Kart wchopi daa bzej Pédronaꞌ
1
Nadꞌ Pedro, nakꞌ wen llin c̱he Jesucrístonaꞌ naꞌ nakꞌ postl c̱heꞌ. Chzejꞌ leꞌ, ka leꞌ ba nonḻilallꞌcho Jesucrístonaꞌ, beenaꞌ nak Chios c̱hecho naꞌ ba beṉeꞌ choꞌ yeḻꞌ mban zejḻi kaṉi daa nakeꞌ beṉꞌ ḻi beṉꞌ shaoꞌ. Naꞌ daa nonḻilallꞌchoneꞌ nakan to dii zakii.
2 Gaklenshga Chiozaꞌ leꞌ naꞌ goneꞌ ka soale mbalaz inlleb daa ba nombiaꞌleneꞌ naꞌ nombiaꞌtele X̱ancho Jesúzaꞌ.
3 Kon yeḻꞌ wak c̱heꞌnaꞌ ba noṉeꞌ choꞌ yogꞌḻoḻ daa chyalljicho kwenc̱he soacho goncho ka cheenileꞌ daa nombiaꞌchoneꞌ, naꞌ lo yeḻꞌ beṉꞌ wen c̱heꞌnaꞌ, daa nak dii xen inlleb, gox wṉabeꞌ choꞌ.
4 Naꞌ daa nakeꞌ beṉꞌ wen inlleban, bc̱hebeꞌ goneꞌ ka gakle beṉꞌ wen ka nakeꞌ ḻeꞌ, naꞌ yilale lao daa chx̱iṉj chḻenan beṉꞌ yell-lioni daa chongakeꞌ daa nazan c̱hegakeꞌ. Naꞌ daa bc̱hebeꞌ goneꞌ c̱hecho nakan dii wen inlleb naꞌ dii xen zakaꞌn.
5 Daan, leꞌ ba chonḻilallꞌleneꞌ chiyaḻꞌ gonle ka dii le kwenc̱he gonle wen, naꞌ gapchle yeḻꞌ sinꞌ,
6 naꞌ iṉabiaꞌ kwinle, naꞌ gaple yeḻꞌ chxenlallꞌ katꞌ bi chak c̱hele, naꞌ gonle ka cheenileꞌ,
7 naꞌ ileꞌshii ljwell-le naꞌ gakile yogꞌ beṉꞌ.
8 Shi zizikchli gonle yogꞌ diiki, gonan ka gakbiaꞌ lo yeḻꞌ mban c̱helenaꞌ bi bembiaꞌdadzle X̱ancho Jesucrístonaꞌ.
9 Per beenaꞌ bi chon diiki, nakeꞌ beṉꞌ bi nteyi daa ba goḻ-lallee ba bixi biyech saaxya c̱heꞌnaꞌ beneꞌ.
10 Daan, leꞌ beṉꞌ bishꞌdawaa naꞌ leꞌ beṉꞌ zandawaa, daa ba gox wṉab Chiozaꞌ leꞌ, ḻi gon ka dii le soac̱hec̱hle gonle diiki. Ḻaꞌ katꞌ ba chonle diiki bibi de wchix̱an leꞌ,
11 naꞌ ḻe shajlaꞌole katꞌ yillinle ganaꞌ chṉabiaꞌ X̱ancho Jesucrístonaꞌ, beenaꞌ bisleꞌ choꞌ.
12 Daan, toshiizi yisaa lallꞌle diiki, ḻaꞌkzi ba ṉezilen naꞌ ba zoac̱hec̱hle chajḻeꞌle dillꞌ ḻi c̱he Chiozaꞌ daa ba nombiaꞌle.
13 Shlak ni mbanꞌ, chakidꞌ chiyaḻꞌ yisaa lallꞌle diiki,
14 ḻaꞌ ṉezidꞌ ba zoa gaoshosh guetꞌ kon ka ba wna X̱ancho Jesucrístonaꞌ gak c̱haꞌ.
15 Naꞌ gontekzꞌ to dii byen weꞌlenꞌ leꞌ dillꞌ ṉaa ni mbanꞌ kwenc̱he ḻekzkaꞌ katꞌ ba witꞌ lljadinileꞌ diiki ba wniaꞌ leꞌ.
16 Diikaꞌ ba bliꞌ bsedintoꞌ leꞌ c̱he yeḻꞌ wak c̱he X̱ancho Jesucrístonaꞌ naꞌ c̱heyi daa yiyedeꞌ, aga nakan dii biyiljlallꞌzə beṉꞌ, san c̱hopshosh jalaontoꞌkin bleꞌintoꞌ yeḻꞌ beṉꞌ choo beṉꞌ xen c̱heꞌnaꞌ.
17 Bleꞌintoꞌ ka wloo X̱acho Chiozaꞌneꞌ balaaṉ len yeḻꞌ chey cheeniꞌ c̱heꞌnaꞌ ka wṉieꞌ yabanaꞌ ganaꞌ nak ḻiizelozi mbalaz, naꞌ wneꞌ: “Beenin xiiṉaa, ḻe chakidee naꞌ chazlallꞌchgaidꞌ ka choneꞌ.”
18 Netonꞌ zelenntoꞌneꞌ lo yaa c̱he Chiozaꞌ naꞌ kwinntonꞌ benintoꞌ shii Chiozaꞌ ka wṉieꞌ yabanaꞌte.
19 Naꞌ daa bleꞌintoꞌ dga, bichop choꞌa dillꞌ daa bzej dii beṉꞌkaꞌ wdix̱jee daa goll Chiozaꞌ ḻegakeꞌ kaniꞌyi. Naꞌ leꞌ, chiyaḻꞌ sele wṉeyi xtilleekaꞌ, daa nakan ka to yiꞌ daa chzeeniꞌ ga nak shgasj shc̱hoḻ, ax̱t ki illin lla yiyed Jesucrístonaꞌ, beenaꞌ chzaklebi belj xsilaꞌ, naꞌ koocheꞌ beeniꞌ c̱heꞌnaꞌ ḻoo yic̱hjlallꞌdoꞌlekaꞌ.
20 Naꞌ dii llialote shajniile dga: ni to choꞌa dillꞌkaꞌ bzej dii beṉꞌkaꞌ wdix̱jee daa goll Chiozaꞌ ḻegakeꞌ kaniꞌyi bi nakan dii wdiljlallꞌzgakeꞌ.
21 Ḻaꞌ dii beṉꞌkaꞌ wdix̱jee daa goll Chiozaꞌ ḻegakeꞌ kaniꞌyi, biga wṉegakeꞌ tobiaꞌlallꞌzgakeꞌ, san Espíritu Sántonanꞌ bzajniileꞌ ḻegakeꞌ kwenc̱he beꞌgakeꞌ xtillꞌ Chiozaꞌ.