5
Yogꞌḻoḻ beṉꞌkaꞌ chajḻeꞌgakeꞌ Jesúzaꞌ nakeꞌ Crístonaꞌ, beenaꞌ bseḻꞌ Chiozaꞌ, ḻegakenꞌ ba nakgakeꞌ xiiṉ Chios. Naꞌ yogꞌ beṉꞌkaꞌ chakgakileꞌ X̱acho Chiozaꞌ ḻekzkaꞌ chakgakileꞌ beṉꞌkaꞌ nak xiiṉeꞌ.
2 Ṉezicho shi chakicho Chiozaꞌ, choncho daa nllieꞌ biaꞌ goncho, ḻekzkaꞌ chakicho yogꞌḻoḻ beṉꞌkaꞌ ba nak xiiṉ Chios.
3 Shi choncho daa nllia Chiozaꞌ biaꞌ goncho, ba chakichonenꞌ, shi ṉaa. Naꞌ diikaꞌ nllieꞌ biaꞌ goncho bi nakan zii sshab.
4 Naꞌ yogꞌ beṉꞌkaꞌ ba nakgakeꞌ xiiṉ Chios chizogakileꞌ bich chongakeꞌ dii malaꞌ de yell-lioni. Naꞌ daa chonḻilallꞌcho Jesucrístonaꞌ, chizoicho bi choncho dii malaꞌ de yell-lioni.
5 Beṉꞌkaꞌ chajḻeꞌ Jesúzaꞌ nakeꞌ Xiiṉ Chios, ḻegakenꞌ chzogakileꞌ bi chongakeꞌ dii malaꞌ de yell-lioni.
6 Ka bid Jesucrístonaꞌ yell-lioni wchoeꞌ nisaꞌ naꞌ blalj xc̱heneꞌnaꞌ kanaꞌ betgakeꞌneꞌ. Aga to wchoazeꞌ nisanꞌ, san beneꞌ diiki c̱hopte, wchoeꞌ nisaꞌ naꞌ blalj xc̱heneꞌnaꞌ. Naꞌ Espíritu c̱he Chiozaꞌ choeꞌ dillꞌ ka daa gokə, ḻaꞌ ḻenꞌ zeelo choꞌe dillꞌ daa nak dii ḻi.
7 Naꞌ shoṉ diikaꞌ choeꞌn dillꞌ c̱he Jesucrístonaꞌ:
8 Daa bidsoalen Espíritu c̱he Chiozaꞌ ḻeꞌ, naꞌ daa wchoeꞌ nisaꞌ, naꞌ daa blalj xc̱heneꞌnaꞌ. Naꞌ toz ka choeꞌgakan dillꞌ.
9 Chajḻeꞌcho dillaa choeꞌ beṉꞌ, per zakꞌchi dillaa daa choeꞌ Chiozaꞌ, naꞌ ḻenꞌ choꞌe dillꞌ c̱he Xiiṉeꞌnaꞌ.
10 Beenaꞌ chajḻeꞌ c̱he Xiiṉ Chiozaꞌ, ṉezile xtillꞌ X̱acho Chiozaꞌ daa biꞌe c̱he Xiiṉeꞌnaꞌ nakan dillꞌ ḻi. Naꞌ beenaꞌ bi chajḻeꞌ c̱he Chiozaꞌ ba choneꞌ Chiozaꞌ ka to beṉꞌ wxiyeꞌ daa bi chajḻiꞌe c̱he dillaa biꞌe c̱he Xiiṉeꞌnaꞌ.
11 Naꞌ dillaa biꞌe nan: ba beṉeꞌ choꞌ yeḻꞌ mban zejḻi kaṉi, naꞌ beṉeꞌn daa nonḻilallꞌcho Xiiṉeꞌnaꞌ.
12 Beenaꞌ nakeꞌ Xiiṉ Chiozaꞌ tozə, de yeḻꞌ mban c̱heꞌ zejḻi kaṉi, naꞌ beenaꞌ bi nakeꞌ Xiiṉ Chiozaꞌ tozə, bi gatꞌ yeḻꞌ mban c̱heꞌ zejḻi kaṉi.
13 Chzejꞌ leꞌ dillꞌki, ka leꞌ nonḻilallꞌle Xiiṉ Chiozaꞌ, kwenc̱he iṉezile ba de yeḻꞌ mban c̱hele zejḻi kaṉi.
14 Nxenlallꞌcho wzenag Chiozaꞌ c̱hecho katꞌ bin iṉabichoneꞌ shi nakan daa cheenileꞌ gakə.
15 Naꞌ daa ṉezicho chzenagueꞌ c̱hecho bin chṉabichoneꞌ, ḻekzkaꞌ ṉezicho goneꞌ daa chṉabichoneꞌ.
16 Naꞌ shi chleꞌicho to bishꞌ ljwellcho choneꞌ dii malaꞌ daa bi nak dii kwiayiꞌleneꞌ, chiyaḻꞌ iṉabicho Chiozaꞌ gakleneꞌneꞌ, naꞌ Chiozaꞌ goneꞌ ka yiyakshaoꞌ yic̱hjlallꞌdoꞌenaꞌ. Kanꞌ goncho shi choneꞌ dii malaꞌ daa bi kwiayiꞌleneꞌ. De dii malaꞌ daa chon beṉꞌ daa wlliayiꞌn ḻeꞌ, naꞌ bi niaꞌ iṉabile Chiozaꞌ gakleneꞌ beenaꞌ chon daa nak kaꞌ.
17 Yogꞌ dii malaꞌ nakan saaxya, per de saaxyanaꞌ daa bi wlliayiꞌn choꞌ.
18 Ṉezicho beenaꞌ ba biyak xiiṉ Chiozaꞌ bich zoeꞌ choneꞌ dii malaꞌ, ḻaꞌ Jesucrístonaꞌ, Xiiṉ Chiozaꞌ, chap chwieꞌneꞌ kwenc̱he dii x̱iwaa bich gak gox̱ꞌ wṉizan ḻeꞌ.
19 Ṉezicho nakcho lallꞌ naꞌ Chiozaꞌ, naꞌ yogꞌ beṉꞌkaꞌ bi chzenag c̱he Chiozaꞌ nakgakeꞌ lallꞌ naꞌ dii x̱iwaa.
20 Naꞌ ḻekzkaꞌ ṉezicho ba bid Xiiṉ Chiozaꞌ naꞌ bidzajniileꞌ choꞌ kwenc̱he nombiaꞌcho beenaꞌ nak dowalj Chios. Naꞌ ba nakcho lallꞌ nee daa nonḻilallꞌcho Jesucrístonaꞌ. Ḻaꞌ Jesucrístonaꞌ nakeꞌ dowalj Chios, naꞌ choṉeꞌ yeḻꞌ mban c̱hecho zejḻi kaṉi.
21 Leꞌ xiiṉdawaa, mara gonḻilallꞌle chioskaꞌ chon beṉec̱haꞌ.