3
Naꞌ ka bich bi rson c̱hele de, bi wzoantoꞌ wen naꞌ beꞌntoꞌ dillꞌ yigaaṉntoꞌ to netoꞌzə Aténazaꞌ
2 naꞌ bseḻꞌntoꞌ beṉꞌ bishꞌcho Timotewaꞌ, beenaꞌ chonleneꞌ netoꞌ xshin Chiozaꞌ daa chyix̱jeꞌnto dillꞌ wen dillꞌ kob c̱he Crístonaꞌ. Bseḻꞌntoꞌneꞌ kwenc̱he yidtipeꞌ lallꞌle naꞌ goneꞌ ka soac̱hec̱hle gonḻilallꞌle Crístonaꞌ,
3 kwenc̱he ni tole bi gakllejile ni c̱he yeḻꞌ zakꞌziꞌkaꞌ chen chleꞌile. Ḻaꞌ ṉezkzile kanꞌ llia biaꞌ gak c̱hecho.
4 Naꞌ kanaꞌ ni zoalenntoꞌ leꞌ, bsiꞌnintoꞌ leꞌ nan wleꞌicho yeḻꞌ zakꞌziꞌkaꞌ, naꞌ ṉezile ba gok ka wnantoꞌ leꞌ.
5 Naꞌ daa ḻe gokshejlallaa ni c̱hele, bseḻaa Timotewaꞌ kwenc̱he iṉezidꞌ shi ni nonḻilallꞌkzle Jesucrístonaꞌ, ḻaꞌ gokidꞌ dii x̱iwaa gonan ka gonc̱hoplallꞌle naꞌ gakdadz xshin Chiozaꞌ daa benntoꞌ ladjlenaꞌ.
6 Per ṉaa ba bilaꞌ Timotewi gani zoantoꞌ naꞌ choꞌe dillꞌ ni nonḻilallꞌkzle Jesucrístonaꞌ naꞌ chaki ljwell-le. Ḻekzkaꞌ choꞌe dillꞌ toshiizi chjadinile netoꞌ daa ḻe chakile netoꞌ, naꞌ ḻe cheenile ileꞌile netoꞌ. Naꞌ kaꞌkz netoꞌ, ḻe cheenintoꞌ ileꞌintoꞌ leꞌ.
7 Daan, leꞌ beṉꞌ bishꞌ naꞌ leꞌ beṉꞌ zanꞌ, ḻaꞌkzi chiya dii chen chleꞌintoꞌ, ax̱t bixenlallꞌntoꞌ ka wṉezintoꞌ ni zoac̱hec̱hle nonḻilallꞌle Crístonaꞌ.
8 Daa ba ṉezintoꞌ ni zoac̱hec̱hle chonḻilallꞌle X̱anchonaꞌ, ax̱t biyakshaoꞌlallꞌntoꞌ.
9 Naꞌ bichkz bi dillꞌ chillelintoꞌ kwenc̱he weꞌntoꞌ Chiozaꞌ yeḻꞌ chox̱ken c̱he yeḻꞌ xabanaꞌ daa napntoꞌ ni c̱hele.
10 Ka tella ka waḻ chṉabintoꞌ Chiozaꞌ wiꞌe latj yidwiantoꞌ leꞌ dii yoblə kwenc̱he yiyoll yido wzajniintoꞌ leꞌ daa ni chyalljile shajniile kwenc̱he gonḻilallꞌchleneꞌ.
11 Naꞌ chṉabidꞌ X̱acho Chiozaꞌ naꞌ X̱ancho Jesúzaꞌ gaklengakeꞌ netoꞌ kwenc̱he bibi wsej wllonan yidwiantoꞌ leꞌ.
12 Naꞌ X̱anchonaꞌ gonshgueꞌ ka zizikli gakchi ljwell-le naꞌ gakile yogꞌḻoḻ beṉꞌ, ka chakintoꞌ leꞌ.
13 Naꞌ gonshgueꞌ ka gakchach yic̱hjlallꞌdoꞌlenaꞌ kwenc̱he gakle beṉꞌ nxi nyech naꞌ bibi xtoḻꞌle gatꞌ lao Chiozaꞌ, beenaꞌ nak X̱acho, katꞌkaꞌ X̱ancho Jesucrístonaꞌ zizaꞌleneꞌ beṉꞌkaꞌ nak lallꞌ nee.