4
Leꞌ beṉꞌ bishꞌdawaa naꞌ leꞌ beṉꞌ zandawaa, bi shajḻeꞌle c̱he nottez beṉꞌ iṉeꞌ: “Ba chṉe Chiozaꞌ nadꞌ”, san ḻi wwiagaxjə shi leileꞌ Chiozaꞌ chṉieꞌneꞌ wa shi nazeꞌn. Ḻaꞌ yell-lioni ba chas chda beṉꞌ zan beṉꞌ chziyeꞌ nazgakeꞌ chyix̱jeꞌgakeꞌ daa na Chiozaꞌ.
2 Dgan gonan ka gakbeꞌile beenaꞌ chyix̱jee daa na Espíritu c̱he Chiozaꞌ: yogꞌḻoḻ beṉꞌkaꞌ choꞌe dillꞌ nan Jesucrístonaꞌ nakeꞌ Chios naꞌ bideꞌ goljeꞌ gokeꞌ beṉꞌ de beli chen ka choꞌ, beenanꞌ zoalen Espíritu c̱he Chiozaꞌneꞌ.
3 Naꞌ nottez beenaꞌ iṉa Jesucrístonaꞌ bi gokeꞌ beṉꞌ de beli chen, bi zoalen Espíritu c̱he Chiozaꞌneꞌ naꞌ chakzbanileꞌ Crístonaꞌ. Naꞌ ba ṉezile ba zoa wliꞌlao beenaꞌ gakzbanileꞌ Crístonaꞌ, naꞌ ṉaa ba chdakz beṉꞌ chon kaꞌ yell-lioni.
4 Leꞌ xiiṉdawaa, ba nakle Chiozaꞌ tozə, naꞌ bich chajḻeꞌle c̱he beṉꞌ wxiyeꞌkaꞌ, ḻaꞌ beenaꞌ zoaleneꞌ leꞌ napcheꞌ yeḻꞌ wak xench aga ka dii x̱iwaa daa chda yell-lioni.
5 Beṉꞌ wxiyeꞌkaꞌ nogakeꞌ diikaꞌ na beṉꞌ yell-lioki, daan, zle c̱he yell-lionizə choeꞌgakeꞌ dillꞌ, naꞌ beṉꞌkaꞌ bi nombiaꞌgakeꞌ Chiozaꞌ chzenaggakeꞌ xtilleekaꞌ.
6 San choꞌ ba nakcho Chiozaꞌ tozə, naꞌ beṉꞌkaꞌ nombiaꞌgakeꞌ Chiozaꞌ chzenaggakeꞌ c̱hecho. Naꞌ beṉꞌkaꞌ bi nakgakeꞌ Chiozaꞌ tozə, bi chzenaggakeꞌ c̱hecho. Naꞌ kanꞌ chṉezicho non choꞌe dillꞌ ḻi daa chzajnii Espíritu c̱he Chiozaꞌneꞌ naꞌ non choꞌe dillꞌ wxiyeꞌ daa chzajnii dii x̱iwaaneꞌ.
7 Leꞌ beṉꞌ bishꞌdawaa naꞌ leꞌ beṉꞌ zandawaa, chiyaḻꞌ gaki ljwellcho, ḻaꞌ kanꞌ chon Chiozaꞌ chakileꞌ beṉꞌ. Nottezə beṉꞌ zoeꞌ chaki ljwelleꞌ, nakbiaꞌ dii ḻi nakeꞌ xiiṉ Chios naꞌ nombiꞌe Chiozaꞌ.
8 Naꞌ beenaꞌ bi chaki bishꞌ ljwelleꞌnaꞌ biṉꞌ gombiꞌe Chiozanꞌ, ḻaꞌ Chiozaꞌ zoeꞌ chakileꞌ choꞌ.
9 Chiozaꞌ bliꞌe ka chakileꞌ choꞌ daa bseḻee Xiiṉeꞌnaꞌ tlishꞌ tyaj yell-lioni kwenc̱he gonḻilallꞌchoneꞌ naꞌ gatꞌ yeḻꞌ mban c̱hecho dii bi te c̱heyin.
10 Kin nak yeḻꞌ chaki daa nak dowalj: aga iṉacho choꞌlan gokicho Chiozaꞌ, san daa chaki Chiozaꞌ chonꞌ bseḻee Xiiṉeꞌnaꞌ witeꞌ kwenc̱he wdixjeꞌ saaxya c̱hechokaꞌ.
11 Naꞌ leꞌ beṉꞌ bishꞌdawaa naꞌ leꞌ beṉꞌ zandawaa, shi kanꞌ chaki Chiozaꞌ choꞌ, kaꞌkzan chiyaḻꞌ gaki ljwellcho.
12 Ni to beṉꞌ biṉꞌ ileꞌileꞌ Chiozaꞌ, per shi chaki ljwellcho, Chiozaꞌ zoaleneꞌ choꞌ naꞌ yeḻꞌ chaki c̱heꞌnaꞌ ba chonan llin lo yeḻꞌ mban c̱hechoki ka chiyaḻi.
13 Ṉezicho zoalencho Chiozaꞌ naꞌ ḻeꞌ zoaleneꞌ choꞌ daa ba nzoeꞌ Espíritu c̱heꞌnaꞌ ḻoo yic̱hjlallꞌdoꞌchoki.
14 Naꞌ netoꞌ bleꞌintoꞌ Xiiṉ Chiozaꞌ naꞌ choeꞌntoꞌ dillꞌ nan X̱acho Chiozaꞌ bseḻee Xiiṉeꞌnaꞌ kwenc̱he yisleꞌ beṉꞌ yell-lioni naꞌ bi kwiayiꞌgakeꞌ.
15 Nottezə beṉꞌ chajḻiꞌe naꞌ choꞌe dillꞌ neꞌ Jesúzaꞌ nakeꞌ Xiiṉ Chiozaꞌ, Chiozaꞌ zoaleneꞌneꞌ naꞌ ḻeꞌ zoaleneꞌ Chiozaꞌ.
16 Choꞌ ba ṉezicho naꞌ ba chajḻeꞌcho chaki Chiozaꞌ choꞌ. Chiozaꞌ zoeꞌ chakileꞌ choꞌ, naꞌ shi zoacho chakichoneꞌ naꞌ chaki ljwellcho, zoalencho Chiozaꞌ naꞌ ḻeꞌ zoaleneꞌ choꞌ.
17 Naꞌ shi ba chaki ljwellcho, chliꞌcho yeḻꞌ chaki c̱he Chiozaꞌ ba chonan llin lo yeḻꞌ mban c̱hechoki ka chiyaḻi, naꞌ bi illebcho llanaꞌ yiziꞌe choꞌ kwent, ḻaꞌ ka wda Jesucrístonaꞌ kaꞌkzan chdacho chakicho beṉꞌ yell-lioni.
18 Ganaꞌ zoa yeḻꞌ chaki c̱he Chiozaꞌ bibi yeḻꞌ chlleb de. Naꞌ shi dii ḻi napcho yeḻꞌ chakinaꞌ aga wllebcho yeḻꞌ ziꞌnaꞌ wseḻꞌ Chiozaꞌ. Ḻaꞌ beenaꞌ chlleb, biṉꞌ gon xshin yeḻꞌ chaki c̱he Chiozaꞌ lo yeḻꞌ mban c̱heꞌnaꞌ ka chiyaḻꞌ.
19 Choꞌ chakicho Chiozaꞌ, ḻaꞌ zigaate ḻenꞌ gokileꞌ choꞌ.
20 Shi zoa beṉꞌ neꞌ: “Chakidꞌ Chiozaꞌ”, per chakzbanileꞌ bishꞌ ljwelleꞌnaꞌ, chziyeꞌzeꞌn. ¿Nakran goneꞌ gakileꞌ Chiozaꞌ, beenaꞌ bi chleꞌileꞌ, len chleꞌitele bishꞌ ljwelleꞌnaꞌ naꞌ bi chakileꞌneꞌ?
21 Dgan nllia Jesucrístonaꞌ biaꞌ goncho: Beenaꞌ chakileꞌ Chiozaꞌ, ḻekzkaꞌ chiyaḻꞌ gakileꞌ bishꞌ ljwelleꞌnaꞌ.