꞌ nxiꞌn laweꞌnaꞌ, ḻen dga: yiyeshꞌlallicho biꞌ wizebdoꞌkaꞌ naꞌ nool wizebkaꞌ lao dii lalljkaꞌ chen chleꞌgakileꞌ, naꞌ gap wwia kwincho bi goncho txen dii malkaꞌ de yell-lioni.