13
Ḻi soatezi soa gaki ljwell-le ka chakile to beṉꞌ bishꞌ goljle.
2 Naꞌ bi gaḻꞌlallꞌle wleble beṉꞌ ḻoo yoo lill-le naꞌ weꞌle ḻegakeꞌ ga yigaaṉgakeꞌ, ḻaꞌ baḻ beṉꞌkaꞌ ben kaꞌ blebgakeꞌ anjlkaꞌ lilleꞌkaꞌ, ḻaꞌkzi bi gokbeꞌgakileꞌ.
3 Ḻi lljadini gaklenle beṉꞌkaꞌ de lillyanaꞌ, naꞌ ḻi gaktezi lenkzlen chak c̱hele kaꞌ. Ḻi gaklen beṉꞌkaꞌ chiya dii chc̱hiꞌ chsakꞌ beṉꞌ ḻegakeꞌ, naꞌ ḻi gaktezi lenkzlen chak c̱hele kaꞌ.
4 Dii wen inlleb daa neꞌ nkaa c̱heꞌ, naꞌ leꞌ nshagnaꞌle bi chiyaḻꞌ talenle beṉꞌ yoblə, ḻaꞌ Chiozaꞌ wsakꞌziꞌe nottez beṉꞌkaꞌ soalengakeꞌ nool bi nak nool c̱hegakeꞌ wa beṉꞌ byo bi nak beṉꞌ c̱hegakeꞌ.
5 Bi chiyaḻꞌ selallꞌcho yeḻꞌ wniꞌanaꞌ, san goncho banez kaꞌkꞌ dii de c̱hecho, ḻaꞌ Chiozaꞌ ba wneꞌ: “Biga wsanꞌ liꞌ ni bi kwej yic̱hjꞌ liꞌ.”
6 Daan, wak iṉacho do yic̱hj do lallꞌcho:
X̱ancho Chiozaꞌ zoeꞌ chakleneꞌ nadꞌ.
Naꞌ bi gall illebꞌ shi bi goni beṉꞌ nadꞌ.
7 Naꞌ ḻi lljadini ka ben beṉꞌkaꞌ bliꞌ bsedi leꞌ choꞌa xtillꞌ Chiozaꞌ. Ḻi wwia ka wzoa wlezgakeꞌ benḻilallꞌgakeꞌ Crístonaꞌ toshiizi, naꞌ ḻi gonḻilallee ka benḻilallꞌgakeꞌneꞌ.
8 Jesucrístonaꞌ biga chillee, ḻekzenꞌ kaniꞌyi, ḻekzenꞌ ṉaa naꞌ ḻekzenꞌ zejḻi kaṉi.
9 Bi weꞌle latj no wliꞌ wsedi leꞌ dii yoblə dii chyiljlallꞌ beṉꞌ dii gonan ka yilaale lo nez ḻi c̱he Chiozaꞌ. Wenchan wzoac̱hec̱h yic̱hjlallꞌdoꞌchoni lo yeḻꞌ chaki c̱he Chiozaꞌ, aga ka daa shoꞌz yic̱hjcho c̱heyi diikaꞌ na beṉꞌ bi chiyaḻꞌ yeej gaocho. Ḻaꞌ beṉꞌkaꞌ chinaḻꞌ chinogakeꞌn bi chaklenan ḻegakeꞌ.
10 Daa ba wit Crístonaꞌ ni c̱hecho, ba chiziꞌcho to banez daa bi biziꞌ bx̱ozkaꞌ bet bayix̱ꞌkaꞌ ganaꞌ wzoa lill xḻatj Chiozaꞌ daa bengakeꞌ de lechꞌ.
11 Bx̱oz choo bx̱oz xennaꞌ jwee xc̱hen bayix̱ꞌkaꞌ Latjaꞌ Ganaꞌ Zoa Chiozaꞌ kwenc̱he yiziꞌxeneꞌ xtoḻeekaꞌ, per bchejgakeꞌ latjaꞌ ganaꞌ wchengakeꞌ kwenc̱he jazeygakeꞌ kwerp c̱he bayix̱ꞌkaꞌ.
12 Naꞌ kaꞌkzan gok c̱he Jesúzaꞌ, ḻekzkaꞌ wlejgakeꞌneꞌ yellaꞌ ka betgakeꞌneꞌ. Naꞌ wlalj xc̱heneꞌnaꞌ kwenc̱he yisol yiṉiteꞌ saaxya c̱he beṉꞌkaꞌ gonḻilallꞌgakeꞌneꞌ.
13 Naꞌ choꞌ ṉaa, chiyaḻꞌ ṉocho Crístonaꞌ ḻaꞌkzi ḻe gakzbani beṉꞌ choꞌ ka gokzbangakileꞌneꞌ.
14 Ḻaꞌ yell-lioni gani zoacho nakan dii te c̱heyin, per noncho lez yillincho ganaꞌ soacho zejḻi kaṉi.
15 Daan, chiyaḻꞌ weꞌlaꞌocho Chiozaꞌ toshiizi daa wit Crístonaꞌ ni c̱hecho, naꞌ koochoneꞌ balaaṉ kon choꞌa ḻollꞌchoni weꞌcho dillꞌ ḻenꞌ nakeꞌ X̱ancho, ḻaꞌ ḻennanꞌ nakan ka dii chzanicho weꞌchoneꞌ.
16 Bi gaḻ-lallꞌcho goncho dii wennaꞌ naꞌ izanicho bi de c̱hecho weꞌchon beṉꞌ chyallj chc̱hinileꞌn, ḻaꞌ ḻennanꞌ chazlallꞌ Chiozaꞌ naꞌ daa choncho kaꞌ, ḻenꞌ choeꞌlaꞌocho.
17 Ḻi wzenag c̱he beṉꞌkaꞌ chliꞌ chsedi leꞌ naꞌ ḻi wḻex̱j yic̱hjle laweꞌkaꞌ, ḻaꞌ ḻegakenꞌ chap chwiagakeꞌ leꞌ daa yoo yic̱hjgakeꞌ wllin lla yidegakeꞌ kwent lao Chiozaꞌ daa bengakeꞌ. Ḻi wzenag daa nagakeꞌ kwenc̱he yibagakileꞌ gon xshineꞌkaꞌ naꞌ bi gakgakileꞌn to dii lallj. Ḻaꞌ shi bi wzenagle c̱he daa chliꞌ chsedgakeꞌ, bibi banez c̱heyin siꞌle.
18 Ḻi iṉabi Chiozaꞌ gakleneꞌ netoꞌ, ḻaꞌ ṉezyeṉꞌintoꞌ chonntoꞌ ka cheenileꞌ, naꞌ cheenintoꞌ wsaꞌ c̱hentoꞌ wen lao yogꞌḻoḻte.
19 Naꞌ chatꞌyoidꞌ leꞌ iṉabile Chiozaꞌ ni c̱haꞌ kwenc̱he yob gak yidꞌ sto shii ganaꞌ zoale.
20 Chiozaꞌ, beenaꞌ chzoeꞌ choꞌ mbalaz, bisbaneꞌ ladj beṉꞌ wetkaꞌ X̱ancho Jesucrístonaꞌ, beenaꞌ chap chwia choꞌ ka chon x̱an xilaa, beenaꞌ choeꞌlaꞌochga xilꞌ c̱heꞌkaꞌ. Naꞌ ḻekzenꞌ beenaꞌ bx̱e daa bc̱heb Chiozaꞌ goneꞌ c̱hecho zejḻi kaṉi kanaꞌ blalj xc̱heneꞌnaꞌ naꞌ witeꞌ.
21 Naꞌ Chiozaꞌkzə gonshgueꞌ ka gak gonle doloḻ dii wennaꞌ ka cheenileꞌ gonle, naꞌ gonshgueꞌ ka gaklen Jesucrístonaꞌ leꞌ gakle ka chazlallee. ¡Shoꞌshgueꞌ balaaṉ zejḻi kaṉi! Kaꞌ gakan.
22 Chatꞌyoidꞌ leꞌ beṉꞌ bishꞌ naꞌ leꞌ beṉꞌ zanꞌ, ḻi koo yic̱hjle diiki chṉabidꞌ leꞌ gonle, diiki to c̱hop choꞌa ba bzejꞌ.
23 Naꞌ cheenidꞌ iṉezile ba bichej beṉꞌ bishꞌcho Timotewaꞌ lillyanaꞌ, naꞌ shi ba wdaileꞌ yideꞌ ni, naꞌ wc̱hiꞌaneꞌ yidwiantoꞌ leꞌ.
24 Ḻi wwap chiox yogꞌ beṉꞌkaꞌ chliꞌ chsedi leꞌ naꞌ yogꞌ beṉꞌkaꞌ nakle txen nakle lallꞌ naꞌ Chiozaꞌ. Naꞌ beṉꞌ Itáliaki nakcho txen chwapgakeꞌ leꞌ chiox.
25 Chiozaꞌ gaklenshgueꞌ yogꞌḻoḻ-le.