3
Leꞌ beṉꞌ bishꞌdawaa naꞌ leꞌ beṉꞌ zandawaa, dgan de wchop shii chzejꞌ leꞌ. Naꞌ c̱hopten choeꞌlenꞌ leꞌ dillꞌ kwenc̱he chisaa lallꞌle sele wṉeyi c̱he dii wennaꞌ daa ba ṉezile.
2 Ḻi lljadini dillꞌkaꞌ beꞌ dii beṉꞌkaꞌ wdix̱jee daa goll Chiozaꞌ ḻegakeꞌ kaniꞌyi, naꞌ daa bllia X̱anchonaꞌ biaꞌ, beenaꞌ bisla choꞌ, daa ba bliꞌ bsedi postlkaꞌ leꞌ.
3 Dii llialote chiyaḻꞌ iṉezile, katꞌ ba zoa te c̱he yell-lioni, naꞌ ichej beṉꞌ gongakeꞌ daa nazan c̱hegakeꞌ naꞌ gonḻegakeꞌ,
4 iṉagakeꞌ: “¿Berac̱he biṉꞌ yiyed Crístonaꞌ ka bc̱hebeꞌ goneꞌ? Ba wit dii x̱axṉaꞌchokaꞌ naꞌ toz ka ni chak ṉaa ka kanaꞌ wxe wzilte yell-lioni.”
5 Beṉꞌkaꞌ na kaꞌ, bi cheengakileꞌ yisaꞌlallꞌgakeꞌ daa gok kaniꞌyi, kanaꞌ to ka wṉezə Chiozaꞌ naꞌ wyaꞌ wbiṉ yabanaꞌ, naꞌ biyak nisdoꞌkaꞌ toz naꞌ bliꞌlao yell-lionaꞌ.
6 Naꞌ ḻekzkaꞌ ḻenꞌ bllieꞌ biaꞌ gok yejsiwaa kwenc̱he blliayiꞌ nisaꞌ yell-lioni kaniꞌyi.
7 Naꞌ yabanaꞌ len yell-lioni, diiki chleꞌicho ṉaa, ba nllia Chiozaꞌ biaꞌ c̱hegakin wzey wte yiꞌnaꞌ ḻegakan llanaꞌ wc̱hogloeꞌ kwiayiꞌ yogꞌ beṉꞌ malkaꞌ.
8 Naꞌ leꞌ beṉꞌ bishꞌdawaa naꞌ leꞌ beṉꞌ zandawaa, bi gaḻ-lallꞌle X̱anchonaꞌ chleꞌileꞌ tlla ka to mil yiz naꞌ to mil yiz ka tllazə.
9 Zoa beṉꞌ neꞌ chsheꞌlallꞌ X̱anchonaꞌ goneꞌ ka bc̱hebeꞌ. Aga chsheꞌlalleenꞌ, san napeꞌ yeḻꞌ chxenlallꞌ daa bi cheenileꞌ no kwiayiꞌ, naꞌ cheenileꞌ yogꞌ beṉꞌ yiyaj yileni.
10 Llanaꞌ yiyed X̱anchonaꞌ tokonganzan yilee, ka chon to beṉꞌ wban tokonganz choꞌe ḻoo yoo lill beṉꞌ. Naꞌch gak to sshag wal naꞌ yinitlo yabanaꞌ naꞌ diikaꞌ llia xaninnaꞌ, wzey yiꞌnaꞌ ḻegakan naꞌ kwiayiꞌgakan, naꞌ yell-lioni naꞌ yogꞌ dii de lawinnaꞌ sheygakan.
11 Daa ṉezicho yogꞌḻoḻte dii de kwiayiꞌgakan, chiyaḻꞌ goncho ka dii le gakcho beṉꞌ ḻi beṉꞌ shaoꞌ naꞌ soacho goncho ka cheeni Chiozaꞌ
12 shlak chbezcho llanaꞌ wc̱hogloeꞌ c̱he beṉꞌ, naꞌ goncho to dii byen kwenc̱he yob gakan. Llanaꞌ gak kaꞌ, yiꞌnaꞌ wlliayiꞌn yabanaꞌ naꞌ diikaꞌ llia xaninnaꞌ yiḻengakan naꞌ kwiayiꞌgakan.
13 Naꞌ choꞌ, chbezcho to yaba kob naꞌ sto yell-lio kob daa bc̱heb Chiozaꞌ goṉeꞌ choꞌ ganaꞌ sheꞌ shgaḻꞌ beṉꞌ ḻi beṉꞌ shaoꞌ.
14 Daan, leꞌ beṉꞌ bishꞌdawaa naꞌ leꞌ beṉꞌ zandawaa, shlak zoale chbezle diiki, ḻi gon to dii byen kwenc̱he soalenle Chiozaꞌ wen, naꞌ bibi xtoḻꞌle gatꞌ ni bibi ndaꞌ nchen yic̱hjlallꞌdoꞌlenaꞌ katꞌ lljazele laweꞌnaꞌ.
15 Naꞌ chiyaḻꞌ shajniileꞌ dga: X̱anchonaꞌ napeꞌ yeḻꞌ chxenlallꞌ c̱hecho daa bi cheenileꞌ kwiayiꞌcho, san cheenileꞌ yogꞌcho yilacho. Naꞌ ḻekzkaꞌ beṉꞌ bishꞌcho Páblonaꞌ, beenaꞌ ḻe chakicho, bzejeꞌ xtillii diiki kon yeḻꞌ sinꞌ daa beꞌ Chiozaꞌneꞌ.
16 To to ka bzej Páblonaꞌ, biꞌe dillꞌ c̱he diiki. Naꞌ baḻ diikaꞌ bzejeꞌ ḻe lallj shajniichon, naꞌ beṉꞌkaꞌ bi nteyi len beṉꞌkaꞌ biṉꞌ gakcha lo xṉez Chiozaꞌ chajniꞌgakileꞌn klelə, ka chongakeꞌ c̱he bichlə daa na Choꞌa Xtillꞌ Chiozaꞌ, chajniꞌgakileꞌn klelə, naꞌ chlliayiꞌ kwingakeꞌ.
17 Naꞌ leꞌ beṉꞌ bishꞌdawaa naꞌ leꞌ beṉꞌ zandawaa, daa ba ṉezile dga, ḻi wsakꞌ kwenc̱he ki gonlleji beṉꞌ malkaꞌ leꞌ naꞌ yilaale lo xṉez Chiozaꞌ.
18 San ḻi gon ka dii le shajniꞌchile ka chaklen X̱ancho Jesucrístonaꞌ choꞌ, naꞌ ḻi gombiaꞌch beenaꞌ bisleꞌ choꞌ. Ḻenꞌ chidoḻee shoꞌe balaaṉ ṉaa naꞌ zejḻi kaṉi. Kanꞌ gakan.