3
Ḻi gakbeꞌi ka chaki X̱acho Chiozaꞌ choꞌ daa neꞌ nakcho xiiṉeꞌ. Naꞌ dii ḻi ba nakkzcho xiiṉenꞌ. Daan, beṉꞌkaꞌ bi nonḻilallꞌgakeꞌ Chiozaꞌ bi chleꞌshiꞌgakileꞌ choꞌ, ḻaꞌ bi nombiaꞌgakeꞌneꞌ.
2 Leꞌ beṉꞌ bishꞌdawaa naꞌ leꞌ beṉꞌ zandawaa, ba nakcho xiiṉ Chios. Naꞌ ḻaꞌkzi biṉꞌ iṉezyeṉꞌicho nakan yiyakcho, ṉezicho katꞌ yilaꞌ Jesucrístonaꞌ yiyakcho ka nakeꞌ, ḻaꞌ ileꞌichoneꞌ do ka nakeꞌ.
3 Naꞌ nottez beenaꞌ ba noneꞌ lez dga, bich choneꞌ txen dii malaꞌ kwenc̱he gakeꞌ ka nak Jesucrístonaꞌ, beenaꞌ bibi dii mal ndaꞌ ncheneꞌ.
4 Naꞌ beenaꞌ chx̱iṉj chḻen chyishjeꞌ daa nllia Chiozaꞌ biaꞌ, ḻaꞌ katꞌ chx̱iṉj chḻencho, xtilleenanꞌ chyishjcho.
5 Leꞌ ba ṉezile bid Jesucrístonaꞌ yell-lioni kwenc̱he bikwaseꞌ saaxya c̱hechokaꞌ, naꞌ ṉezteile bibi saaxya c̱heꞌ de.
6 Naꞌ yogꞌ beṉꞌkaꞌ nakgakeꞌneꞌ toz bi chdagakeꞌ lao saaxyanaꞌ. San yogꞌ beṉꞌkaꞌ chda lao saaxyanaꞌ biṉꞌ gakbeꞌgakileꞌ non nak Crístonaꞌ, ni bi nombiaꞌgakeꞌneꞌ.
7 Leꞌ xiiṉdawaa, bi weꞌle latj no siyeꞌ leꞌ. Beenaꞌ chon daa nak shḻi nakeꞌ beṉꞌ ḻi beṉꞌ shaoꞌ ka Jesucrístonaꞌ nakeꞌ beṉꞌ ḻi beṉꞌ shaoꞌ.
8 Naꞌ beenaꞌ chx̱iṉj chḻen nakeꞌ xiiṉ dii x̱iwaa, ḻaꞌ dii x̱iwaa bx̱iṉj bḻenan kanaꞌ ziꞌ x̱e silte yell-lioni. Naꞌ ni c̱heyi dgan bid Xiiṉ Chiozaꞌ, kwenc̱he wlliayee yogꞌḻoḻ daa chon dii x̱iwaa.
9 Beenaꞌ ba nak xiiṉ Chios bich chdeꞌ lao saaxyanaꞌ, ḻaꞌ Chiozaꞌ ba bikobeꞌ yeḻꞌ mban c̱heꞌnaꞌ. Naꞌ daa ba nakeꞌ xiiṉ Chiozaꞌ, bich gak teꞌ lao saaxyanaꞌ.
10 Naꞌ nakbiaꞌ beṉꞌkaꞌ dii ḻicha nakgakeꞌ xiiṉ Chios naꞌ beṉꞌkaꞌ nak xiiṉ dii x̱iwaa. Ḻaꞌ nottez beenaꞌ bi chon daa nak shḻi naꞌ bi chakileꞌ bishꞌ ljwelleꞌnaꞌ bi nakeꞌ xiiṉ Chios.
11 Kanaꞌ wzolotele bzenagle xtillꞌ Crístonaꞌ benile dga: chiyaḻꞌ gaki bishꞌ ljwellcho.
12 Bi chiyaḻꞌ goncho ka ben dii Caínnaꞌ, beneꞌ dii x̱iwaa txen naꞌ beteꞌ beṉꞌ bisheenaꞌ. Naꞌ ¿bic̱he betzeꞌneꞌ? Beteꞌneꞌ daa bentezi ben Caínnaꞌ dii malaꞌ, naꞌ beṉꞌ bisheenaꞌ beneꞌ daa chiyoolallii Chiozaꞌ.
13 Leꞌ beṉꞌ bishꞌdawaa naꞌ leꞌ beṉꞌ zandawaa, bi gakllejile shi beṉꞌkaꞌ bi chajḻeꞌ c̱he Chiozaꞌ chakzbangakileꞌ leꞌ.
14 Daa chakicho bishꞌ ljwellchonaꞌ ṉezicho bich chdacho lo nezaꞌ ganaꞌ kwiayiꞌcho, san ba de yeḻꞌ mban c̱hecho zejḻi kaṉi. Ḻaꞌ beenaꞌ bi chaki bishꞌ ljwelleꞌnaꞌ ni zejeꞌ lo nezaꞌ ganaꞌ kwiayee.
15 Nottez beṉꞌ chakzbanileꞌ bishꞌ ljwelleꞌnaꞌ, lebzin chonleneꞌ beṉꞌ wen xyanaꞌ. Naꞌ ṉezile ni to wen xya bi de yeḻꞌ mban c̱heꞌ zejḻi kaṉi.
16 Crístonaꞌ bliileꞌ choꞌ ka nak yeḻꞌ chakinaꞌ daa bzani yeḻꞌ mban c̱heꞌnaꞌ ni c̱hecho. Naꞌ ḻekzkaꞌ choꞌ chiyaḻꞌ izani yeḻꞌ mban c̱hechoni ni c̱he bishꞌ ljwellchonaꞌ.
17 Shi ga zoacho chaj chdecho mbalaz naꞌ chwiacho bishꞌ ljwellchonaꞌ chyallj chc̱hinileꞌ naꞌ bi chiyeshꞌlallichoneꞌ, ¿nakran goncho iṉacho chakicho Chiozaꞌ?
18 Leꞌ xiiṉdawaa, bi chiyaḻꞌ gaki ljwellcho de choꞌa dillꞌz, san chiyaḻꞌ wliꞌcho dii ḻi chaki ljwellcho.
19 Naꞌ ṉezicho shi ba chaki ljwellcho, naꞌ wliꞌn ba zejcho lo nez ḻinaꞌ, naꞌ ṉezicho Chiozaꞌ chibaileꞌ ka choncho,
20 ḻaꞌkzi yic̱hjlallꞌdoꞌchoni iṉan nakcho beṉꞌ saaxya. Ḻaꞌ Chiozaꞌ nakcheꞌ beṉꞌ choo beṉꞌ xench ka choꞌ naꞌ ṉezileꞌ yogꞌḻoḻte.
21 Leꞌ beṉꞌ bishꞌdawaa naꞌ leꞌ beṉꞌ zandawaa, shi yic̱hjlallꞌdoꞌchoni chakbeꞌin bibi xtoḻꞌcho de, naꞌ bi gall illebcho weꞌḻwillchoneꞌ,
22 naꞌ goṉeꞌ bittezə daa iṉabichoneꞌ, ḻaꞌ chzenagcho daa nllieꞌ biaꞌ goncho naꞌ choncho ka chazlallee.
23 Naꞌ dgan nllieꞌ biaꞌ goncho: gonḻilallꞌcho Xiiṉeꞌ Jesucrístonaꞌ, naꞌ gaki ljwellcho ka ba bllieꞌ biaꞌ goncho.
24 Beṉꞌkaꞌ chongakeꞌ ka nllia Chiozaꞌ biaꞌ ba nakgakeꞌneꞌ toz naꞌ zoaleneꞌ ḻegakeꞌ. Naꞌ ṉezicho zoaleneꞌ choꞌ daa ba beṉeꞌ Espíritu c̱heꞌnaꞌ zoeꞌ ḻoo yic̱hjlallꞌdoꞌchoki.