6
Yogꞌḻoḻ beṉꞌkaꞌ ndoo lla yel chongakeꞌ xshin beṉꞌ naꞌ ba chonḻilallꞌgakeꞌ Crístonaꞌ, chiyaḻꞌ shoꞌ yic̱hjgakeꞌ gapgakeꞌ x̱aneꞌkaꞌ balaaṉ kwenc̱he bibi gon iṉaz beṉꞌ c̱he Chiozaꞌ naꞌ c̱heyi daa chliꞌ chsedicho.
2 Naꞌ shi x̱aneꞌkaꞌ nonḻillꞌgakeꞌ Crístonaꞌ, ḻaꞌkzi ba nakgakeꞌ beṉꞌ bishꞌgakeꞌ daa chonḻilallꞌgakeꞌ Crístonaꞌ, chiyaḻꞌkz gapgakeꞌ ḻegakeꞌ balaaṉ, naꞌ chiyaḻꞌ gonchləgakeꞌ xshineꞌkaꞌ do yic̱hj do lallꞌgakeꞌ daa chakgakileꞌ ḻegakeꞌ naꞌ ṉezgakileꞌ beṉꞌkaꞌ siꞌ banez xshineꞌkaꞌ nakgakeꞌ beṉꞌ nonḻilallꞌ Crístonaꞌ. Dgan chiyaḻꞌ wliꞌ wsediloꞌ ḻegakeꞌ naꞌ yeꞌgakoꞌneꞌ gongakeꞌn.
3 Shi no chliꞌ chsedi dii nak nllaꞌlə naꞌ bi chidiḻin daa bliꞌ bsedi X̱ancho Jesucrístonaꞌ, naꞌ bi chidiḻtein daa chsedi choꞌ goncho ka cheeni Chiozaꞌ,
4 beenaꞌ chon kaꞌ nakeꞌ beṉꞌ chep chaꞌlallꞌ, beṉꞌ bibi ṉezi. Naꞌ daa ḻe chibaileꞌ gakdiḻ-leneꞌ beṉꞌ, chx̱ieꞌ daa nak yeḻꞌ xeꞌ, yeḻꞌ wishagdiḻ, yeḻꞌ chbell chṉe c̱he beṉꞌ, naꞌ yeḻꞌ chzaꞌlallꞌ mal c̱he beṉꞌ.
5 Naꞌ biga yiyoll yido gakdiḻ-leneꞌ beṉꞌ daa ba nxiṉj yic̱hlallꞌdoꞌenaꞌ, naꞌ bi nombiꞌe daa nak dii ḻi. Naꞌ chakileꞌ daa chonzeꞌ ka chliꞌ chsedi c̱he Chiozaꞌ gatileꞌ mech xen.
6 Dii ḻi, ḻe mbalaz soacho shi goncho ka cheeni Chiozaꞌ naꞌ goncho banez kaꞌkꞌ to dii de c̱hecho.
7 Ḻaꞌ to ka chaꞌzchon goljcho yell-lioni, naꞌ to ka chaꞌzchon yizaꞌcho.
8 Shi de dii cheej chaocho naꞌ de xalaancho, chiyaḻꞌ goncho banez.
9 Naꞌ beṉꞌkaꞌ cheeni gak beṉꞌ wniꞌa, chxopgakeꞌ lawi daa nak yeḻꞌ wzelallꞌ naꞌ llialallꞌgakeꞌ biya dii bi yejniꞌalallii daa chx̱iṉj chḻenan ḻegakeꞌ, naꞌ chtakw chc̱hejan ḻegakeꞌ naꞌ chbiayiꞌlengakeꞌn.
10 Lo yeḻꞌ wzelallꞌ mechaꞌ chalj chxe biya dii bi yejniꞌalallii. Baḻ beṉꞌ, yeḻꞌ wzelallꞌ c̱heꞌkaꞌ, ba bilaagakeꞌ lo xṉez Chiozaꞌ naꞌ ba chileꞌgakileꞌ zan yeḻꞌ ziꞌ.
11 Per liꞌ chonoꞌ xshin Chiozaꞌ, biga gonoꞌ ka chon beṉꞌkaꞌ, san ben daa nak dii ḻicha, ben ka cheeni Chiozaꞌ, wzoatezi wzoa benḻilallee, wdap yeḻꞌ chaki, gok wal lao yogꞌḻoḻ dii idiḻ illagoꞌ, naꞌ gok beṉꞌ gax̱jlallꞌ.
12 Btiplalloo naꞌ ben to dii byen gonoꞌ daa cheeni Chiozaꞌ, beenaꞌ nonḻilalloo. Naꞌ beꞌḻ-lallꞌ beni c̱hoꞌ daa nak yeḻꞌ mban zejḻi kaṉi. Ḻaꞌ ni c̱heyinnanꞌ gox wṉab Chiozaꞌ liꞌ naꞌ biꞌo dillꞌ lao beṉꞌ zan nan nonḻilalloo Crístonaꞌ.
13 Naꞌ ṉaa, lao Chiozaꞌ, beenaꞌ choeꞌ yeḻꞌ mban c̱he yogꞌte dii de yell-lioni, naꞌ lao Jesucrístonaꞌ, beenaꞌ beꞌ dillꞌ kon ka nakan lao Poncio Pilátonaꞌ, chonꞌ byen
14 wzoꞌ dillꞌ dga niaꞌ liꞌ, naꞌ seyi c̱hoꞌ chonoꞌ wen naꞌ bibi dii mal taꞌ ichenoꞌ ax̱t ni ka yilaꞌ X̱ancho Jesucrístonaꞌ.
15 Ḻaꞌ wllin lla yiyedeꞌ ka bllia Chiozaꞌ biaꞌ, Chios, beenaꞌ chidoḻꞌ weꞌlaꞌocho, beenaꞌ zeelo chṉabiaꞌ. Zeelo ḻenꞌ nakeꞌ X̱an yogꞌḻoḻ beṉꞌ, naꞌ chṉabiꞌe lao yogꞌḻoḻ beṉꞌ.
16 Tozeꞌ ḻenꞌ biga llia te c̱heꞌ, naꞌ zoeꞌ lo beeniꞌ xen walaꞌ daa kono chzoi wwia. Ni tlishꞌ beṉec̱h biṉꞌ ileꞌileꞌneꞌ ni bi gak ileꞌgakileꞌneꞌ. Ḻenꞌ chidoḻee shoꞌe balaaṉ zejḻi kaṉi naꞌ biga llia te yeḻꞌ wṉabiaꞌ c̱heꞌnaꞌ. Kanꞌ nakan.
17 Beṉꞌkaꞌ chleꞌi yeḻꞌ wniꞌanaꞌ yell-lioni, gollgakeꞌ bi gakgakeꞌ beṉꞌ chaꞌsibə, ni bi gongakeꞌ lez yeḻꞌ wniꞌa c̱heꞌkaꞌ. Ḻaꞌ yeḻꞌ wniꞌanaꞌ bi nakan lez. San chiyaḻꞌ gongakeꞌ lez Chios yaa Chios bannaꞌ. Ḻenꞌ choneꞌ zoayaa zoallin yogꞌḻoḻ daa chyallj chc̱hinicho kwenc̱he siꞌchon banez.
18 Gollgakeꞌ gongakeꞌ wen, naꞌ koo yic̱hjgakeꞌ wzanchgakeꞌ dii wenkaꞌ chongakeꞌ, naꞌ segakeꞌ wṉeyi izangakileꞌ weꞌgakeꞌ beṉꞌ dii de c̱hegakeꞌ.
19 Naꞌ daa gongakeꞌ kaꞌ, naꞌchan saki gongakeꞌ lez daa ziꞌ zaꞌ, naꞌ idoḻꞌgakileꞌ yeḻꞌ mban daa nak dowalj.
20 Timoteo, wlooshosh yic̱hjoꞌ dga ba wniaꞌ liꞌ. Bi wzenagoꞌ dillꞌkaꞌ bi yejniꞌalallii naꞌ bibi zakaan, ni bi wzenagoꞌ xtillꞌ beṉꞌkaꞌ chonzə ka nap yeḻꞌ sinꞌ.
21 Baḻ beṉꞌ ba wyajḻeꞌgakeꞌ choꞌa xtilleekaꞌ naꞌ ba bilaagakeꞌ lo xṉez Chiozaꞌ.
Chiozaꞌ gaklenshgueꞌ leꞌ naꞌ goneꞌ ka gak wen c̱hele.