2
Leꞌ beṉꞌ bishꞌ naꞌ leꞌ beṉꞌ zanꞌ, ṉezkzile daa bidwiantoꞌ leꞌ bi biddadzntoꞌ.
2 Naꞌ ḻekzkaꞌ ṉezile ḻe wxakꞌziꞌntoꞌ yell Filípozaꞌ naꞌ biya dii wnagakeꞌ netoꞌ, per Chiozaꞌ gokleneꞌ netoꞌ naꞌ bi bllebntoꞌ wdix̱jeꞌintoꞌ leꞌ dillꞌ wen dillꞌ kob c̱he Jesucrístonaꞌ ḻaꞌkzi biya dii btiḻntoꞌ.
3 Naꞌ ka wdix̱jeꞌintoꞌn leꞌ, do yic̱hj do lallꞌntoꞌ beꞌlenntoꞌ leꞌ daa nak dillꞌ ḻi, naꞌ kono wxiyeꞌntoꞌ.
4 Ḻaꞌ Chiozaꞌ wlejeꞌ netoꞌ naꞌ bzoeꞌ netoꞌ weꞌntoꞌ dillꞌ wen dillꞌ kob c̱heꞌnaꞌ. Naꞌ aga chonntoꞌn kwenc̱he c̱hazlallꞌ beṉaan, san kwenc̱he c̱hazlallꞌ Chiozanꞌ, beenaꞌ nombiaꞌ yic̱hjlallꞌdoꞌntoꞌni.
5 Ṉezkzile, naꞌ Chiozaꞌ ṉez nḻeꞌileꞌ, ni shlin bigaṉꞌ weꞌlaꞌo weꞌ dillꞌntoꞌ leꞌ daa chzelallꞌntoꞌ bi de c̱hele.
6 Bi cheenintoꞌ no koo netoꞌ balaaṉ, ni leꞌ ni beṉꞌ yoblə. Daa nakntoꞌ postl c̱he Crístonaꞌ, zakꞌ wṉabintoꞌ leꞌ goṉle daa chyallj chc̱hinintoꞌ sheḻꞌkaꞌ, per bibi wnantoꞌ leꞌ.
7 San kanaꞌ wzoalenntoꞌ leꞌ benntoꞌ c̱hele ka chon to noolə chap chwieꞌ biꞌdoꞌ c̱heꞌkaꞌ xochi.
8 Naꞌ daa ḻe chakintoꞌ leꞌ, aga to daa beꞌlenzntoꞌ leꞌ dillꞌ wen dillꞌ kob c̱he Crístonanꞌ bibaintoꞌ, san ḻekzkaꞌ benntoꞌ ax̱t ga zeelo bizointoꞌ goklenntoꞌ leꞌ. Ḻaꞌ ḻe chakintoꞌ leꞌ.
9 Leꞌ beṉꞌ bishꞌ naꞌ leꞌ beṉꞌ zanꞌ, chjadinkzile ka bdeziꞌ kwinntoꞌ shlak wzoalenntoꞌ leꞌ kanaꞌ beꞌlenntoꞌ leꞌ dillꞌ wen dillꞌ kob c̱he Crístonaꞌ. Ka tella ka waḻ benntoꞌ llinnaꞌ kwenc̱he ni tole bi benintoꞌ zed.
10 Chiozaꞌ ṉez nḻeꞌileꞌ, naꞌ ḻekzkaꞌ leꞌ nonḻilallꞌle Crístonaꞌ, ṉezile do yic̱hj do lallꞌntoꞌ wzoantoꞌ ladjlenaꞌ, naꞌ benntoꞌ daa nak shḻi naꞌ bsaꞌ c̱hentoꞌ wen kwenc̱he kono biz gon iṉe c̱hentoꞌ.
11 Ḻekzkaꞌ ṉezile benintoꞌ to tole ka choni to beṉꞌ xiiṉeꞌkaꞌ
12 daa btipntoꞌ lallꞌle, naꞌ beṉntoꞌ leꞌ yeḻꞌ chxenlallꞌ, naꞌ ba beꞌlenntoꞌ leꞌ dillꞌ ka chiyaḻꞌ wsaꞌ c̱hele, leꞌ nonḻilallꞌle Chiozaꞌ, beenaꞌ gox leꞌ kwenc̱he iṉabiꞌe leꞌ naꞌ lljazoalenleneꞌ ganaꞌ ileꞌile ka nak balaaṉ xen c̱heꞌnaꞌ.
13 Naꞌ ḻekzkaꞌ toshiizi choeꞌntoꞌ Chiozaꞌ yeḻꞌ chox̱ken daa bleble choꞌa xtilleenaꞌ beꞌlenntoꞌ leꞌ, ḻaꞌ gokbeꞌileꞌ nakan choꞌa xtillꞌ Chiozaꞌ naꞌ aga choꞌa xtillꞌ beṉꞌ yell-lionizan. Naꞌ dii ḻi nakan choꞌa xtillꞌ Chiozaꞌ daa chishaꞌn yic̱hjlallꞌdoꞌchonaꞌ, choꞌ chonḻilallꞌchoneꞌ.
14 Naꞌ leꞌ beṉꞌ bishꞌ naꞌ leꞌ beṉꞌ zanꞌ, kanaꞌ bsakꞌziꞌ beṉꞌ wlall c̱helekaꞌ leꞌ, gok c̱hele ka gok c̱he beṉꞌ Judeakaꞌ, beṉꞌkaꞌ chdop chllag choeꞌlaꞌogakeꞌ Crístonaꞌ, ḻaꞌ beṉꞌ wlall c̱heꞌkaꞌ, beṉꞌ Israelkaꞌ, bsakꞌziꞌgakeꞌ ḻegakeꞌ daa nonḻilallꞌgakeꞌ Crístonaꞌ.
15 Ḻekzgakenꞌ betgakeꞌ X̱ancho Jesúzaꞌ naꞌ betgakeꞌ dii beṉꞌkaꞌ wdix̱jee daa goll Chiozaꞌ ḻegakeꞌ kaniꞌyi, naꞌ ḻekzkaꞌ blaggakeꞌ netoꞌ. Bi chongakeꞌ ka chazlallꞌ Chiozaꞌ naꞌ chleꞌzbangakileꞌ yogꞌḻoḻ beṉꞌ,
16 ḻaꞌ chsej chllongakeꞌ c̱hix̱jeꞌintoꞌ beṉꞌkaꞌ bi nak beṉꞌ Israel choꞌa xtillꞌ Chiozaꞌ kwenc̱he yilagakeꞌ naꞌ bi kwiayiꞌgakeꞌ. Naꞌ daa chongakeꞌ kaꞌ, chzanchgakeꞌ saaxya c̱heꞌkaꞌ, naꞌ daan, ba nakten ileꞌgakileꞌ yeḻꞌ zakꞌziꞌ walaꞌ weꞌ Chiozaꞌ.
17 Leꞌ beṉꞌ bishꞌ naꞌ leꞌ beṉꞌ zanꞌ, kanaꞌ bi wzoalenntoꞌ leꞌ shloll, ḻaꞌkzi bi bleꞌintoꞌ leꞌ, toshiizi jadinintoꞌ leꞌ naꞌ ḻe goklallꞌntoꞌ yidwiantoꞌ leꞌ.
18 Dii ḻi goklallꞌntoꞌ yidwiantoꞌ leꞌ, naꞌ nadꞌyeṉꞌ zan shii goklallaa yidwiaꞌ leꞌ, per Satanázaꞌ bsej bllonan yidꞌ.
19 Daa chonḻilallꞌle X̱ancho Jesúzaꞌ naꞌ zoale chonle wen daa beꞌlentoꞌ leꞌ xtilleenaꞌ, nonntoꞌ lez gonle ka yibaintoꞌ laweꞌnaꞌ katꞌ yiyedeꞌ.
20 Dii ḻi, chibaintoꞌ ka chonle naꞌ zoantoꞌ mbalaz ni c̱hele.