4
¿Bic̱he chakile de wdiḻ wsheshaꞌ ladjlenaꞌ shi aga dii malkaꞌ lleꞌ llaꞌ ḻoo yic̱hjlallꞌdoꞌlenanꞌ chṉabiaꞌgakan leꞌ?
2 Chzelallꞌle bi gatꞌ c̱hele naꞌ bi chatilen. Sheḻꞌ wxeꞌile witle beṉꞌ naꞌ ikaale bi de c̱heꞌ, naꞌ chakxeꞌileꞌ bi de c̱he beṉꞌ. Naꞌ daa bi chatꞌ chbeꞌile daa chzelallꞌle gatꞌ c̱hele, chdiḻ chsheshlen ljwell-le. Naꞌ bibi chatꞌ chbeꞌile daa bi chṉabilen Chiozaꞌ.
3 Naꞌ katꞌ chṉabileneꞌn, bi choṉeꞌn daa ṉezileꞌ chṉablen kwenc̱hez gonditjlen weꞌle choꞌa xbayi beli chen c̱helenaꞌ.
4 Leꞌ beṉꞌ bi yootḻi lallin. ¿Abi ṉezile daa nonle txen dii malaꞌ de yell-lionin chonan ka chakzbanile Chiozaꞌ? Nottezə beṉꞌ cheenileꞌ goneꞌ txen dii malaꞌ de yell-lioni chakzbanileꞌ Chiozaꞌ.
5 Bi gakiloꞌ nazə Choꞌa Xtillꞌ Chiozaꞌ daa nan: “Daa ba ngoo Chiozaꞌ Espíritu c̱heꞌnaꞌ ḻoo yic̱hjlallꞌdoꞌchonin llialallee tozeꞌ ḻeꞌ wzenagcho c̱heꞌ.”
6 Per dii xen chakleneꞌ choꞌ, naꞌ Choꞌa Xtilleenaꞌ nan: “Chiozaꞌ bi chleꞌshiileꞌ beṉꞌkaꞌ chep chaꞌlallꞌ, per chakleneꞌ beṉꞌkaꞌ nak beṉꞌ gax̱jlallꞌ.”
7 Daan, ḻi wḻex̱j yic̱hjle lao Chiozaꞌ. Naꞌ ḻi soac̱hec̱h bi weꞌzle latj c̱he dii x̱iwaa, naꞌ yikwasan kaꞌlə.
8 Ḻi wx̱enilallꞌ Chiozaꞌ naꞌ soaleneꞌ leꞌ. Leꞌ beṉꞌ saaxya, ḻi yiyaj yileni c̱he dii malkaꞌ chonle. Naꞌ ka leꞌ cheenileꞌ gonḻilallꞌle Chiozaꞌ naꞌ gontele txen dii malaꞌ de yell-lioni, ḻi weꞌ latj yix̱is yiyib Chiozaꞌ yic̱hjlallꞌdoꞌlenaꞌ.
9 Ḻi gakyeshii naꞌ ḻi kwellyeshꞌ. Lwaa wxill-le ḻi kwellyeshꞌ. Ḻi yishaꞌ yeḻꞌ chiba chizaki c̱helenaꞌ yiyakan yeḻꞌ chakyeshii.
10 Ḻi gak beṉꞌ gax̱jlallꞌ lao X̱anchonaꞌ, naꞌ goneꞌ leꞌ beṉꞌ choo beṉꞌ xen.
11 Leꞌ beṉꞌ bishꞌ, bi kwell iṉe c̱he ljwell-le. Beenaꞌ chbell chṉe c̱he to beṉꞌ nakcho txen nonḻilallꞌcho Chiozaꞌ wa chiya chiyiljeꞌneꞌ, c̱he ley c̱he Chiozaꞌn chbell chṉieꞌ naꞌ chiya chiyiljeꞌn. Naꞌ shi kaꞌ chonoꞌ, lwaa wzenagoꞌ daa na leyaꞌ, ba chzoaz kwinoꞌ chc̱hogloꞌ c̱heyin.
12 Toz beenaꞌ zoa, beenaꞌ wdix̱j leyaꞌ, naꞌ naktieꞌ beṉꞌ chc̱hoglo c̱he beṉꞌ. Naꞌ ḻenꞌ wak yisleꞌ beṉꞌ wa wlliayeeneꞌ. Naꞌ liꞌ, ṉaa, ¿nora nakoꞌ yiya yiyiljzoꞌ bishꞌ ljwelloꞌnaꞌ?
13 Ḻi wzenag, ka leꞌ nale: “Ṉaa wa wx̱e shajcho yell yoblə naꞌ lljsoacho twiz lljencho delgens naꞌ goncho gan mech.”
14 Ni bi ṉezile bi gak c̱hele ka wx̱e. Yeḻꞌ mban c̱helenaꞌ nakan ka gopaa daa chbeꞌ xtitz naꞌ lii chinitten.
15 Kin chiyaḻꞌ iṉale: “Shi Chiozaꞌ wiꞌe latj ibanchcho, naꞌ goncho dga cheenicho goncho.”
16 Per latjin dii iṉale kaꞌ, chshalj chshonləle, naꞌ daa chshalj chshonle nakan mal.
17 Beenaꞌ ṉezi chiyaḻꞌ goneꞌ wen naꞌ bi choneꞌn, nakan xya lao Chiozaꞌ.