3
Bisaꞌlallꞌgakeꞌ wḻex̱j yic̱hjgakeꞌ lao beṉꞌkaꞌ chṉabiaꞌ, naꞌ gakgakeꞌ beṉꞌ wizoa dillꞌ, naꞌ segakeꞌ wṉeyi gongakeꞌ daa nak wen.
2 Bibi gon iṉazgakeꞌ c̱he beṉꞌ, san soalengakeꞌ beṉꞌ mbalaz naꞌ gongakileꞌ ḻegakeꞌ wen, naꞌ gakgakeꞌ beṉꞌ gax̱jlallꞌ lao yogꞌḻoḻ beṉꞌ.
3 Ḻekzkaꞌ choꞌ, kanaꞌ gokcho beṉꞌ bi nteyi naꞌ beṉꞌ bi bzoa dillꞌ, naꞌ goshꞌ wlallꞌcho lao dii malaꞌ, naꞌ btakw bc̱hej biya diikaꞌ bibayi beli chen c̱hechonaꞌ choꞌ, naꞌ gokcho beṉꞌ xeꞌ. Gokzbani beṉꞌ choꞌ naꞌ gokzbani ljwellcho ganga.
4 Naꞌ Chiozaꞌ, beenaꞌ bisla choꞌ kwenc̱he bi kwiayiꞌcho, bliileꞌ choꞌ yeḻꞌ beṉꞌ wen c̱heꞌnaꞌ len yeḻꞌ chaki c̱heꞌnaꞌ.
5 Aga iṉacho daa bencho dii wennanꞌ bisleꞌ choꞌ, san daa biyeshꞌlallꞌlileꞌ choꞌn. Naꞌ bix̱is biyibeꞌ yic̱hjlallꞌdoꞌchonaꞌ kwenc̱he biyakcho beṉꞌ wen, naꞌ Espíritu Santo c̱heꞌnaꞌ bikobeꞌ yeḻꞌ mban c̱hechonaꞌ.
6 Naꞌ daa wit Jesucrístonaꞌ, beenaꞌ bisla choꞌ, Chiozaꞌ bzoeꞌ Espíritu Santo c̱heꞌnaꞌ ḻoo yic̱hjlallꞌdoꞌchoki.
7 Naꞌ daa biyeshꞌlallileꞌ choꞌ, biyoneꞌ choꞌ beṉꞌ ḻi beṉꞌ shaoꞌ kwenc̱he goncho lez ikaacho yeḻꞌ mbannaꞌ nak zejḻi kaṉi.
8 Dillii nakan dii wx̱enlallꞌcho. Naꞌ cheenidꞌ gonoꞌ to dii byen wliꞌ wsediloꞌn beṉꞌkaꞌ chajḻeꞌ c̱he Chiozaꞌ kwenc̱he segakeꞌ wṉeyi gongakeꞌ wen. Diikin nakgakan wen naꞌ gaklenan yogꞌ beṉꞌ.
9 Bi gakguedlenzoꞌ beṉꞌ ni c̱he choꞌa dillꞌkaꞌ chyiljlallꞌgakeꞌ, ni daa nazgakeꞌ ben dii x̱ozxtoeꞌkaꞌ daa bi chiyoll chido, ni bi gaklebiloꞌ beṉꞌkaꞌ chakguedz ni c̱he leyaꞌ daa bzej dii Moisézaꞌ. Ḻaꞌ bi chaklengakan beṉꞌ naꞌ bibi zakꞌgakan.
10 Naꞌ shi no chgoo beṉꞌkaꞌ dillꞌ kwenc̱he gakgakeꞌ c̱hoplə, chiyaḻꞌ weꞌlenoꞌneꞌ dillꞌ bich goneꞌ kaꞌ, naꞌ shi ba golloꞌneꞌ kaꞌ to c̱hop shii naꞌ bi chzenagkzeꞌ, bkwaschokleꞌ kaꞌlə.
11 Ḻaꞌ ṉezicho to kwinzenꞌ chlliayiꞌ kwineꞌ daa nxiṉj yic̱hjlallꞌdoꞌenaꞌ naꞌ chontieꞌ dii malaꞌ.
12 Katꞌ wseḻaa Artémazaꞌ wa Tíquiconaꞌ ganaꞌ zoꞌ, ben to dii byen yidwioꞌ nadꞌ yell Nicópolizaꞌ, ḻaꞌ naꞌ ba nc̱hoglallaa lljsoaꞌ shlak te beoꞌkaꞌ chbeꞌ dii zagaꞌ.
13 Goklengach ga zeelo gakoꞌ Zénazaꞌ, beenaꞌ nsed ley c̱he Rómanaꞌ, naꞌch Apólozaꞌ. Beꞌgakeꞌ daa chyallj chc̱hingakileꞌ kwenc̱he koochgakeꞌ nez naꞌ bibi iyalljgakileꞌ.
14 Naꞌ ḻekzkaꞌ beṉꞌkaꞌ nakcho toz chiyaḻꞌ shoꞌlogakeꞌ gongakeꞌ daa nak wen naꞌ gaklengakeꞌ beṉꞌ shi bi chyallj chc̱hingakileꞌ kwenc̱he kaꞌ wgongakeꞌ llin daa ba nsedgakeꞌ.
15 Yogꞌḻoḻ beṉꞌki zoalen nadꞌ ni chwapgakeꞌ liꞌ chiox. Bwapgach chiox yogꞌḻoḻ beṉꞌkaꞌ lleꞌ naꞌ, beṉꞌkaꞌ chakgakileꞌ choꞌ daa nakcho txen chonḻilallꞌcho Crístonaꞌ. Chiozaꞌ gaklenshgueꞌ yogꞌḻoḻ-le. Kaꞌ gakan.