5
Leꞌ ngoo lo naꞌle bishꞌ ljwellchokaꞌ nonḻilallꞌ Crístonaꞌ, ḻekzkaꞌ nadꞌ nḻanꞌ ka daa nḻanle, naꞌ bleꞌteidꞌ ka wxakꞌziꞌ Crístonaꞌ, naꞌ lenꞌ chidoḻaa ikaa balaaṉ xennaꞌ katꞌ yilee. Daan, chatꞌyoidꞌ leꞌ:
2 Gap wwiale beṉꞌkaꞌ ba nonḻilallꞌ Chiozaꞌ, beṉꞌkaꞌ ba noneꞌ lallꞌ naꞌle. Ḻi gonan ḻega beṉꞌ chibayi gon ka chazlallꞌ Chiozaꞌ. Naꞌ aga gonyaadiazlen, ni bi gonle lez gaxjle dii xen, san ḻi gonan do yic̱hj do lallꞌle.
3 Naꞌ bi gonzle ka chṉabiaꞌtegal lao beṉꞌkaꞌ nak lallꞌ naꞌle, san chiyaḻꞌ wliꞌle chonle wen laweꞌkaꞌ.
4 Naꞌ katꞌ yilaꞌ Jesucrístonaꞌ, beenaꞌ chṉabiaꞌ yogꞌḻoḻ beṉꞌkaꞌ chap chwia beṉꞌkaꞌ nonḻilallꞌgakeꞌneꞌ, naꞌ goṉeꞌ leꞌ to balaaṉ xen daa biga te c̱heyin.
5 Naꞌ ḻekzkaꞌ leꞌ biꞌ xkwidꞌ, wḻex̱j yic̱hjle lao beṉꞌ golkaꞌ. Naꞌ yogꞌḻoḻ-le chiyaḻꞌ wḻex̱j yic̱hjle lao ljwell-le ganga, naꞌ gakle beṉꞌ gax̱jlallꞌ, ḻaꞌ:
Chiozaꞌ bi chleꞌshiileꞌ beṉꞌkaꞌ chep chaꞌlallꞌ,
san chakleneꞌ beṉꞌkaꞌ nak gax̱jlallꞌ.
6 Ḻi gak beṉꞌ gax̱jlallꞌ lao Chiozaꞌ, beenaꞌ nap yeḻꞌ wak choo yeḻꞌ wak xen, kwenc̱he kwee leꞌ balaaṉ katꞌ illin llanaꞌ.
7 Ḻi gon lallꞌ naꞌ Chiozaꞌ yogꞌḻoḻ dii chak c̱hele, ḻaꞌ ḻeꞌ zieꞌ wṉeyi c̱hele.
8 Ḻi gakto beṉꞌ nyeeṉ nyeeniyi naꞌ ḻi se kwas. Ḻaꞌ dii x̱iwaa daa chakziꞌ chakzbani choꞌ chdan ka to bell zṉia, ba chbiḻ chdon, naꞌ chyiljan no wlliayiꞌn.
9 Ḻi soatip ḻi soashosh gonḻilallꞌle Crístonaꞌ naꞌ bi weꞌzle latj c̱he dii x̱iwaa, ḻaꞌ ṉezkzileꞌ doxenzə yell-lioni yogꞌḻoḻ beṉꞌkaꞌ nakcho txen ba chleꞌgakileꞌ yeḻꞌ zakꞌziꞌkaꞌ ka diikaꞌ chen chleꞌile.
10 Naꞌ ka ba biyoll wdele yeḻꞌ zakꞌziꞌkaꞌ shloll, Chiozaꞌ, beenaꞌ nap yeḻꞌ chiyeshꞌlallꞌ xen, yiyoneꞌ leꞌ ka chazlallee naꞌ goneꞌ ka gakchachle naꞌ yizoatip yizoashosheꞌ leꞌ. Ḻaꞌ ḻekzenꞌ gox wṉabeꞌ choꞌ kwenc̱he yidoḻꞌcho balaaṉ xen c̱heꞌnaꞌ daa bi te c̱heyin daa nakcho Crístonaꞌ txen.
11 Ḻenꞌ chidoḻee shoꞌe balaaṉnaꞌ naꞌ iṉabiꞌe zejḻi kaṉi. Kanꞌ nakan.
12 Beṉꞌ bishꞌcho Silvánoni, beeni ṉezidꞌ zoatip zoashosheꞌ nonḻilallee Crístonaꞌ, gokleneꞌ nadꞌ bzejꞌ leꞌ to c̱hop choꞌa dillꞌ kwenc̱he wtipꞌ lallꞌle. Naꞌ dga niaꞌ leꞌ chliꞌn dii ḻicha chaki Chiozaꞌ choꞌ. Ḻi soatip ḻi soashosh lo yeḻꞌ chaki c̱heꞌnaꞌ.
13 Beṉꞌki nonḻilallꞌ Crístonaꞌ yell Babilóniani, beṉꞌki ba gox wṉab Chiozaꞌ ka gox wṉabeꞌ leꞌ, naꞌ ḻekzkaꞌ Márconi, biꞌni nak ka dowalj biꞌ c̱haꞌ, chwapgakeꞌ leꞌ chiox.
14 Ḻi wwap chiox ljwell-le ḻega beṉꞌ chaki ljwellin.
Soashgale mbalaz yogꞌḻoḻ-le leꞌ nakle Crístonaꞌ txen.