5
Ḻi wzenag dga, leꞌ beṉꞌ wniꞌa. ¡Ḻi gosyaadia kwell-le, daa ba zaꞌ yeḻꞌ ziꞌkaꞌ yen ileꞌile!
2 Yeḻꞌ wniꞌa c̱helenaꞌ ba goollꞌ bteban; naꞌ beḻ zidaa ba blliayiib xalaanlekaꞌ.
3 Or plat c̱helekaꞌ ba chasgakan bej. Naꞌ daa nakgakan kaꞌ, chaogakan xya c̱hele naꞌ wlliayiꞌgakan leꞌ ka chon yiꞌnaꞌ chzey chten. Ḻaꞌ ba bkwaꞌ btiꞌazle yeḻꞌ wniꞌanaꞌ ṉaa ba zoa kwiayiꞌ yell-lioni.
4 Daa bi beꞌle laxj beṉꞌkaꞌ biziꞌ bilap c̱helekaꞌ chawan xya c̱hele. Naꞌ X̱ancho Chiozaꞌ, beenaꞌ zeelo nap yeḻꞌ wak choo yeḻꞌ wak xen, ba bzenagueꞌ xyanaꞌ daa chao wen llinkaꞌ.
5 Yell-lioni ba weej wdaoshaoꞌle naꞌ ba beꞌ choꞌa xba beli chen c̱helekaꞌ. Ba beꞌlaꞌo kwinle ka beṉꞌ choeꞌlaꞌo to bayix̱ꞌ kwenc̱he witeꞌb gaweꞌb, naꞌ kanꞌ gak c̱hele, ba zoa kwiayiꞌle.
6 Ba bc̱hoglole c̱he beṉꞌdoꞌ bibi ben, naꞌ ba betle ḻegakeꞌ, ḻaꞌkzi bibi bengakeꞌ c̱hele.
7 Naꞌ leꞌ beṉꞌ bishꞌ naꞌ leꞌ beṉꞌ zanꞌ, ḻi gap yeḻꞌ chxenlallꞌ ax̱t katꞌ yiyedch X̱ancho Jesucrístonaꞌ. Beṉꞌ goz gooṉaꞌ noneꞌ lez yiziꞌ yilapeꞌ, naꞌ napeꞌ yeḻꞌ chxenlallꞌ chbezeꞌ gak yejaꞌ.
8 Kaꞌkzə leꞌ, chiyaḻꞌ gaple yeḻꞌ chxenlallꞌ naꞌ soac̱hec̱hle gonḻilallꞌle X̱ancho Jesucrístonaꞌ, ḻaꞌ ba zoa yiyedeꞌ.
9 Leꞌ beṉꞌ bishꞌ naꞌ leꞌ beṉꞌ zanꞌ, bi gaoz xya c̱he ljwell-le kwenc̱he bi wc̱hoglo Chiozaꞌ c̱hele. Ḻaꞌ ba zoa gaoshosh yiyed beenaꞌ wc̱hoglo c̱he beṉꞌ.
10 Leꞌ beṉꞌ bishꞌ naꞌ leꞌ beṉꞌ zanꞌ, ḻi wwia ka ben dii beṉꞌkaꞌ wdix̱jee daa goll X̱ancho Chiozaꞌ ḻegakeꞌ kaniꞌyi, wdapgakeꞌ yeḻꞌ chxenlallꞌ ḻaꞌkzi chiya dii wxakꞌziꞌgakeꞌ.
11 Dii ḻi, chakomba beṉꞌkaꞌ chizo chizaki yeḻꞌ zakꞌziꞌkaꞌ. Ba benkzile ka ben dii Jobaꞌ, bizo bizakileꞌ wdieꞌ lo yeḻꞌ zakꞌziꞌkaꞌ. Naꞌ ṉezkzile ka ben X̱ancho Chiozaꞌ c̱heꞌ biyoll wxakꞌziꞌe, ḻaꞌ X̱anchonaꞌ nakeꞌ ḻiizelozi beṉꞌ chiyeshꞌlallii.
12 Leꞌ beṉꞌ bishꞌ naꞌ leꞌ beṉꞌ zanꞌ, dii llialote dga: bi wzoazle de tasc̱hiw yabanaꞌ ni yell-lioni, ni sto dii yoblə kwenc̱he shajḻeꞌ beṉꞌ c̱hele. Katꞌ iṉale: “wakan”, kaꞌkzan gonle. Naꞌ katꞌ iṉale: “bi gakan”, ḻaꞌ bi gakkzannanꞌ, kwenc̱he bi gatꞌ xtoḻꞌle lao Chiozaꞌ.
13 Shi nole chak dii chak c̱hele, ḻi weꞌḻwill Chiozaꞌ. Naꞌ shi nole zoa mbalaz, ḻi goḻ iṉieꞌ.
14 Shi to beṉꞌ bi shawee, chiyaḻꞌ gaxeꞌ beṉꞌkaꞌ ngoo lallꞌ naꞌgakeꞌ beṉꞌkaꞌ nonḻilallꞌ Crístonaꞌ kwenc̱he weꞌḻwillgakeꞌ Chiozaꞌ ni c̱heꞌ, naꞌ c̱hebgakeꞌ yic̱hjeꞌnaꞌ setaꞌ naꞌ iṉabgakeꞌ yiyakileꞌ kon yeḻꞌ wak c̱he X̱ancho Jesucrístonaꞌ.
15 Naꞌ katꞌ weꞌḻwillgakeꞌ Chiozaꞌ naꞌ shajḻeꞌgakeꞌ goneꞌ daa chṉabgakeꞌ, naꞌ yiyaki beenaꞌ bi shaoꞌ, ḻaꞌ X̱anchonaꞌ yiyoneꞌneꞌ. Naꞌ shi ba bx̱iṉj bḻeneꞌ naꞌ yiyakxen c̱heꞌ.
16 Daan, ḻi yix̱oadoḻꞌ lao ljwell-le naꞌ ḻi weꞌḻwill Chiozaꞌ iṉab c̱he ljwell-le kwenc̱he yiyakile. Chiozaꞌ chzenagueꞌ c̱he beenaꞌ nak beṉꞌ ḻi beṉꞌ shaoꞌ, naꞌ choneꞌ daa chṉabileꞌneꞌ.
17 Elíazaꞌ, beenaꞌ wdix̱jee daa goll Chiozaꞌneꞌ kaniꞌyi, gokeꞌ beṉꞌ de beli chen ka choꞌ, naꞌ ka beꞌḻwilleꞌ Chiozaꞌ do yic̱hj do lallee wṉabileꞌneꞌ bi gak yejaꞌ, naꞌ bi gok yejaꞌ lo yell-lioni shoṉ yiz yo gashjə.
18 Naꞌ beꞌḻwilleꞌneꞌ sto shii, naꞌ bizolo yejaꞌ naꞌ biyashj biḻeb lo yell-lioni dii weej wdaogakeꞌ.
19 Leꞌ beṉꞌ bishꞌ naꞌ leꞌ beṉꞌ zanꞌ, shi tole yilaale lo nez ḻi c̱he Chiozaꞌ, naꞌ sto beṉꞌ yoblə yigwee leꞌ sto shii, to dii wenan choneꞌ.
20 Ḻaꞌ chiyaḻꞌ iṉezile beenaꞌ yigoyoeꞌ to beṉꞌ saaxya lo nez malaꞌ naꞌ yigweeneꞌ lo nez ḻinaꞌ, ba chakleneꞌneꞌ yileꞌ lo yeḻꞌ witaꞌ naꞌ yiyakxen saaxya c̱heꞌnaꞌ ḻaꞌkzi nakan dii zan.