2
Daan, chiyaḻꞌ c̱hooṉlallꞌle yogꞌḻoḻ dii mal, yogꞌḻoḻ de wxiyeꞌ, naꞌ yeḻꞌ xeꞌ, naꞌ yeḻꞌ chbell chṉe c̱he beṉꞌ.
2 Ka chon to bdoꞌ cheeṉdoꞌ chdomꞌ nillaa, kanꞌ chiyaḻꞌ ibiḻ idonle choꞌa xtillꞌ Chiozaꞌ daa nak dowalj, kwenc̱he gaklenan leꞌ gonḻilallꞌchleneꞌ naꞌ idoḻꞌle yeḻꞌ mbannaꞌ daa goṉeꞌ.
3 Ḻaꞌ ba bnix̱ blliatele ka beṉꞌ wen nak X̱anchonaꞌ.
4 Ḻi ibigꞌ lao X̱ancho Crístonaꞌ, beenaꞌ nap yeḻꞌ mban, beenaꞌ zaklebi yajaꞌ daa bi wyoolallii wen yookaꞌ, ḻaꞌkzi lao Chiozaꞌ nakeꞌ to beṉꞌ zakii nlleb naꞌ wlejeꞌneꞌ kwenc̱he goneꞌ ka chazlallee.
5 Naꞌ ḻekzkaꞌ leꞌ, Chiozaꞌ ba beṉeꞌ to yeḻꞌ mban kob c̱hele daa nonḻilallꞌle Crístonaꞌ, naꞌ zaklebile ka yajkaꞌ daa chkwaagakeꞌ ljwellin kwenc̱he gakan to yoo ga shoꞌ Chiozaꞌ balaaṉ. Naꞌ gakle bx̱oz c̱heꞌ, naꞌ Jesucrístonaꞌ gakleneꞌ leꞌ kwenc̱he soale weꞌlaꞌole Chiozaꞌ ka chazlallee.
6 Choꞌa xtillꞌ Chiozaꞌ nan:
Wseḻaa to beṉꞌ yell Siónnaꞌ,
naꞌ zaklebileꞌ yajaꞌ daa mbejlawin dii wlejgakileꞌ kwenc̱he gakan yajaꞌ daa wc̱hejcha yoonaꞌ.
Naꞌ beenaꞌ wx̱enilalleeneꞌ, biga siꞌe yeḻꞌ ztoꞌ.
7 Ka leꞌ ba nonḻilallꞌle beenaꞌ zaklebi yajaꞌ, chakbeꞌile nakeꞌ beṉꞌ zakii. San beṉꞌkaꞌ bi nonḻilallꞌgakeꞌneꞌ chongakeꞌ ka chillini Choꞌa Xtillꞌ Chiozaꞌ daa na:
Yajaꞌ daa bi wyoolallꞌ wen yookaꞌ,
ḻeyeṉꞌlannanꞌ yajaꞌ daa ba nc̱hejcha yoonaꞌ.
8 Naꞌ ḻekzkaꞌ nan:
Zaklebileꞌ to yaj dii chgoo chc̱hewꞌ beṉꞌ naꞌ chchix̱an ḻegakeꞌ.
Chbix̱gakeꞌ daa bi chzenaggakeꞌ choꞌa xtillꞌ Chiozaꞌ, naꞌ kaꞌkzan chiyaḻꞌ gak c̱hegakeꞌ.
9 San leꞌ, nakle beṉꞌ wlej Chiozaꞌ kwenc̱he gonḻilallꞌleneꞌ, naꞌ nakle bx̱oz c̱he beenaꞌ chṉabiaꞌ, naꞌ yell c̱heꞌ, to yell dii biyaꞌo biziꞌe. Naꞌ wlejeꞌ leꞌ kwenc̱he weꞌle dillꞌ ka nak yeḻꞌ wak choo yeḻꞌ wak xen c̱he beenaꞌ bibej leꞌ ganaꞌ nak shgasj shc̱hoḻ kwenc̱he biyoole lo beeniꞌ choo beeniꞌ xen c̱heꞌnaꞌ.
10 Kanaꞌ, bi gokle lallꞌ naꞌ Chiozaꞌ, san ṉaa ba nakle lallꞌ nee. Kanaꞌ, bi biyeshꞌlallii Chiozaꞌ leꞌ, san ṉaa ba chiyeshꞌlallileꞌ leꞌ.
11 Leꞌ beṉꞌ bishꞌdawaa naꞌ leꞌ beṉꞌ zandawaa, daa nakle ka beṉꞌ zitꞌ yell-lioni, chatꞌyoidꞌ leꞌ bi weꞌle latj weꞌ choꞌa xbayi beli chen c̱helenaꞌ daa cheeni iṉabiaꞌ yic̱hjlallꞌdoꞌlenaꞌ.
12 Ḻi wsaꞌ c̱hele wen ladj beṉꞌkaꞌ bi nonḻilallꞌ Chiozaꞌ, kwenc̱he llanaꞌ wc̱hoglo Chiozaꞌ c̱he to to beṉꞌ, gakbeꞌgakileꞌ benle wen naꞌ weꞌlaꞌogakeꞌneꞌ, ḻaꞌkzi ṉaa chṉegakeꞌ c̱hele nan nakle beṉꞌ mal.
13 Daa ba nonḻilallꞌle X̱ancho Jesucrístonaꞌ, chiyaḻꞌ wḻex̱j yic̱hjle lao yogꞌḻoḻ beṉꞌkaꞌ chṉabiaꞌ: ka lao beenaꞌ ḻiizelozi chṉabiaꞌ,
14 naꞌ kaꞌkz lao beṉꞌkaꞌ chseḻee kwenc̱he wdeziꞌgakeꞌ beṉꞌkaꞌ chon dii malaꞌ naꞌ kwee balaaṉ beṉꞌkaꞌ chon wen.
15 Chiozaꞌ cheenileꞌ gonle wen kwenc̱he idap choꞌa beṉꞌkaꞌ biz chon chna c̱hele, beṉꞌkaꞌ bi nteyi ni bi chajniꞌgakileꞌ.
16 Ḻi soato ḻega beṉꞌ ba biyell bilaꞌ, naꞌ aga ni c̱he ba biyell bilaꞌle naꞌ gonle kon daa nan c̱hele. Ḻi soato ḻega beṉꞌ chon ka cheeni Chiozaꞌ.
17 Ḻi gap balaaṉ yogꞌḻoḻ beṉꞌ. Ḻi gaki bishꞌ ljwell-lekaꞌ. Ḻi gall illeb Chiozaꞌ. Naꞌ ḻi gap balaaṉ beṉꞌ wṉabiaꞌnaꞌ.
18 Ka leꞌ chonle xshin beṉꞌ, ḻi wḻex̱j yic̱hjle lao x̱anlekaꞌ do yic̱hj do lallꞌle. Aga to beṉꞌkaꞌ chonzi leꞌ wen gonile kaꞌ, san kaꞌkzə ḻi goni beṉꞌkaꞌ chsakꞌziꞌ leꞌ.
19 Ḻaꞌ wenan no gon banez katꞌ no chsakꞌziꞌ ḻeꞌ ḻaꞌkzi bibi doḻꞌ napeꞌ daa ba ngoo yic̱hjeꞌ daa cheeni Chiozaꞌ.
20 Per shi leꞌ chzakꞌziꞌle ni c̱he to dii mal dii benle, bibi zakiin lao Chiozaꞌ gonlen banez. San shi chzakꞌziꞌle ni c̱he dii wennaꞌ chonle naꞌ chonlen banez, ḻennanꞌ zakii lao Chiozaꞌ.
21 Kwenc̱he gonle dgan gox wṉab Chiozaꞌ leꞌ. Ḻaꞌ Crístonaꞌ wxakꞌziꞌe ni c̱hele naꞌ bliileꞌ leꞌ nakan chiyaḻꞌ gonle.
22 Aga bi saaxya ben Crístonaꞌ, ni bibi dillꞌ wxiyeꞌ biꞌe.
23 Kanaꞌ biz ben wnagakeꞌ c̱heꞌ, bi biyec̱hj bibiꞌe, naꞌ ka bsakꞌziꞌgakeꞌneꞌ bi bwall bshebeꞌ ḻegakeꞌ, san ben kwineꞌ lallꞌ naꞌ Chiozaꞌ, beenaꞌ chc̱hoglo c̱he beṉꞌ ka chiyaḻꞌ.
24 Crístonaꞌ biyoni c̱heꞌ saaxya c̱hechokaꞌ ka witeꞌ ḻee yag cruzaꞌ kwenc̱he bich goncho txen saaxyanaꞌ, san soacho goncho ka cheeni Chiozaꞌ. Naꞌ daa wxakꞌziꞌen, zoale shiꞌa shaoꞌ.
25 Kaniꞌyi wdale ka xilꞌdoꞌ ba wnit. Per ṉaa ba nakle lallꞌ naꞌ Crístonaꞌ, beenaꞌ chap chwia leꞌ ka beṉꞌ chap chwia xilꞌ c̱heyin, naꞌ zieꞌ wṉeyi c̱hele.