4
Leꞌ beṉꞌ bishꞌ naꞌ leꞌ beṉꞌ zanꞌ, kon yeḻꞌ wṉabiaꞌ c̱he X̱ancho Jesucrístonaꞌ, chatꞌyointoꞌ leꞌ soatezi soale gonchle ka chazlallꞌ Chiozaꞌ, kon ka bsedintoꞌ leꞌ gonle naꞌ kon ka ba chonkzle.
2 Ba ṉezkzile diikaꞌ wnantoꞌ leꞌ gonle, naꞌ nakgakan diikaꞌ bllia X̱ancho Jesúzaꞌ biaꞌ goncho.
3 Chiozaꞌ cheenileꞌ soale gonle daa chazlallee. Naꞌ bi iṉelenzle xiiṉ xool beṉꞌ,
4 san to tole chiyaḻꞌ gaple balaaṉ xool-lenaꞌ ḻega beṉꞌ nak lallꞌ naꞌ Chiozaꞌ,
5 naꞌ biꞌ weꞌzle choꞌa xbayi beli chen c̱helenaꞌ, ka chon beṉꞌkaꞌ biṉꞌ gombiaꞌgakeꞌ Chiozaꞌ.
6 Naꞌ ni tole bi gonḻeꞌile xool ljwell-le ḻaꞌ ba bsiꞌnkzintoꞌ leꞌ X̱anchonaꞌ wsakꞌziꞌe yogꞌ beṉꞌkaꞌ chon kaꞌ.
7 Chiozaꞌ aga gox wṉabeꞌ choꞌ kwenc̱he goncho dii zbanki, san gox wṉabeꞌ choꞌ kwenc̱he gakcho beṉꞌ nxi nyech.
8 Daan, beenaꞌ bi chzenagueꞌ diiki chliꞌ chsedintoꞌ aga c̱hentoꞌn bi chzenagueꞌ, san c̱he Chiozanꞌ, beenaꞌ beṉeꞌ leꞌ Espíritu Sánto c̱heꞌnaꞌ.
9 Naꞌ ka nak c̱heyi daa chaki ljwellcho, bi chonan byen wzajniꞌchintoꞌn leꞌ, ḻaꞌ kwin Chiozaꞌ ba bsedileꞌ leꞌ gaki ljwell-le.
10 Naꞌ chakile yogꞌḻoḻ beṉꞌkaꞌ nonḻilallꞌ Crístonaꞌ, beṉꞌkaꞌ zoa doxente Macedónianaꞌ. Naꞌ chatꞌyointoꞌ leꞌ beṉꞌ bishꞌ naꞌ leꞌ beṉꞌ zanꞌ, zizikchli gakchi ljwell-le.
11 Ḻi gon to dii byen soalen ljwell-le wen, naꞌ ḻi se wṉeyi c̱he ḻoo yoo lill-lenaꞌ, naꞌ ḻi gon llin kon ṉiꞌa naꞌlekaꞌ ka ba wnakzntoꞌ leꞌ
12 kwenc̱he beṉꞌkaꞌ bi nonḻilallꞌ Crístonaꞌ iṉagakeꞌ ḻe wen nsaꞌ c̱hele, naꞌ ḻekzkaꞌ bibi zed lljenle lill beṉꞌ.
13 Naꞌ leꞌ beṉꞌ bishꞌ naꞌ leꞌ beṉꞌ zanꞌ, cheenintoꞌ iṉezile nak gak c̱he beṉꞌkaꞌ ba wit kwenc̱he bi gakyeshile ka chakyeshii beṉꞌkaꞌ bi nongakeꞌ lez lljazoalengakeꞌ Chiozaꞌ.
14 Daa chajḻeꞌcho wit Jesúzaꞌ naꞌ bibaneꞌ ladj beṉꞌ wetkaꞌ, ḻekzkaꞌ chajḻeꞌcho Chiozaꞌ yisbaneꞌ beṉꞌkaꞌ nonḻilallꞌgakeꞌneꞌ ka witgakeꞌ.
15 Naꞌ daan, nantoꞌ leꞌ kon ka wna X̱ancho Jesúzaꞌ: Choꞌ ni mbancho katꞌ zizee, aga chonꞌ yibialocho lao beṉꞌkaꞌ ba wit.
16 Ḻaꞌ kwin X̱ancho Jesúzaꞌ zizee yabanaꞌ, naꞌ iṉieꞌ zillj goneꞌ mandad yiban beṉꞌ wetkaꞌ, naꞌ anjlaꞌ chṉabiaꞌ iṉieꞌ naꞌ yenicho kwell trompet c̱he Chiozaꞌ, naꞌ beṉꞌkaꞌ benḻilallꞌ Crístonaꞌ yibangakeꞌ nech.
17 Naꞌtech, ka choꞌ ni mbancho, yigoyo Chiozaꞌ choꞌ yiyakchogakeꞌ txen ladj bejkaꞌ kwenc̱he lljatiḻcho X̱anchonaꞌ, naꞌ soalenchoneꞌ zejḻi kaṉi.
18 Naꞌ daan, ḻi wtip lallꞌ ljwell-le kon dillꞌki.