2
Leꞌ beṉꞌ bishꞌ naꞌ leꞌ beṉꞌ zanꞌ, ka leꞌ chonḻilallꞌle X̱ancho Jesucrístonaꞌ, beenaꞌ yoo balaaṉ xennaꞌ, aga nakzi beṉꞌ gakile.
2 Shi ganaꞌ ndop nllagle yidə to beṉꞌ nllin xbeneꞌnaꞌ niy de or naꞌ nakw xalaaneꞌ dii wen, naꞌ ḻekzkaꞌ yidə to beṉꞌ yeshꞌdoꞌ naꞌ nakweꞌ xalaaneꞌ dii ba bidaꞌ bichollee,
3 naꞌ chleꞌshiꞌchile beenaꞌ ḻe nak xalaaninnaꞌ, naꞌ cheꞌleneꞌ: “Wcheꞌ latji gani nak wen”, naꞌ cheꞌle beṉꞌ yeshꞌdoꞌnaꞌ: “Naꞌzə wze, liꞌ”, wa ba cheꞌleneꞌ: “Lo yo naꞌtezə wcheꞌ”,
4 ¿aaga nakzin ba chleꞌile baḻ beṉꞌ daa chwia chyile nak nakeꞌ, naꞌ ba chzaꞌlallꞌle c̱hegakeꞌ?
5 Leꞌ beṉꞌ bishꞌdawaa naꞌ leꞌ beṉꞌ zandawaa, ḻi wzenag dga: Chiozaꞌ ba wlejeꞌ beṉꞌdoꞌkaꞌ nak beṉꞌ yeshꞌ yell-lioni kweṉche do yic̱hj do lallꞌgakeꞌ gonḻilallꞌgakeꞌneꞌ naꞌ soalengakeꞌneꞌ ganaꞌ chṉabiꞌe, kon ka ba bc̱hebeꞌ goneꞌ c̱he beṉꞌkaꞌ chakgakileꞌneꞌ.
6 Naꞌ leꞌ, chonzile ḻegakeꞌ nakzi. ¿Aaga beṉꞌ wniaꞌkanꞌ chsakꞌziꞌgakeꞌ leꞌ naꞌ chjtaogakeꞌ xya c̱hele lao beṉꞌkaꞌ chṉabiaꞌ?
7 ¿Aaga ḻegakenꞌ chbell chṉegakeꞌ mal c̱he X̱anchonaꞌ, beenaꞌ nakcho lallꞌ nee, beenaꞌ ḻe zakii?
8 Dii wen inlleban chonle shi dii ḻi chonle daa llialote nllia Choꞌa Xtillꞌ Chiozaꞌ biaꞌ gonle daa nan: “Goki bishꞌ ljwelloꞌnaꞌ ka chaki kwinoꞌ.”
9 Per shi nakzi beṉꞌ gakile, chx̱iṉj chḻenle, naꞌ ba de xtoḻꞌle daa bi chonle ka na ley c̱he Chiozaꞌ.
10 Shi to beṉꞌ zejeꞌ choneꞌ yogꞌte daa nllia ley c̱he Chiozaꞌ biaꞌ, per shi ton bi goneꞌ, doxente leyaꞌ chawan xya napeꞌ doḻꞌ.
11 Chios, beenaꞌ wna: “Bi chiyaḻꞌ iṉelenoꞌ beṉꞌ yoblə”, ḻekzkaꞌ wneꞌ: “Bi witoꞌ beṉꞌ.” Naꞌ shi chitoꞌ beṉꞌ, ḻaꞌkzi bi chṉelenoꞌ beṉꞌ yoblə, chyishjoꞌ daa nllia ley c̱heꞌnaꞌ biaꞌ.
12 Chiyaḻꞌ wshaljle wen naꞌ wsaꞌ c̱hele wen kon ka nllia leyaꞌ biaꞌ, ḻega beṉꞌ ṉezi wllin to lla leyaꞌ daa chisell chiḻaꞌ choꞌ lao dii malaꞌ, wc̱hoglon c̱hecho.
13 Beṉꞌkaꞌ bi chiyeshꞌlallii beṉꞌ, ḻekzkaꞌ Chiozaꞌ bi yiyeshꞌlallileꞌ ḻegakeꞌ llanaꞌ wc̱hogloeꞌ c̱he beṉꞌ. San beṉꞌkaꞌ chiyeshꞌlallii beṉꞌ, Chiozaꞌ yiyeshꞌlallileꞌ ḻegakeꞌ.
14 Leꞌ beṉꞌ bishꞌ naꞌ leꞌ beṉꞌ zanꞌ, bibi zjanayin iṉaz beṉꞌ nonḻilallee Chiozaꞌ shi bi nḻaꞌ dii wennaꞌ choneꞌ. ¿Awak to daa nonḻilallꞌzeꞌ yislan ḻeꞌ shi bi choneꞌ wen?
15 Iṉatezcho to beṉꞌ byo wa to noolə, beṉꞌ nakcho txen nonḻilallꞌcho Jesucrístonaꞌ, bibi xalaaneꞌ de naꞌ chyalljte dii yeej gaweꞌ ka ṉaa ka wx̱e.
16 Naꞌ tole yeꞌleneꞌ: “Soashgoꞌ mbalaz, naꞌ gatꞌshga xalaanoꞌ naꞌ dii yeej gawoꞌ”, naꞌ bi weꞌleneꞌ daa chyalljileꞌ, bibi zejin yeꞌzleneꞌ kaꞌ.
17 Kaꞌkzan beenaꞌ nonḻilallee Chiozaꞌ, shi bi choneꞌ daa nak wen, bibi zjanayin neꞌ nonḻilalleeneꞌ.
18 Zoa beṉꞌ iṉeꞌ: “Liꞌ noꞌ nonḻilalloo Chiozaꞌ, naꞌ nadꞌ chonꞌ daa nak wen. Aga wakbeꞌi beṉꞌ shi nonḻilalloo Chiozaꞌ shi bi chonoꞌ daa nak wen. San nadꞌ, daa chonꞌ daa nak wen chliꞌa nonḻilallaa Chiozaꞌ.”
19 Liꞌ chajḻiꞌo toz Chiozanꞌ zoa, naꞌ wenkzan chonoꞌ chajḻiꞌo. Ḻekzkaꞌ dii xiwꞌkaꞌ chajḻeꞌgakan naꞌ ḻe chllebgakan.
20 Bi gonoꞌ ka beṉꞌ bi nteyi. Chiyaḻꞌ gakbeꞌiloꞌ shi bi chonoꞌ daa nak wen, bibi zjanayin noꞌ chajḻiꞌo c̱he Chiozaꞌ.
21 Daa bzani dii x̱ozxtoꞌcho Abrahamaꞌ xiiṉeꞌ Isaacaꞌ, bc̱hiꞌebꞌ lo yaanaꞌ nan lljeteꞌbꞌ ka goll Chiozaꞌneꞌ goneꞌ, naꞌ wna Chiozaꞌ nak dii Abrahamaꞌ beṉꞌ wen laweꞌnaꞌ.
22 ¿Abi chakbeꞌiloꞌ daa benḻilallꞌ dii Abrahamaꞌ Chiozanꞌ, bzanileꞌ xiiṉeꞌnaꞌ? Naꞌ daa beneꞌ kaꞌ, bliꞌen nan dii ḻicha nonḻilallee Chiozaꞌ.
23 Naꞌ billinin daa nyoj ḻee Choꞌa Xtillꞌ Chiozaꞌ daa nan: “Abrahamaꞌ wyajḻiꞌe c̱he Chiozaꞌ, naꞌ Chiozaꞌ wneꞌ nakeꞌ beṉꞌ ḻi beṉꞌ shaoꞌ laweꞌnaꞌ.” Naꞌ wnagakeꞌ c̱heꞌ gokeꞌ to beṉꞌ bllagui Chiozaꞌ.
24 Naꞌ chakbeꞌile beenaꞌ chonḻilallee Chiozaꞌ nakeꞌ beṉꞌ wen laweꞌnaꞌ shi choneꞌ ka cheenileꞌ, naꞌ aga to daa iṉazeꞌ nonḻilalleeneꞌ.
25 Kaꞌkzə gok c̱he noolə wdanaꞌ wle Rahab. Chiozaꞌ wneꞌ nakeꞌ beṉꞌ ḻi beṉꞌ shaoꞌ daa bkwashee ḻoo lilleꞌnaꞌ beṉꞌkaꞌ jawia jayi lalleꞌnaꞌ, naꞌ bigwee ḻegakeꞌ to nez yoblə ka bichejgakeꞌ lalleꞌnaꞌ kwenc̱he kono bet ḻegakeꞌ.
26 Ka chak c̱he to kwerp, shi bi yoon bishbe, netan, kaꞌkzan beenaꞌ to nonḻilallꞌzeꞌ Chiozaꞌ naꞌ bi choneꞌ ka cheenileꞌ, bibi zjanayin nonḻilalleeneꞌ.