4
Naꞌ kon ka gok c̱he Crístonaꞌ wxakꞌziꞌleneꞌ beli chen c̱heꞌnaꞌ, kaꞌkzan chiyaḻꞌ izani kwinle. Ḻaꞌ beenaꞌ ba wxakꞌziꞌ beli chen c̱heꞌnaꞌ bich chṉabiaꞌ saaxyanaꞌ ḻeꞌ.
2 Naꞌ bich gonzeꞌ daa nazan c̱he beli chen c̱heꞌnaꞌ shlak ni mbaneꞌ, san goneꞌ ka cheeni Chiozaꞌ.
3 Ba gok to kaꞌtꞌ chonle txen beṉꞌkaꞌ biṉꞌ gombiaꞌ Chiozaꞌ, choeꞌgakeꞌ choꞌa xbayi beli chen c̱heꞌkaꞌ, chongakeꞌ kon daa nazan c̱hegakeꞌ, chzoll chnitgakileꞌ, chaox̱atgakeꞌ, biz c̱hegakeꞌ chon, naꞌ choeꞌlaꞌogakeꞌ no yaj yag, diikaꞌ chakzbani Chiozaꞌ.
4 Naꞌ dii xen chakllejgakileꞌ ṉaa daa bich chonle ḻegakeꞌ txen lawi diikaꞌ bi yejniꞌalallii, naꞌ chiya dii chon chnagakeꞌ c̱hele.
5 Per wllin lla yidegakeꞌ kwent lao beenaꞌ ba ze kwas wc̱hogloeꞌ c̱he yogꞌḻoḻ beṉꞌ, ka beṉꞌ ni mban ka beṉꞌ ba wit.
6 Daan, beṉꞌkaꞌ bengakileꞌ dillꞌ wen dillꞌ kob c̱he Chiozaꞌ naꞌ wyajḻeꞌgakeꞌn, ḻaꞌkzi witgakeꞌ ka ba nchogbiaꞌ gak c̱he yogꞌ beṉꞌ yell-lio, ni mbankzgakeꞌ lao Chiozaꞌ.
7 Daa ba zoa gao kwiayiꞌ yogꞌḻoḻte dii de, chiyaḻꞌ gakle beṉꞌ nyeeṉ nyeeniyi naꞌ sele wṉeyi weꞌḻwill-le Chiozaꞌ.
8 Naꞌ dii llialote, gaki ljwell-le, ḻaꞌ beenaꞌ nap yeḻꞌ chakinaꞌ chonxenlallee kaꞌkꞌtezə dii choni beṉꞌ ḻeꞌ.
9 Ḻi wleb ljwell-le ḻoo yoo lill-le do lallꞌle.
10 To tole chiyaḻꞌ wgonle llin wde wdeli diikaꞌ noṉ Chiozaꞌ gak gonle kwenc̱he kon ga chyalljan wc̱hinlen gaklenle beṉꞌ yoblə.
11 Beenaꞌ naki c̱heꞌ wiꞌe choꞌa xtillꞌ Chiozaꞌ, chiyaḻꞌ iṉeꞌ kon ka nan. Naꞌ beenaꞌ naki c̱heꞌ gakleneꞌ goneꞌ to llin, chiyaḻꞌ wc̱hineꞌ doxente fuerzaꞌ beꞌ Chiozaꞌ ḻeꞌ. Naꞌ yogꞌḻoḻ daa gonle, ḻi gonan kwenc̱he shajlaꞌo Chiozaꞌ daa nakle Jesucrístonaꞌ txen. Ḻaꞌ ḻeꞌ chidoḻee shoꞌe balaaṉ naꞌ iṉabiꞌe zejḻi kaṉi. Kanꞌ nakan.
12 Leꞌ beṉꞌ bishꞌdawaa naꞌ leꞌ beṉꞌ zandawaa, bi gakllejile naꞌ yibanzile daa chleꞌile yeḻꞌ zakꞌziꞌkaꞌ, ḻaꞌ bi nakan ka dii yibanicho.
13 San ḻi yibayi daa lenle chzakꞌziꞌle ka diikaꞌ wxakꞌziꞌ Crístonaꞌ, kwenc̱he ḻekzkaꞌ yiba yizakile katꞌ ileꞌile zizaꞌleneꞌ balaaṉ xen c̱heꞌnaꞌ.
14 Chakomba leꞌ shi no iṉe zban c̱hele daa nakle Crístonaꞌ txen, ḻaꞌ Espíritunaꞌ, beenaꞌ nak beṉꞌ choo beṉꞌ xen c̱he Chiozaꞌ, zoaleneꞌ leꞌ.
15 Shi nole chzakꞌziꞌle, wenlan sakꞌziꞌle daa chonle dii wennaꞌ aga ka daa sakꞌziꞌle daa nakle wen xya, wa jḻanle, wa benle bichlə dii mal, wa jalalli c̱hele ga bi chak c̱he beṉꞌ.
16 Naꞌ shi chzakꞌziꞌle daa nakle Crístonaꞌ txen, bi chiyaḻꞌ yiyii yidoꞌile, san ḻi weꞌlaꞌo Chiozaꞌ daa nakleneꞌ txen.
17 Ba bllin lla solo gon Chiozaꞌ yeḻꞌ josc̱his c̱he beṉꞌkaꞌ nonḻilallꞌgakeꞌneꞌ. Naꞌ shi solon ladjchoni, ¿nakla gak c̱he beṉꞌkaꞌ bi chzenag dillꞌ wen dillꞌ kob c̱he Chiozaꞌ, lla?
18 Naꞌ shi beṉꞌkaꞌ zej shḻi dii zan dii chen chleꞌgakileꞌ naꞌ ax̱t kayaadia yilagakeꞌ lawinkaꞌ, ¿alechli ki gak c̱he beṉꞌkaꞌ bi chall chlleb Chiozaꞌ naꞌ beṉꞌ saaxyakaꞌ?
19 Naꞌ beṉꞌkaꞌ chzakꞌziꞌ kon ka nllia Chiozaꞌ biaꞌ gak c̱hegakeꞌ, toshiizi chiyaḻꞌ gongakeꞌ dii wennaꞌ naꞌ gon kwingakeꞌ lallꞌ naꞌ Chiozaꞌ, beenaꞌ bx̱e bsileꞌ ḻegakeꞌ, naꞌ gakleneꞌ ḻegakeꞌ ka bc̱hebeꞌ goneꞌ.