5
Bi iṉezoꞌ zibiaꞌ beṉꞌ golkaꞌ, san beꞌlengakeꞌ dillꞌ xochi ka beṉꞌ chshaljlen x̱ayin. Naꞌ goni beṉꞌ bishoo beṉꞌ xkwidꞌkaꞌ.
2 Naꞌ goni xṉoo noolkaꞌ ba ngolch ka liꞌ, naꞌ goni beṉꞌ zanoꞌ nool xkwidꞌkaꞌ, naꞌ bibi dii mal saꞌlalloo.
3 Goklen nool wizebkaꞌ, beṉꞌkaꞌ kono zoa c̱hegakeꞌ.
4 Per shi zoa xiiṉ xsoagakeꞌ, chonan byen iṉezgakibꞌ chiyaḻꞌ gap wwiagakbꞌ ḻeꞌ, ḻaꞌ ḻenꞌ bisgoleꞌ ḻegakbꞌ. Ḻaꞌ kanꞌ chazlallꞌ Chiozaꞌ goncho.
5 Nool wizebaꞌ, beenaꞌ kono zoakz c̱heyin, beenaꞌ bgaaṉ tlishꞌ tyaj, chx̱enilallee Chiozaꞌ naꞌ ka tella ka waḻ choeꞌḻwilleꞌneꞌ naꞌ chatꞌyoileꞌneꞌ gakleneꞌneꞌ.
6 Per nool wizebaꞌ, beenaꞌ choeꞌ choꞌa xbayi beli chen c̱heꞌnaꞌ, nakeꞌ ka beṉꞌ net lao Chiozaꞌ ḻaꞌkzi mbaneꞌ.
7 Bzajniꞌgakileꞌ dga kwenc̱he bibi gon iṉaz beṉꞌ c̱hegakeꞌ.
8 Ḻaꞌ beenaꞌ bibi wṉeyi ze c̱he no dialla c̱heꞌ naꞌ c̱he beṉꞌkaꞌ nakyeṉee txen ḻoo yoo lilleꞌnaꞌ, ba wlej yic̱hjeꞌ daa nak c̱he Chios, shi kaꞌ choneꞌ, naꞌ ba nxiṉjtechlə yic̱hjlallꞌdoꞌenaꞌ aga ka beenaꞌ biṉꞌ shajḻeꞌ c̱he Chiozaꞌ.
9 Ḻee yishaꞌ ganaꞌ daꞌ le nool wizebkaꞌ chiyaḻꞌ taꞌ le beṉꞌkaꞌ ba wdeli guiyon yiz, beṉꞌkaꞌ ben banez kochno bikaagakeꞌ.
10 Chiyaḻꞌ seyi c̱hegakeꞌ chongakeꞌ wen: daa gok bisgol xiiṉeꞌkaꞌ, daa chiyeshꞌlallꞌgakileꞌ beṉꞌ choeꞌgakeꞌ ga yigaaṉgakeꞌ, daa chongakeꞌ bittez dii gaklenan beṉꞌkaꞌ nonḻilallꞌ Chiozaꞌ, ax̱t chyibgakeꞌ ṉiꞌekaꞌ, naꞌ daa chaklengakeꞌ beṉꞌkaꞌ chzakꞌziꞌ, naꞌ daa chongakeꞌ ka dii le chongakeꞌ yogꞌ daa nak wen.
11 Naꞌ bi wdoo le nool wizebkaꞌ ḻee yishaꞌ shi biṉꞌ gakgakileꞌ guiyon yiz. Ḻaꞌ zoa katꞌ weꞌgakeꞌ choꞌa xbayi beli chen c̱heꞌkaꞌ naꞌ yikaa c̱hegakeꞌ naꞌ bich gongakeꞌ kwasḻoḻ xshin Crístonaꞌ,
12 naꞌ gapgakeꞌ doḻꞌ lao Chiozaꞌ daa bi sakgakileꞌ gongakeꞌ ka ba bc̱hebgakeꞌ.
13 Naꞌ leyi chiyakgakeꞌ noolə lia naꞌ chdagakeꞌ to to yoo. Naꞌ aga toz daa, san ḻekzkaꞌ chc̱hitjgakeꞌ dillꞌ, naꞌ chjalaalli c̱hegakeꞌ dii chak c̱he beṉꞌ yoblə, naꞌ choeꞌgakeꞌ dillꞌ dii bi chiyaḻꞌ weꞌgakeꞌ.
14 Daan nool wizebkaꞌ ni zoa xḻatjin, cheenidꞌ yikaa c̱hegakeꞌ naꞌ yizoa xiiṉgakeꞌ, naꞌ koogakeꞌ xṉezi dii chak ḻoo yoo lillgakeꞌ, kwenc̱he bi wx̱aꞌgakeꞌ choꞌalao beṉꞌkaꞌ bi chonḻilallꞌ Chiozaꞌ.
15 Ḻaꞌ baḻ nool wizebkaꞌ ba bichejgakeꞌ lo xṉez Chiozaꞌ naꞌ ba zjanogakeꞌ Satanázaꞌlə.
16 Shi to beṉꞌ nonḻilallꞌ Chiozaꞌ zoa to dialla c̱heꞌ nool wizeb, chiyaḻꞌ gakleneꞌneꞌ kwenc̱he bi gakeꞌ to dii zii dii zshab c̱he beṉꞌkaꞌ nonḻilallꞌ Crístonaꞌ, naꞌ gak weꞌgakeꞌ daa chyallj chc̱hini nool wizebkaꞌ kono zoa c̱hegakeꞌ.
17 Ka nak beṉꞌkaꞌ ngoo lallꞌ naꞌgakeꞌ beṉꞌkaꞌ nonḻilallꞌ Crístonaꞌ, naꞌ chak chgoogakeꞌ xṉezin wen, chidoḻꞌgakeꞌ balaaṉ xen. Naꞌ beṉꞌkaꞌ noni xshingakeꞌ choeꞌgakeꞌ choꞌa xtillꞌ Chiozaꞌ naꞌ chliꞌ chsedgakileꞌ, balaaṉ xentechlə chidoḻꞌgakeꞌ.
18 Ḻaꞌ Choꞌa Xtillꞌ Chiozaꞌ nan: “Ka nak gooṉaꞌ banaꞌ chilaḻi chlej chshoshjb trígonaꞌ kwenc̱he ichej xayinnaꞌ, bi wllinle yix̱jaꞌ choꞌabaꞌ kwenc̱he gak koyob to c̱hop choꞌa.” Naꞌ ḻekzkaꞌ nan: “Beenaꞌ chon llinnaꞌ chidoḻee ikaa laxjeꞌ.”
19 Shi no chao xya c̱he to beṉꞌ ngoo lallꞌ naꞌ beṉꞌkaꞌ nonḻilallꞌ Crístonaꞌ, bi wzenagoꞌn shi bi zoa c̱hop shoṉ beṉꞌ yiziꞌ choꞌagakeꞌn.
20 Naꞌ shi ga zoa beṉꞌkaꞌ bi chsankzgakeꞌ dii malaꞌ, chiyaḻꞌ wsheshlenoꞌ ḻegakeꞌ katꞌ ndop nllagle kwenc̱he yogꞌḻoḻ beṉꞌkaꞌ nakle txen illebgakeꞌ naꞌ bi gongakeꞌ kaꞌ.
21 Chatꞌyoidꞌ liꞌ lao Chiozaꞌ, naꞌ lao Jesucrístonaꞌ naꞌ lao anjl c̱heꞌkaꞌ, toshiizi gonoꞌ diiki ba wniaꞌ. Naꞌ toz ka goniloꞌ yogꞌḻoḻ beṉꞌ, aga baḻzeꞌ gakiloꞌ.
22 Bi wx̱oazə noonaꞌ yic̱hj beenaꞌ cheeni gon xshin Chiozaꞌ shi bi ṉeziloꞌ nak nsaꞌ c̱heꞌ, kwenc̱he ki gakoꞌneꞌ txen shi choneꞌ dii malaꞌ. Wdapshii kwinoꞌ kwenc̱he ki taꞌ ichenoꞌ dii malaꞌ.
23 Daa chak ḻiꞌonaꞌ naꞌ daa zekizezi bi shawoo, bich yeejtekoꞌ toz nisaꞌ, san weej latꞌdoꞌ wej vinonaꞌ.