2
Leꞌ xiiṉdawaa, chzejꞌ leꞌ dga kwenc̱he bi wx̱iṉj wḻenle. Naꞌ shi nocho ba bx̱iṉj bḻencho, zoa to beṉꞌ iṉabeꞌ choꞌ lao X̱acho Chiozaꞌ, ḻenꞌ Jesucrístonaꞌ, beenaꞌ nak dowalj beṉꞌ ḻi beṉꞌ shaoꞌ.
2 Naꞌ ḻenꞌ wdixjeꞌ saaxya c̱hechokaꞌ kon yeḻꞌ mban c̱heꞌnaꞌ, naꞌ aga c̱he to choꞌzan wdixjeꞌ, san len c̱he yogꞌ beṉꞌ lleꞌ zbii zkaaṉ yell-lionin.
3 Shi choncho ka nllia Chiozaꞌ biaꞌ goncho, ṉezicho ba nombiaꞌchoneꞌ.
4 Naꞌ shi zoa beṉꞌ neꞌ: “Nombiꞌaneꞌ”, naꞌ bi choneꞌ daa nllieꞌ biaꞌ, nakeꞌ to beṉꞌ wxiyeꞌ naꞌ nakbiaꞌ bi nombiꞌe dii ḻinaꞌ.
5 San shi ba choncho ka na choꞌa xtillꞌ Chiozaꞌ, dii ḻi ba chakichoneꞌ ka chiyaḻi. Naꞌ kanꞌ chakbeꞌicho ba nakchoneꞌ toz.
6 Beenaꞌ neꞌ ba nakeꞌ Chiozaꞌ tozə chiyaḻꞌ wsaꞌ c̱heꞌ ka bsaꞌ c̱he Jesucrístonaꞌ.
7 Leꞌ beṉꞌ bishꞌdawaa naꞌ leꞌ beṉꞌ zandawaa, ka nak dga chzejꞌ leꞌ bi nakan dii kob, ḻekzannanꞌ bzenagle dii nechte. Nakan dii nllia Chiozaꞌ biaꞌ kaniꞌteyi naꞌ bakzə yoon nagle.
8 Ḻaꞌkzi kaꞌ, wak iṉacho dga chzejꞌ leꞌ nakan dii kob, ḻaꞌ dii ḻi nakan ka ben Crístonaꞌ naꞌ ka chonle. Naꞌ dii malaꞌ daa nak ka yel c̱hoḻ zej chiyol chinitan, naꞌ beeniꞌ c̱he Chiozaꞌ ba chzeeniꞌn.
9 Shi to beṉꞌ neꞌ zoeꞌ lo beeniꞌ c̱he Chiozaꞌ, naꞌ chakzbanileꞌ bishꞌ ljwelleꞌnaꞌ, lo yel c̱hoḻanꞌ ni zoeꞌ.
10 Beenaꞌ chaki bishꞌ ljwelleꞌnaꞌ ba zoeꞌ lo beeniꞌ c̱he Chiozaꞌ, naꞌ bibi de wchix̱an ḻeꞌ.
11 San beenaꞌ chakzbani bishꞌ ljwelleꞌnaꞌ chdeꞌ lo yel c̱hoḻaꞌ naꞌ bi ṉezileꞌ galan zejeꞌ, ḻaꞌ dii malaꞌ choneꞌ ba nonan ḻeꞌ ka to beṉꞌ lc̱hoḻ.
12 Leꞌ xiiṉdawaa, chzejꞌ leꞌ dga, daa ba biziꞌxen Chiozaꞌ saaxya c̱helekaꞌ daa wit Jesucrístonaꞌ.
13 Leꞌ zoa xiiṉ c̱hele, chzejꞌ leꞌ dga daa nombiaꞌle beenaꞌ ba zoa kanaꞌ ziꞌ x̱e silte yell-lioni. Leꞌ biꞌ wewꞌ, chzejꞌ leꞌ dga daa chzoile bi chzenagle c̱he dii x̱iwaa.
Leꞌ xiiṉdawaa, chzejꞌ leꞌ dga daa nombiaꞌle X̱acho Chiozaꞌ.
14 Leꞌ zoa xiiṉ c̱hele, chzejꞌ leꞌ dga daa nombiaꞌle beenaꞌ zoa kanaꞌ wxe wzil yell-lioni. Ḻekzkaꞌ chzejꞌ leꞌ biꞌ wewꞌ, daa nakle biꞌ wal naꞌ ba bleble Choꞌa Xtillꞌ Chiozaꞌ ḻoo yic̱hjlallꞌdoꞌlenaꞌ, naꞌ bi chzenagle c̱he dii x̱iwaa.
15 Bi gaktekile yell-lioni, ni daa de lawinnaꞌ. Nottezcho shi chakicho daa de yell-lioni, bi chakicho X̱acho Chiozaꞌ.
16 Ḻaꞌ yogꞌḻoḻ diiki de yell-lioni: dii malaꞌ daa chzelallꞌ beli chennaꞌ, naꞌ daa chzelallꞌcho bi dii chleꞌicho, naꞌ yeḻꞌ chaꞌsibaꞌ. Aga ḻegakannanꞌ chshab X̱acho Chiozaꞌ, san nakan dii chshab yell-lioni.
17 Naꞌ yell-lioni chde c̱heyin len dii malkaꞌ chzelallꞌcho lawinnaꞌ, san beenaꞌ chon ka chazlallꞌ Chiozaꞌ de yeḻꞌ mban c̱heꞌ zejḻi kaṉi.
18 Leꞌ, xiiṉdawaa, ba zoacho llakaꞌ zeelo. Naꞌ ba benile zaꞌ Beenaꞌ gakzbanileꞌ Crístonaꞌ.a Naꞌ ṉaa ba chleꞌicho beṉꞌ zan beṉꞌkaꞌ chakzbangakileꞌneꞌ. Daan, ba ṉezicho ba zoacho llakaꞌ zeelo.
19 Ḻegakeꞌ ba bengakeꞌ choꞌ txen ḻaꞌkzi aga dii ḻi gokgakeꞌ choꞌ tozə. Ḻaꞌ sheḻꞌ dii ḻi gokgakeꞌ choꞌ tozə, ni nakgakeꞌ choꞌ txen, sheḻꞌkaꞌ. Naꞌ daa bikwasgakeꞌ, bliꞌgakeꞌn kwasḻoḻ aga do lallꞌgakeꞌn gokgakeꞌ choꞌ txen.
20 Per beenaꞌ nak ḻiizelozi beṉꞌ wen beṉꞌ shaoꞌ ba beneꞌ kwenc̱he zoa Espíritu Sántonaꞌ ḻoo yic̱hjlallꞌdoꞌlenaꞌ. Naꞌ daan, yogꞌle chajniile dillꞌ ḻi c̱he Chiozaꞌ.
21 Aga chzejꞌ dga daa iṉacho bi nombiaꞌle dii ḻinanꞌ, san chzejaꞌn daa ba nombiaꞌlennanꞌ, naꞌ ṉezicho bibi dillꞌ wxiyeꞌ nc̱hix̱ dillꞌ ḻi c̱he Chiozaꞌ.
22 ¿Noran beṉꞌ wxiyeꞌnaꞌ? Ḻenꞌ beenaꞌ na c̱he Jesúzaꞌ aga ḻenꞌ Crístonaꞌ, beenaꞌ chbezcho wseḻꞌ Chiozaꞌ. Beenaꞌ na kaꞌ, ḻenꞌ chakzbanileꞌ Crístonaꞌ, naꞌ chzoeꞌ X̱acho Chiozaꞌ kaꞌlə len Xiiṉeꞌ Jesucrístonaꞌ.
23 Beenaꞌ chzoeꞌ Xiiṉ Chiozaꞌ kaꞌlə lenkz X̱eꞌ Chiozanꞌ chzoeꞌ kaꞌlə. San beenaꞌ iṉa chonḻilallee Xiiṉ Chiozaꞌ, lenkz X̱eꞌnanꞌ nakeꞌ txen.
24 Daan, ḻi kooshaoꞌ ḻoo yic̱hjlallꞌdoꞌlenaꞌ yogꞌḻoḻ daa wzolo chsedle ka wyoole lo xṉez Chiozaꞌ. Naꞌ shi ba wlooshaoꞌlen ḻoo yic̱hjlallꞌdoꞌlenaꞌ, toshiizi gakle tozə X̱acho Chiozaꞌ len Xiiṉeꞌnaꞌ.
25 Naꞌ dgan ba bc̱heb Jesucrístonaꞌ c̱hecho: goṉeꞌ yeḻꞌ mban zejḻi kaṉi.
26 Chzejꞌ leꞌ dga, daa chda beṉꞌkaꞌ cheengakileꞌ siyeꞌgakeꞌ leꞌ.
27 Naꞌ ka nakle leꞌ, ba nzoa Jesucrístonaꞌ Espíritu Sántonaꞌ ḻoo yic̱hjlallꞌdoꞌlenaꞌ, naꞌ aga chyalljchile no wsedi leꞌ daa nak dii ḻi. Ḻaꞌ kwin Espíritu Sántonaꞌ ba chsedileꞌ leꞌ yogꞌ diikaꞌ, naꞌ daa chliꞌ chsedileꞌ leꞌ nakan dii ḻi, bi nakan de wxiyeꞌ. Naꞌ toshiizi ḻi gak Crístonaꞌ tozə, ka ba bliꞌ bsedi Espíritu Sántonaꞌ leꞌ.