3
Leꞌ beṉꞌ bishꞌ naꞌ leꞌ beṉꞌ zanꞌ, bi shanzle selallꞌle gakle beṉꞌ chliꞌ chsedi, ḻaꞌ ba ṉezkzileꞌ katꞌ yiziꞌ Chiozaꞌ choꞌ kwent wsakꞌziꞌcheꞌ netoꞌ chliꞌ chsedintoꞌ beṉꞌ shi bi gonntoꞌ ka cheenileꞌ.
2 Yogꞌḻoḻcho chx̱iṉjcho. Naꞌ beenaꞌ bi chx̱iṉjeꞌ de choꞌa dillꞌ nakeꞌ to beṉꞌ ḻi beṉꞌ shaoꞌ, naꞌ ḻekzkaꞌ chak iṉabiꞌe doxen kwerp c̱heꞌnaꞌ.
3 Katꞌ chgoocho donaꞌ choꞌa kabayaꞌ kwenc̱he gom ka cheenicho, chzakicho chgoochob nezaꞌ ganaꞌ cheenicho shajb.
4 Naꞌ ḻekzkaꞌ ḻi wwiakachi barkwkaꞌ, ḻaꞌkzi nakgakan dii xen wal naꞌ chde beꞌ walaꞌ chlligaan diikaꞌ, beṉꞌkaꞌ chsaꞌ ḻegakan chdagakeꞌ toz yagdoꞌ xaninkaꞌ naꞌ chajgakan ganaꞌ cheengakileꞌ.
5 Kaꞌkzan chak c̱he ḻollꞌchoni. Ḻaꞌkzi nakan to diidoꞌzə, dii zan dii chshalj chshonan. Ṉezicho toz bzeyiꞌdoꞌ wak wzeyan to yix̱ꞌ diṉ xen wal.
6 Naꞌ ḻollꞌchoni nakan ka to yiꞌ. Naꞌ nakan to dii lliasheshꞌ chiya dii mal naꞌ chx̱iṉj chḻenan do ka nak beṉec̱haꞌ shlak mbaneꞌ daa chzenagueꞌ c̱he dii xiwaa.
7 Beṉec̱haꞌ chak gonmaxeꞌ yogꞌte bayix̱ꞌ, ka ba ze xan yabanaꞌ, ka ba chx̱ob ḻeꞌin, ka ba yoo ḻoo nisdoꞌnaꞌ. Per ḻaꞌkzi chṉabiꞌe ḻegakb,
8 bi chak iṉabiꞌe ḻolleenaꞌ. Nakan to dii mal dii bi cheeni no iṉabiaꞌ ḻen, naꞌ nakan ka yierb dii chitan beṉꞌ.
9 Chc̱hincho ḻollꞌchoni choeꞌlaꞌocho X̱acho Chiozaꞌ, beenaꞌ nak X̱ancho, naꞌ ḻekzkaꞌ chc̱hinchon chyishjcho biaꞌ blagꞌ c̱he beṉꞌkaꞌ bx̱e bsileꞌ, beṉꞌkaꞌ beneꞌ lwaa lsakee.
10 Choꞌa ḻollꞌchoni choeꞌlaꞌolenchon Chiozaꞌ naꞌ ḻekzkaꞌ ḻen chyishjan biaꞌ blagꞌ c̱he beṉꞌ. Leꞌ beṉꞌ bishꞌ naꞌ leꞌ beṉꞌ zanꞌ, bi chiyaḻꞌ goncho kaꞌ.
11 To ga chal nis, aga wak galan nis dii gak yeejcho naꞌ galten nis zxiꞌ.
12 Leꞌ beṉꞌ bishꞌdawaa naꞌ leꞌ beṉꞌ zandawaa, ṉezile to yag yix̱wew aga wbian daa neꞌ aceituna, naꞌ yag uvanaꞌ aga wak kwian yix̱wew. Naꞌ kaꞌkzə ganaꞌ chal nis zxiꞌnaꞌ aga walan dii gak yeejcho.
13 Shi ladjlenaꞌ zoa beṉꞌ sinꞌ, beṉꞌ chajnii, chiyaḻꞌ wliꞌen wsaꞌ c̱heꞌ wen naꞌ wḻex̱j yic̱hjeꞌ goneꞌ kon ka na yeḻꞌ sinꞌnaꞌ daa noeꞌ Chiozaꞌ ḻeꞌ.
14 Naꞌ shi weꞌle latj wx̱iṉj wḻen yeḻꞌ xeꞌnaꞌ yic̱hjlallꞌdoꞌlenaꞌ, naꞌ gonile beṉꞌ nakzi, bi chiyaḻꞌ wshalj wshonle iṉale naple yeḻꞌ sinꞌ daa choṉ Chiozaꞌ. Ḻaꞌ shi kaꞌ chonle aga dillꞌ ḻin choeꞌle.
15 Ka nak yeḻꞌ sinꞌnaꞌ daa nale naple, bi nakan dii beṉ Chiozaꞌ, san nakan de yell-liozə dii chalj yic̱hjlallꞌdoꞌlenaꞌ, naꞌ nakten c̱he dii x̱iwaa.
16 Ganaꞌ zoa beṉꞌkaꞌ chakxeꞌi ljwellgakeꞌ naꞌ chakdiḻgakeꞌ nogakenꞌ mbejlawi, nanꞌ chxe wdiḻ wishesh naꞌ chiya dii mal.
17 Beṉꞌkaꞌ nap yeḻꞌ sinꞌ daa choeꞌ Chiozaꞌ, nakgakeꞌ beṉꞌ chon ka cheenileꞌ, naꞌ bi nakgakeꞌ beṉꞌ wishagdiḻ. Nakgakeꞌ beṉꞌ wen, beṉꞌ wizoa dillꞌ, beṉꞌ chiyeshꞌlallii beṉꞌ, naꞌ aga nakzi beṉꞌ chakgakileꞌ, naꞌ nakgakeꞌ beṉꞌ chda do lallii.
18 Beṉꞌkaꞌ chon to dii byen soalen ljwellgakeꞌ mbalaz, naꞌ ḻekzkaꞌ chongakeꞌ ka soalen ljwell beṉꞌ yoblə mbalaz, siꞌgakeꞌ banez goni beṉꞌ ḻegakeꞌ wen, naꞌ soagakeꞌ mbalaz.