3
Leꞌ noolə zoa beṉꞌ c̱hele, ḻi wḻex̱j yic̱hjle laweꞌkaꞌ kwenc̱he shi bi chajḻeꞌgakeꞌ choꞌa xtillꞌ Chiozaꞌ, gakbeꞌgakileꞌ nakan dii wen ka ileꞌgakileꞌ nsaꞌ c̱hele wen. Naꞌ aga c̱hini gatꞌyoile ḻegakeꞌ shajḻeꞌgakeꞌ c̱heyin,
2 san daa wwiazgakeꞌ chonle wen ḻega beṉꞌ chall chlleb Chios shajḻeꞌgakeꞌ.
3 Bitek sele wṉeyi naklə gon kwinle xochi: ka no naklə yipaa yic̱hjle, naꞌ wc̱hinzle no bga no niy de or, wa gakwle lechꞌ dii zakii nlleb. Ḻaꞌ aga diikin dii llialote.
4 San dii llialote gakshaoꞌ ḻoo yic̱hjlallꞌdoꞌlenaꞌ kwenc̱he gakle beṉꞌ gax̱jlallꞌ naꞌ beṉꞌ lallꞌdoꞌ xen, ḻaꞌ ḻennanꞌ nakan yeḻꞌ xochi dii bi te c̱heyin naꞌ zakꞌchgayin lao Chiozaꞌ.
5 Ḻaꞌ kanꞌ ben noolkaꞌ kaniꞌyi, beṉꞌkaꞌ gok beṉꞌ ḻi beṉꞌ shaoꞌ. Bx̱enilallꞌgakeꞌ Chiozaꞌ naꞌ bḻex̱j yic̱hjeꞌkaꞌ bzenaggakeꞌ c̱he beṉꞌ c̱heꞌkaꞌ.
6 Ka ben dii Sáranaꞌ, bzoeꞌ xtillꞌ dii beṉꞌ c̱heꞌ, Abrahamaꞌ, naꞌ golleꞌneꞌ “x̱anꞌ”. Naꞌ leꞌ nakle dia c̱heꞌ shi gonle wen ka beneꞌ naꞌ bi illeble bi gak c̱hele.
7 Naꞌ ka leꞌ beṉꞌ byo, ḻi goni xool-ḻekaꞌ wen. Ḻi gapshiigakeꞌ daa bi nakgakeꞌ c̱hec̱h ka choꞌ beṉꞌ byo, naꞌ daa ṉezile lengakenꞌ chidoḻꞌ ikaa yeḻꞌ mbannaꞌ daa goṉ Chiozaꞌ c̱hele. Ḻi gon dga kwenc̱he bibi wsej wllonan wzenag Chiozaꞌ c̱hele katꞌ choeꞌḻwill-leneꞌ.
8 Naꞌ sto dii niaꞌ leꞌ, yogꞌḻoḻtele chiyaḻꞌ soalen ljwell-le wen, naꞌ gakle beṉꞌ lallꞌdoꞌ yeshꞌ, naꞌ gaki ljwell-le ka chakileꞌ to beṉꞌ bishꞌ goljle. Ḻi yiyeshꞌlallii beṉꞌ, naꞌ ḻi gak beṉꞌ gax̱jlallꞌ.
9 Bi yiziꞌzle wzon c̱he beenaꞌ chon mal c̱hele wa beenaꞌ chbell chṉe c̱hele. San ḻi iṉabi Chiozaꞌ gak wen c̱heꞌ, daa ṉezile gox wṉabeꞌ leꞌ kwenc̱he gak wen c̱hele.
10 Ḻaꞌ:
Beenaꞌ cheeni idieꞌ lo yell-lioni naꞌ gakte wen c̱heꞌ,
chiyaḻꞌ wsakee kwell iṉieꞌ,
naꞌ bi wiꞌe latj ichej dillꞌ wxiyeꞌ choꞌa ḻolleenaꞌ.
11 Chiyaḻꞌ yiḻaalawee dii malaꞌ, naꞌ goneꞌ daa nak wen.
Chiyaḻꞌ sieꞌ wṉeyi soaleneꞌ beṉꞌ mbalaz.
12 Ḻaꞌ X̱ancho Chiozaꞌ chap chwieꞌ beṉꞌkaꞌ nak beṉꞌ ḻi beṉꞌ shaoꞌ,
naꞌ chzenagueꞌ katꞌ chṉabgakeꞌ yeḻꞌ goklen c̱heꞌnaꞌ,
per bi chleꞌshiileꞌ beṉꞌkaꞌ chon mal.
13 Aga no bi goni leꞌ shi toshiizi zele chonle dii wennaꞌ.
14 Per shi yeḻꞌ chon wen c̱helenaꞌ wtiḻꞌle yeḻꞌ zakꞌziꞌkaꞌ, chakomba leꞌ. Naꞌ bi gall illebzle bi goni beṉꞌ leꞌ, naꞌ bi gakshejlallꞌle.
15 San do yic̱hj do lallꞌle ḻi koo Crístonaꞌ balaaṉ, beenaꞌ nak X̱ancho. Naꞌ toshiizi ḻi se wṉeyi c̱he dillꞌkaꞌ yilliile lao nottezə beṉꞌ iṉabileꞌ leꞌ c̱heyi daa ba nonle lez. Naꞌ xochi ḻi weꞌlengakeꞌ dillꞌ.
16 Naꞌ ḻi gon daa ṉezile nak wen daa nakle Crístonaꞌ txen, kwenc̱he beṉꞌkaꞌ naz c̱hele bi chonle wen siꞌgakeꞌ yeḻꞌ ztoꞌ.
17 Wenchlan sakꞌziꞌcho daa choncho wen, shi kaꞌ cheeni Chiozaꞌ, aga ka daa sakꞌziꞌcho daa choncho mal.
18 Ḻaꞌ shlin shlax̱jzan wxakꞌziꞌ Crístonaꞌ ni c̱he saaxya c̱hechokaꞌ. Aga bi xtoḻee gotꞌ, per wxakꞌziꞌe ni c̱hecho choꞌ beṉꞌ mal, kwenc̱he bizoalencho Chiozaꞌ wen. Ḻaꞌkzi beli chen c̱heꞌnaꞌ bleꞌin yeḻꞌ witaꞌ, Espíritu c̱he Chiozaꞌ bisbaneꞌneꞌ ladj beṉꞌ wetkaꞌ.
19 Naꞌ wyajeꞌ latjaꞌ ganaꞌ nej beṉꞌ malkaꞌa jtix̱jeꞌileꞌ ḻegakeꞌ daa beneꞌ gan dii malaꞌ naꞌ yeḻꞌ witaꞌ.
20 Ḻegakenꞌ gokgakeꞌ widenag kanaꞌ wzoa dii Noénaꞌ, naꞌ wdap Chiozaꞌ yeḻꞌ chxenlallꞌ c̱hegakeꞌ shlak ben dii Noénaꞌ barkwaꞌ. Naꞌ x̱onꞌchga beṉꞌkaꞌ wyoo ḻoo barkwaꞌ bi wlliayiꞌgakeꞌ ḻoo nisaꞌ.
21 Naꞌ daa bila beṉꞌkaꞌ ḻoo nisaꞌ kaniꞌyi, zaklebin daa chchoacho nisaꞌ ṉaa. Naꞌ daa chchoacho nisaꞌ aga chix̱is chiyiban kwerp c̱hechoni, san chliꞌn ba wṉabicho Chiozaꞌ yix̱is yiyibeꞌ yic̱hjlallꞌdoꞌchoni kwenc̱he shoꞌ yic̱hjcho bich bi xtoḻꞌcho de. Naꞌ de yeḻꞌ mban c̱hecho zejḻi kaṉi daa biban Jesucrístonaꞌ ladj beṉꞌ wetkaꞌ.
22 Naꞌ biyepeꞌ yabanaꞌ, jachiꞌe shḻaa de shḻi c̱he Chiozaꞌ naꞌ chṉabiꞌe lao anjlkaꞌ naꞌ lao bichlə yeḻꞌ wṉabiaꞌ dii de.