2
Per ḻekzkaꞌ ladj beṉꞌ Israelkaꞌ wzoa beṉꞌ wxiyeꞌ, wnazgakeꞌ chyix̱jeꞌgakeꞌ daa goll Chiozaꞌ ḻegakeꞌ. Naꞌ kaꞌkzə ladjlenaꞌ soa beṉꞌ wliꞌ wsedi de wxiyeꞌkaꞌ. Naꞌ wliꞌ wsedgakileꞌ leꞌ ka ki gakbeꞌzileꞌ de wxiyeꞌ c̱heꞌkaꞌ daa chlliayiꞌ beṉꞌ. Naꞌ wzoagakeꞌ kaꞌlə X̱anchonaꞌ, beenaꞌ wdixj saaxya c̱heꞌkaꞌ. Naꞌ daa gongakeꞌ kaꞌ, tolbeꞌ kwiayiꞌgakeꞌ.
2 Beṉꞌ zan gongakeꞌ txen dii mal c̱heꞌkaꞌ naꞌ gongakeꞌ dii zban daa nazan c̱hegakeꞌ. Naꞌ ni c̱hegakeꞌ iṉe beṉꞌ zban c̱he dillꞌ ḻi c̱he Chiozaꞌ daa nocho.
3 Daa selallꞌgakeꞌ gatꞌ kweꞌgakileꞌ, wliꞌ wsedgakileꞌ leꞌ daa chyiljlallꞌzgakeꞌ. Kaniꞌteyi ba nchogbiaꞌ c̱hegakeꞌ kwiayiꞌgakeꞌ, naꞌ bich gakxen c̱hegakeꞌ.
4 Chiozaꞌ bi wxiꞌxeneꞌ c̱he anjlkaꞌ bx̱iṉj, san btakw bc̱hejeꞌ ḻegakeꞌ lo yel c̱hoḻaꞌ latjaꞌ ganaꞌ nsejeꞌ ḻegakeꞌ, naꞌ nanꞌ nkwezeꞌ ḻegakeꞌ ax̱t katꞌ illin lla wc̱hogloeꞌ c̱hegakeꞌ.
5 Ni bi wxiꞌxeneꞌ c̱he beṉꞌ yell-liokaꞌ kaniꞌyi, san beneꞌ yejsiwꞌ walaꞌ blliayee beṉꞌ malkaꞌ. Per dii Noénaꞌ, beenaꞌ wdix̱jeꞌi beṉꞌ nan chiyaḻꞌ gongakeꞌ wen, Chiozaꞌ bisleꞌneꞌ len zi gall beṉꞌ.
6 Ḻekzkaꞌ Chiozaꞌ bc̱hogloeꞌ c̱he beṉꞌkaꞌ lleꞌ yell Sodómanaꞌ naꞌch yell Gomórranaꞌ, naꞌ bzey btieꞌ yellkaꞌ ax̱t ka biyakgakan de, kwenc̱he ileꞌi beṉꞌ ka gak c̱he beṉꞌ malkaꞌ.
7 Per bisleꞌ dii Lotaꞌ, beenaꞌ gok beṉꞌ wen, beenaꞌ bwiyi dii zbankaꞌ ben beṉꞌ malkaꞌ.
8 Naꞌ beṉꞌ wenni wzoa ladjeꞌkaꞌ, gokyeshii ḻoo yic̱hjlallꞌdoꞌenaꞌ ni c̱heyi dii malkaꞌ bleꞌileꞌ bengakeꞌ yogꞌ lla.
9 Yogꞌḻoḻ diiki chliꞌgakan nan X̱anchonaꞌ ṉezileꞌ nak goneꞌ yisleꞌ beṉꞌkaꞌ chon ka chazlallee lawi bittezə dii lallj. Naꞌ ḻekzkaꞌ ṉezileꞌ nak wkwezeꞌ beṉꞌ malkaꞌ ax̱t katꞌ illin lla wc̱hogloeꞌ c̱he yogꞌḻoḻ beṉꞌ.
10 Naꞌ dii llialote wsakꞌziꞌch X̱anchonaꞌ beṉꞌkaꞌ choeꞌ choꞌa xbayi beli chen c̱heꞌkaꞌ daa nxiṉj yic̱hjlallꞌdoꞌekaꞌ, naꞌ bi cheentegakileꞌ no iṉabiaꞌ ḻegakeꞌ. Beṉꞌkaꞌ bibi nalli naꞌ nakgakeꞌ beṉꞌ chaꞌsib, naꞌ ni bi chllebgakeꞌ iṉegakeꞌ c̱he anjlkaꞌ.
11 San anjlkaꞌ, ḻaꞌkzi nakchgakeꞌ beṉꞌ walch naꞌ napchgakeꞌ yeḻꞌ wak xench, bi chiyaxjgakileꞌ iṉegakeꞌ c̱he anjlkaꞌ bi bzenag kwenc̱he gaogakeꞌ xya c̱hegakeꞌ lao Chiozaꞌ.
12 Per beṉꞌki chṉetezgakeꞌ zban c̱he diikaꞌ bi chajniꞌgakileꞌ. Nakgakeꞌ ka bayix̱ꞌkaꞌ bakaꞌ bi nteyi, bakaꞌ chaljgakb naꞌ chzen beṉꞌ ḻegakb naꞌ chitgakeꞌb. Kaꞌkzan gak c̱he beṉꞌkaꞌ, ḻekzkaꞌ kwiayiꞌgakeꞌ.
13 Naꞌ ikaagakeꞌ laxji dii malaꞌ ba bengakeꞌ. Beṉꞌki chakgakileꞌ zix̱ sia choeꞌgakeꞌ choꞌa xbayi beli chen c̱heꞌkaꞌ ax̱t tellatekzə. Naꞌ katꞌ chlengakeꞌ leꞌ cheej chaole, bi nxe bi nzakꞌ nakgakeꞌ daa chibagakileꞌ chongakeꞌ daa nazan c̱hegakeꞌ.
14 Nottezə noolə ileꞌgakileꞌ chzelallꞌgakeꞌneꞌ, naꞌ bi chelj chllaꞌgakileꞌ gongakeꞌ saaxyanaꞌ. Naꞌ chgooyeḻꞌgakeꞌ beṉꞌkaꞌ biṉꞌ gakcha lo xṉez Chiozaꞌ kwenc̱he gongakeꞌ dii malaꞌ, naꞌ ḻe chzelallꞌgakeꞌ gatꞌ kweꞌgakileꞌ. Beṉꞌki chon kaꞌ ba nakten kwiayiꞌgakeꞌ.
15 Ba wlej yic̱hjgakeꞌ nez ḻi c̱he Chiozaꞌ naꞌ ba zejgakeꞌ lo nez daa wyoo Balaamaꞌ xiiṉ Beoraꞌ, beenaꞌ wyoolallꞌ shoꞌ laxjeꞌ c̱he dii malaꞌ beneꞌ.
16 Naꞌ ni c̱he dii malaꞌ nan goneꞌ, to burr, ba bi chak iṉe, wṉeb ka beṉꞌ naꞌ bsheshlem ḻeꞌ kwenc̱he bi goneꞌ dii malaꞌ ba ngoo yic̱hjeꞌ goneꞌ daa nc̱hoḻ nitileꞌ.
17 Beṉꞌ malki zaklebgakileꞌ bejaꞌ daa bich bi nis chal, naꞌ ka bejkaꞌ choaꞌ beꞌnaꞌ. Ba nchoglo c̱hegakeꞌ soagakeꞌ zejḻi kaṉi ganaꞌ ḻiizelozi nak shgasj shc̱hoḻ.
18 Chṉegakeꞌ chaꞌsibə choeꞌgakeꞌ dillꞌ dii bibi zakii, naꞌ chgooyeḻꞌgakeꞌ beṉꞌkaꞌ kayaadia ba bichejgakeꞌ ladj beṉꞌkaꞌ chon dii malaꞌ kwenc̱he sto shii yizologakeꞌ yiyoeꞌgakeꞌ choꞌa xbayi beli chen c̱heꞌkaꞌ.
19 Naꞌ cheꞌgakeꞌ wak gongakeꞌ daa nazan c̱hegakeꞌ, ḻaꞌ aga bi xya c̱he dii malaꞌ de, naꞌ ḻeꞌyeṉꞌgakenꞌ ntakw nc̱hej dii malaꞌ. Ḻaꞌ nottezə beṉꞌ choneꞌ kon ka na daa chṉabiaꞌ ḻeꞌ, ba ndoꞌe lawinnaꞌ.
20 Naꞌ beṉꞌkaꞌ ba biyell bilaꞌgakeꞌ lao dii malaꞌ daa de yell-lioni daa ba benḻilallꞌgakeꞌ X̱ancho Jesucrístonaꞌ, beenaꞌ bisla choꞌ, shi sto shii yitakw yic̱hej dii malaꞌ ḻegakeꞌ, gaktechlə mal c̱hegakeꞌ aga ka gok c̱hegakeꞌ dii nech kanaꞌ biṉꞌ gonḻilallꞌgakeꞌneꞌ.
21 Wenchlan sheḻꞌ bi bembiaꞌkzgakeꞌ nez ḻi c̱he Chiozaꞌ aga ka daa bembiaꞌgakeꞌn naꞌ biḻaalaꞌogakeꞌ choꞌa xtilleenaꞌ daa bliꞌ bsedi beṉꞌ ḻegakeꞌ.
22 Naꞌ daa bengakeꞌ kaꞌ, billinin c̱he dillaa de daa na: “Bekwaa chiyaob daa biyebb, naꞌ kushaꞌ, banaꞌ ziꞌ gozj, chibix̱ chitoḻb ḻoo beṉjaꞌ sto shii.”