4
Espíritu c̱he Chiozaꞌ choꞌe dillꞌ kwasḻoḻ, neꞌ katꞌ ba zoa te c̱he yell-lioni, baḻ beṉꞌkaꞌ ba nonḻilallꞌgakeꞌ Crístonaꞌ bich gonḻilallꞌgakeꞌneꞌ, naꞌ wzenaggakeꞌ c̱he dii x̱iwꞌkaꞌ naꞌ diikaꞌ chliꞌ chsedi beṉꞌ c̱hegakin.
2 Naꞌ wzenaggakeꞌ c̱he beṉꞌ wxiyeꞌkaꞌ, beṉꞌkaꞌ bichbi chao chdian ḻegakeꞌ daa ba nḻantekzgakeꞌ yeḻꞌ wxiyeꞌnaꞌ.
3 Naꞌ chllongakeꞌ wshagnaꞌ beṉꞌ, naꞌ chllontegakeꞌ yeej gaogakeꞌ baḻ yeḻꞌ wao ḻaꞌkzi Chiozaꞌ wloꞌe yeḻꞌ waokaꞌ kwenc̱he choꞌ nonḻiꞌlallꞌchoneꞌ naꞌ nombiaꞌcho dillꞌ ḻi c̱heꞌnaꞌ gaochon naꞌ weꞌchoneꞌ yeḻꞌ chox̱ken.
4 Ḻaꞌ yogꞌḻoḻ daa bx̱e bsil Chiozaꞌ nakan wen, naꞌ bibi de dii iṉacho bi gak gaocho kon shi weꞌchoneꞌ yeḻꞌ chox̱ken katꞌ yeej gaochon.
5 Ḻaꞌ daa chajḻeꞌcho choꞌa xtillꞌ Chiozaꞌ naꞌ daa choeꞌḻwillchoneꞌ, chonḻeeyeꞌ yeḻꞌ wao c̱hechonaꞌ.
6 Shi dga wliꞌ wsediloꞌ bishꞌ ljwellchokaꞌ, naꞌ gakoꞌ to wen llin wen c̱he Jesucrístonaꞌ, naꞌ tollaꞌ ba nonoꞌ choꞌa xtillꞌ Chiozaꞌ ḻoo yic̱hjlallꞌdoꞌnaꞌ len dii wennaꞌ daa bsedoꞌ naꞌ zej chonoꞌn.
7 Naꞌ bi wzenagoꞌ bizə dillꞌ gol dii chseesꞌ beṉꞌ, diikaꞌ wdiljlallꞌgakeꞌ daa bi nak ka dii shajḻeꞌcho, san bsed gonoꞌ ka cheeni Chiozaꞌ.
8 Ṉezicho katꞌ chc̱hitj ṉiꞌa naꞌchoki chaklenan kwerp c̱hechoni. Per daa choncho ka cheeni Chiozaꞌ, dii xentechlə chaklenan choꞌ ṉaa zoacho yell-lioni naꞌ ḻekzkaꞌ katꞌ illin lla lljazoalenchoneꞌ.
9 Dillii nakan dii wx̱enlallꞌcho, naꞌ yogꞌ beṉꞌ chiyaḻꞌ shajḻiꞌen.
10 Naꞌ ni c̱heyinnanꞌ chonntoꞌ to dii byen chilaḻintoꞌ chonntoꞌ xshin Chiozaꞌ daa ba nonntoꞌ lez Chios yaa Chios bannaꞌ, beenaꞌ cheeni yisleꞌ yogꞌḻoḻ beṉꞌ, naꞌ beṉꞌkaꞌ chonḻilallꞌyeṉꞌ ḻenꞌ yisleꞌ.
11 Diikin chiyaḻꞌ yoo beṉꞌ gongakeꞌ naꞌ wliꞌ wsediloꞌ ḻegakeꞌ.
12 Bi weezoꞌ latj no ileꞌzi liꞌ nakzi daa nakoꞌ biꞌ wewꞌ, san ben wen lao beṉꞌkaꞌ nonḻiꞌlallꞌ Crístonaꞌ, ka de choꞌa dillꞌ, naꞌ yeḻꞌ nsaꞌ c̱heyin wen, naꞌ yeḻꞌ chaki beṉꞌ, naꞌ yeḻꞌ nonḻilallii Crístonaꞌ, ni bibi dii mal saꞌlalloo, kwenc̱he lengakeꞌ gongakeꞌ kaꞌ.
13 Shlak yidꞌ, ben ka dii le blab Choꞌa Xtillꞌ Chiozaꞌ lao beṉꞌkaꞌ chdop chllag, bliꞌ bsedgakileꞌ, naꞌ btip lallꞌgakeꞌ.
14 Bi guetlalloo daa ben Chiozaꞌ lallꞌ noꞌ kanaꞌ beṉꞌkaꞌ ngoo lallꞌ naꞌgakeꞌ beṉꞌkaꞌ nonḻilallꞌ Crístonaꞌ bx̱oa neekaꞌ yic̱hjoꞌnaꞌ bengakeꞌ liꞌ lallꞌ naꞌ Chiozaꞌ, naꞌ bchej beenaꞌ wdix̱jee nan Chiozaꞌ ba wlejeꞌ liꞌ gonoꞌ xshineꞌnaꞌ.