Kart wchopi daa bzej Juannaꞌ
1
Nadꞌ ngoo lallꞌ naꞌ bishꞌ ljwellchoki nonḻilallꞌ Crístonaꞌ chzejꞌ liꞌ, noolə ba wlej Chiozaꞌ gakoꞌ lallꞌ nee len xiiṉoꞌkaꞌ.a Naꞌ ḻe chakidꞌ leꞌ, naꞌ aga toz nadꞌ chakidꞌ leꞌ san len yogꞌ beṉꞌkaꞌ ba nombiaꞌ daa nak dii ḻin.
2 Ḻe chakidꞌ leꞌ daa ba nombiaꞌcho daa nak dii ḻi daa yoo ḻoo yic̱hjlallꞌdoꞌchokaꞌ ṉaa, naꞌ soalenan choꞌ toshiizi.
3 Chiozaꞌ, beenaꞌ nak X̱acho, len Xiiṉeꞌ Jesucrístonaꞌ, gongakeꞌ ka gak wen c̱hecho, naꞌ yiyeshꞌlallꞌgakileꞌ choꞌ, naꞌ gongakeꞌ ka soacho mbalaz kwenc̱he zejch gombiaꞌcho daa nak dii ḻi naꞌ gaki ljwellcho.
4 Dii xen biba bizakidꞌ ka wṉezidꞌ baḻ xiiṉoꞌkaꞌb chdagakeꞌ lo nez ḻi c̱he Chiozaꞌ, kon ka na X̱achonaꞌ goncho.
5 Naꞌ ṉaa, niaꞌ leꞌ chiyaḻꞌ gaki ljwellcho ganga. Dga niaꞌ leꞌ aga nakan dii ziꞌ benicho, san dezd nechte wṉezicho dga.
6 Dgan yeḻꞌ chakinaꞌ: goncho daa non Chiozaꞌ mandad. Naꞌ dgan cheenileꞌ goncho: soacho gakichoneꞌ naꞌ ḻekzkaꞌ gaki ljwellcho kon ka ba benicho dezd nech.
7 Beṉꞌ zan beṉꞌ wxiyeꞌkaꞌ ba chda yell-lioni, naꞌ bi chajḻeꞌgakeꞌ nan ba bid Jesucrístonaꞌ yell-lioni gokeꞌ beṉꞌ de beli chen. Beṉꞌkaꞌ bi chajḻeꞌ, ḻegakenꞌ beṉꞌ wxiyeꞌkaꞌ, beṉꞌkaꞌ chakzbangakileꞌ Crístonaꞌ.
8 Wsakꞌgale kwenc̱he bi gakdadz llinnaꞌ ba benle, san yiziꞌle banez do ka nak daa chidoḻꞌle.
9 Nottezə beenaꞌ yilaa nez ḻi c̱he Chiozaꞌ naꞌ bich zejleneꞌ daa bliꞌ bsedi Crístonaꞌ, bi zoalen Chiozaꞌneꞌ. Naꞌ beenaꞌ zejlen daa bliꞌ bsedi Crístonaꞌ, zoalen X̱acho Chiozaꞌneꞌ naꞌ ḻekzkaꞌ Xiiṉeꞌnaꞌ.
10 Shi no zaꞌ ganaꞌ zoale zidyeꞌleneꞌ leꞌ dillꞌ daa bi chidiḻin daa bliꞌ bsedi Crístonaꞌ, bi wlebleneꞌ ḻoo yoo lill-lenaꞌ, ni bi wwapleneꞌ chiox.
11 Ḻaꞌ beenaꞌ chlebeꞌneꞌ, choneꞌ txen dii malaꞌ choneꞌ.
12 Dii zan dii cheenidꞌ iṉiaꞌ leꞌ, per bi chaklallaa gonaꞌn yishzə. San chbezꞌ gatꞌ latj yidkzꞌ ganaꞌ zoale kwenc̱he ileꞌi ljwellcho naꞌ weꞌcho dillꞌ, naꞌ yiyoll yido soacho mbalaz.
13 Beṉꞌkaꞌ nak xiiṉ beṉꞌ biloꞌnaꞌ,c beenaꞌ wlej Chiozaꞌ gakeꞌ lallꞌ nee, chwapgakeꞌ leꞌ chiox.