Kart nech daa bzej Pédronaꞌ
1
Nadꞌ Pedro nakꞌ postl c̱he Jesucrístonaꞌ, chzejꞌ leꞌ, ka leꞌ ba wlej Chiozaꞌ gakle lallꞌ nee naꞌ neslesle zoale do Póntonaꞌ, Galácianaꞌ, Capadócianaꞌ, Ásianaꞌ naꞌ Bitínianaꞌ, ganaꞌ bi naki lall-le.
2 Kon ka wloꞌe xṉezin goneꞌ c̱hele kaniꞌteyi, X̱acho Chiozaꞌ ba wlejeꞌ leꞌ naꞌ Espíritu c̱heꞌnaꞌ ba bikobeꞌ yic̱hjlallꞌdoꞌlenaꞌ kwenc̱he soale wzenagle c̱he Jesucrístonaꞌ naꞌ gakle beṉꞌ nxi nyech ni c̱he xc̱heneꞌnaꞌ daa bix̱is biyib leꞌ. Chiozaꞌ gaklenshgueꞌ leꞌ dii xen wal naꞌ gonshgueꞌ ka soale mbalaz inlleb.
3 Weꞌlaꞌocho Chiozaꞌ, X̱a X̱ancho Jesucrístonaꞌ. Daa ba biyeshꞌlallileꞌ choꞌ, ba beṉeꞌ sto yeḻꞌ mban kob c̱hecho daa bisbaneꞌ Jesucrístonaꞌ ladj beṉꞌ wetkaꞌ, naꞌ soacho gonchon lez toshiizi.
4 Naꞌ ikaacho daa ba ngooshawee yabanaꞌ daa biga kwiayiꞌ, naꞌ daa bibi ndaꞌ nchen, naꞌ daa biga te c̱he yeḻꞌ mba c̱heyinnaꞌ.
5 Daa nonḻilallꞌcho Chiozaꞌ ḻekzeꞌ wkwashꞌ wkweejleneꞌ choꞌ yeḻꞌ wak c̱heꞌnaꞌ kwenc̱he idoḻꞌ illonicho yeḻꞌ mbannaꞌ daa ba nakten goṉeꞌ choꞌ katꞌ illin lla te c̱he yell-lioni.
6 Naꞌ ni c̱heyi dgan chiba chizakile, ḻaꞌkzi llaki ṉaa wde wdeli dii chdiḻ chllagle tolde.
7 Ka nak oraꞌ, chiyaḻꞌ ten lo yiꞌnaꞌ kwenc̱he wliꞌlawin shi nakan dowalj. Kaꞌkzan leꞌ, katꞌ chtiḻ-le yeḻꞌ zakꞌziꞌkaꞌ chliꞌlawin shi dowaljkzan ba nonḻilallꞌle Jesucrístonaꞌ. Naꞌ daa nonḻilallꞌleneꞌ zakꞌchan ka oraꞌ, ḻaꞌ oraꞌ wllin lla kwiayiꞌn. Per leꞌ zoac̱hec̱hle nonḻilallꞌle Jesucrístonaꞌ, katꞌ ba biyoll wdele lo yeḻꞌ zakꞌziꞌkaꞌ, naꞌ shajlaꞌole naꞌ shoꞌle to balaaṉ xen katꞌ yiyedeꞌ.
8 Ḻaꞌkzi biṉꞌ ileꞌileneꞌ, ḻe chakileneꞌ. Naꞌ ḻaꞌkzi bi chleꞌileneꞌ ṉaa, chajḻeꞌle c̱heꞌ naꞌ dii xen wal chiba chizakile ax̱t bichkz bi dillꞌ chillelile weꞌle c̱heyin,
9 daa ba ṉezile gatꞌ yeḻꞌ mban c̱hele zejḻi kaṉi daa nonḻilallꞌleneꞌ.
10 Dii beṉꞌkaꞌ wdix̱jee daa goll Chiozaꞌ ḻegakeꞌ kaniꞌyi, beꞌgakeꞌ dillꞌ ka nak yeḻꞌ chiyeshꞌlalli c̱heꞌnaꞌ. Naꞌ biyiljyollgakeꞌ daa golleꞌ ḻegakeꞌ kwenc̱he shajniꞌgakileꞌ nakan goneꞌ yisleꞌ choꞌ naꞌ goṉeꞌ yeḻꞌ mban c̱hecho zejḻi kaṉi.
11 Naꞌ Espíritu c̱he Crístonaꞌkzan beꞌleneꞌ ḻegakeꞌ dillꞌ c̱he yeḻꞌ zakꞌziꞌkaꞌ ileꞌileꞌ naꞌ c̱he balaaṉ xennaꞌ daa shoꞌe ka yiyoll tieꞌ yeḻꞌ zakꞌziꞌkaꞌ. Naꞌ goklallꞌgakeꞌ iṉezgakileꞌ nakan gak yideꞌ naꞌ bi lla bi goranꞌ gak dga.
12 Naꞌ Chiozaꞌ bzajniileꞌ ḻegakeꞌ nan aga ḻegakenꞌ yen ileꞌgakileꞌ diikaꞌ beꞌgakeꞌ xtilliin, san lenꞌ yen ileꞌilen. Naꞌ ḻennanꞌ dillꞌ wen dillꞌ kob c̱he Crístonaꞌ daa benile ka beꞌlen beṉꞌkaꞌ leꞌ dillꞌ kon yeḻꞌ wak c̱he Espíritu Sántonaꞌ, beenaꞌ bseḻꞌ Chiozaꞌ. Naꞌ ax̱t anjlkaꞌ cheengakileꞌ iṉezchgakileꞌ c̱heyi diiki.
13 Naꞌ ni c̱he daa ba ben Chiozaꞌ c̱hele, chiyaḻꞌ se kwasle naꞌ gakle beṉꞌ nyeeṉ nyeeniyi. Ḻi gonyeṉꞌ lez dii wennaꞌ goṉ Chiozaꞌ leꞌ katꞌ yiyed Jesucrístonaꞌ.
14 Daa nakle xiiṉ Chiozaꞌ naꞌ chzoale xtilleenaꞌ, bich chiyaḻꞌ gonle dii malaꞌ wzelallꞌle kanaꞌ biṉꞌ gombiaꞌleneꞌ.
15 San chiyaḻꞌ soale gakle dowalj beṉꞌ ḻi beṉꞌ shaoꞌ. Ḻaꞌ Chiozaꞌ, beenaꞌ gox wṉabeꞌ leꞌ, nakeꞌ dowalj beṉꞌ ḻi beṉꞌ shaoꞌ.
16 Ḻaꞌ Choꞌa Xtilleenaꞌ nan: “Ḻi gak dowalj beṉꞌ ḻi beṉꞌ shaoꞌ, ka nadꞌ nakꞌ dowalj beṉꞌ ḻi beṉꞌ shaoꞌ.”
17 Daa cheꞌle “X̱a”, beenaꞌ chc̱hoglo c̱he beṉꞌ kon ka chidoḻꞌ to toeꞌ, chiyaḻꞌ gall illebleneꞌ shlak zoale yell-lioni gani nakle ka beṉꞌ zitꞌ.
18 Chiozaꞌ ba bisleꞌ leꞌ lo yeḻꞌ mban daa bi nxe bi nzakꞌ daa bkwaaṉlen dii x̱ozxtoꞌlekaꞌ leꞌ. Naꞌ ṉezile daa bisleꞌ leꞌ aga wdixjileꞌn or wa plat, diikaꞌ chbiayiꞌ,
19 san xc̱hen Crístonaꞌ daa zakꞌchgayi, ḻennanꞌ biyaꞌo biziileꞌ leꞌ kanaꞌ betgakeꞌneꞌ ka to xilꞌdoꞌ ba bibi ndaꞌ nchen.
20 Kanaꞌ ziꞌ x̱e silte yell-lioni, Chiozaꞌ wlejeꞌ Crístonaꞌ sakꞌziꞌe. Naꞌ ṉaa ba zoa te c̱he yell-lioni ba bideꞌ ni c̱hecho.
21 Naꞌ ni c̱he Crístonanꞌ ba nonḻilallꞌle Chiozaꞌ, beenaꞌ bisbaneꞌneꞌ ladj beṉꞌ wetkaꞌ naꞌ wloꞌeneꞌ balaaṉ xen. Daan, ba chonḻilallꞌle Chiozaꞌ naꞌ ba nonleneꞌ lez.
22 Naꞌ leꞌ ṉaa, daa ba chonle ka na dillꞌ ḻi c̱he Chiozaꞌ ba bixi biyechle, naꞌ do lallꞌle chaki ljwell-le. Naꞌ chiyaḻꞌ gakchi ljwell-le do yic̱hj do lallꞌle ax̱t ga zeelo.
23 Ḻaꞌ nakle ka beṉꞌ ba golj dii yoblə, per aga de beli chen daa chde c̱heyi, san Chiozaꞌ ba bikobeꞌ yeḻꞌ mban c̱helenaꞌ daa wyajḻeꞌle choꞌa xtilleenaꞌ daa nsaꞌ yeḻꞌ mban naꞌ biga te c̱heyin.
24 Choꞌa Xtillꞌ Chiozaꞌ nan:
Yogꞌḻoḻ beṉꞌ yell-lioki nakgakeꞌ ka yix̱aa,
naꞌ balaaṉ c̱heꞌkaꞌ nakan ka yejkaꞌ ze lyix̱aa.
Yix̱aa chbillan naꞌ chllib yejdoꞌ c̱heyinnaꞌ,
25 san choꞌa xtillꞌ Chiozaꞌ zejḻi kaṉi den, naꞌ biga te c̱heyin.
Naꞌ ḻennanꞌ dillꞌ wen dillꞌ kobaꞌ daa ba wdix̱jeꞌgakileꞌ leꞌ.