Kart nech daa bzej Juannaꞌ
1
Chzejntoꞌ leꞌ kwenc̱he iṉezile c̱he beenaꞌ ba zoa kanaꞌ ziꞌ x̱e sil yell-lioni, beenaꞌ bzenagntoꞌ biꞌe dillꞌ naꞌ c̱hopshosh jalaontoꞌkin bleꞌintoꞌneꞌ. Bwiantoꞌ ka nakeꞌ naꞌ bex̱ꞌntoꞌneꞌ kon naꞌntoꞌki kanaꞌ wdeꞌ yell-lioni. Ḻenꞌ nakeꞌ Xtillꞌ Chiozaꞌ naꞌ ḻenꞌ choꞌe beṉꞌ yeḻꞌ mban zejḻi kaṉi.
2 Naꞌ beeni nsaꞌ yeḻꞌ mban zejḻi kaṉi bideꞌ yell-lioni, naꞌ bleꞌintoꞌneꞌ naꞌ choeꞌntoꞌ dillꞌ c̱heꞌ. Naꞌ chyix̱jeꞌintoꞌn leꞌ kwenc̱he iṉezile ba zoalenkzeꞌ X̱acho Chiozaꞌ kanaꞌ ziꞌ x̱e silte yell-lioni naꞌ ba bidsoeꞌ ladjchoni.
3 Chyix̱jeꞌintoꞌ leꞌ c̱he beeni bleꞌintoꞌ naꞌ bzenagntoꞌ biꞌe dillꞌ, kwenc̱he yiyoll yido gakle netoꞌ txen. Naꞌ dii ḻi ba nakkzcho txen X̱acho Chiozaꞌ naꞌ Xiiṉeꞌ Jesucrístonaꞌ.
4 Chzejntoꞌ leꞌ diiki kwenc̱he yiyoll yido soale mbalaz.
5 Diikin bliꞌ bsedi Jesucrístonaꞌ netoꞌ, naꞌ chyix̱jeꞌintoꞌn leꞌ: Chiozaꞌ nakeꞌ ka beeniꞌ daa nakeꞌ ḻiizelozi beṉꞌ ḻi beṉꞌ shaoꞌ, naꞌ bibi dii mal ni de wxiyeꞌ nsee, diikaꞌ nak ka yel c̱hoḻ.
6 Shi iṉacho nakchoneꞌ txen naꞌ chdatecho lo yel c̱hoḻaꞌ, chziyeꞌzchon naꞌ bi zejlencho daa nak dii ḻi.
7 San shi zoacho lo beeniꞌnaꞌ ka zoa Chiozaꞌ lo beeniꞌnaꞌ, naꞌ ba nakcho toz, naꞌ xc̱hen Xiiṉeꞌ Jesucrístonaꞌ chix̱is chiyiban yic̱hjlallꞌdoꞌchonaꞌ kwenc̱he bibi saaxya ndaꞌ nchenan.
8 Shi iṉacho bibi saaxya napcho, chziyeꞌz kwinchon, shi ṉaa, naꞌ nakbiaꞌ bi nombiaꞌcho dii ḻinaꞌ.
9 San shi yix̱oadoḻꞌcho saaxya c̱hechokaꞌ lao Chiozaꞌ, beenaꞌ toshiizi chon ka chc̱hebeꞌ naꞌ nakeꞌ beṉꞌ ḻi beṉꞌ shaoꞌ, wiziꞌxeneꞌ saaxya c̱hechokaꞌ naꞌ yix̱is yiyibeꞌ choꞌ c̱he yogꞌḻoḻ dii malkaꞌ ba bencho.
10 Shi iṉacho biṉꞌ goncho saaxya, ba chtobicho Chiozaꞌ de wxiyeꞌnaꞌ, naꞌ nakbiaꞌ biṉꞌ gombiaꞌcho choꞌa xtilleenanꞌ, shi ṉaa.