3
Daa ba nakle txen Crístonaꞌ naꞌ nakle ka beṉꞌ bibanleneꞌ txen ka bibaneꞌ ladj beṉꞌ wetkaꞌ, chiyaḻꞌ kweꞌ yic̱hjle c̱heyi daa nak c̱he yabanaꞌ, ganaꞌ llia Crístonaꞌ shḻaa de shḻi c̱he Chiozaꞌ.
2 Ḻi se wṉeyi daa nak c̱he yabanaꞌ, naꞌ bich kooz yic̱hjle daa nak c̱he yell-lioni.
3 Ḻaꞌ ba nakle ka beṉꞌ ba wit daa nakle Crístonaꞌ txen, naꞌ yeḻꞌ mban c̱helenaꞌ ba nakan toz kon Crístonaꞌ lao Chiozaꞌ.
4 Naꞌ ka yiyed Crístonaꞌ, beenaꞌ noṉeꞌ leꞌ yeḻꞌ mban daa nak zejḻi kaṉi, ḻekzkaꞌ shoꞌlenleneꞌ balaaṉ xen daa chidoḻee.
5 Daan, chiyaḻꞌ kwej yic̱hjle yogꞌḻoḻ dii malaꞌ daa chiba chizaki beli chen c̱helenaꞌ: bi iṉelenzle xiiṉ xool beṉꞌ wa xiiṉ xyo beṉꞌ, bi gonle bichlə dii zban, bich weꞌle choꞌa xbayi beli chen c̱helenaꞌ, bich saꞌlallꞌzle gonle dii malaꞌ, ni bi selallꞌle bi gatꞌ kweꞌ c̱hele. Ḻaꞌ beenaꞌ chzelallꞌ gatꞌ kweꞌileꞌ dii xen, toz kan chonleneꞌ beenaꞌ choeꞌlaꞌo daa nak yaj yag.
6 Chiozaꞌ wsakꞌziꞌe beṉꞌkaꞌ chon diikaꞌ daa bi chzenaggakeꞌ c̱heꞌ.
7 Naꞌ leꞌ, ḻekzkaꞌ benle diikaꞌ kanaꞌ biṉꞌ wzenagle c̱he Chiozaꞌ.
8 Per ṉaa, chiyaḻꞌ kwej yic̱hjle yogꞌḻoḻ diiki: yeḻꞌ chllaa chlok, yeḻꞌ wen dii mal, yeḻꞌ chyilj chzan xtillꞌ beṉꞌ, naꞌ yeḻꞌ chbell chṉe ka nḻaꞌ ka nte.
9 Bich siyeꞌ ljwell-le, ḻaꞌ ba wlej yic̱hjle yeḻꞌ mban gol c̱helenaꞌ naꞌ bich gonle dii malkaꞌ benle kanaꞌ.
10 Ba biyakle beṉꞌ kob, naꞌ Chios, beenaꞌ bx̱e bsil leꞌ, choneꞌ ka gombiaꞌchleneꞌ naꞌ gakchle dowalj ka cheenileꞌ.
11 Aga bi zakii shi nakcho beṉꞌ Israel wa shi bi nakcho, shi yoocho seṉ daa le circuncisión wa shi bi yoochon, shi nakcho beṉꞌ nsed wa beṉꞌ bi nsed, shi nakcho beṉꞌ ndoo lla yel choneꞌ xshin beṉꞌ wa nakcho beṉꞌ chon xshinkzin. Daa llialoten, gakcho Crístonaꞌ txen, ḻaꞌ nottezə nakcho ḻekzenꞌ zoaleneꞌ choꞌ.
12 Chiozaꞌ ḻe chakileꞌ leꞌ naꞌ ba wlejeꞌ leꞌ kwenc̱he gakle lallꞌ nee. Naꞌ daan, chiyaḻꞌ yiyeshꞌlallile beṉꞌ naꞌ gonile ḻegakeꞌ wen, naꞌ bi gakle beṉꞌ chaꞌsib, san gakle beṉꞌ gax̱jlallꞌ, naꞌ gaple yeḻꞌ chxenlallꞌ.
13 Chiyaḻꞌ gonle banez ljwell-le, naꞌ chiyaḻꞌ siꞌxen c̱he ljwell-le shi no bi chon c̱hele. Ka ben Crístonaꞌ wxiꞌxeneꞌ c̱hele, ḻekzkaꞌ leꞌ chiyaḻꞌ siꞌxenle c̱he beṉꞌ.
14 Naꞌ daa llialote chiyaḻꞌ gaki ljwell-le, ḻaꞌ shi chaki ljwell-le, ḻennanꞌ gonan ka gonle yogꞌ diiki.
15 Ḻi weꞌ latj iṉabiaꞌ yeḻꞌ mbalaz c̱he Crístonaꞌ ḻoo yic̱hjlallꞌdoꞌlenaꞌ, ḻaꞌ kwenc̱he soalen ljwell-le mbalazan ba gox wṉabeꞌ leꞌ gakle toz. Naꞌ tlizi chiyaḻꞌ weꞌleneꞌ yeḻꞌ chox̱ken.
16 Ḻi kooshaoꞌ do ka nak xtillꞌ Crístonaꞌ ḻoo yic̱hjlallꞌdoꞌlenaꞌ. Ḻi wliꞌ wsedi ljwell-le naꞌ ḻi wtip lallꞌ ljwell-le, ḻi wc̱hin do ka nak yeḻꞌ sinꞌnaꞌ daa ba beṉeꞌ leꞌ. Ḻi goḻ no salmo, no himno, naꞌ bichlə daa na Espíritu c̱he Chiozaꞌ goḻ-le, naꞌ ḻi weꞌ Chiozaꞌ yeḻꞌ chox̱ken ka goḻ-le.
17 Naꞌ yogꞌḻoḻ daa gonle wa daa iṉale, chiyaḻꞌ gonlen ḻega beṉꞌ nak X̱ancho Jesúzaꞌ txen naꞌ weꞌle X̱acho Chiozaꞌ yeḻꞌ chox̱ken daa ba nonḻilallꞌle Jesucrístonaꞌ.
18 Leꞌ noolə, ḻi wzenag c̱he beṉꞌ c̱helenaꞌ, ḻaꞌ kanꞌ chiyaḻꞌ gonle daa ba nx̱enilallꞌle X̱anchonaꞌ.
19 Naꞌ leꞌ beṉꞌ byo, ḻi gaki xool-lenaꞌ naꞌ bi gonile ḻegakeꞌ zidꞌ zṉia.
20 Naꞌ leꞌ biꞌdoꞌ, ḻi wzenag yogꞌḻoḻ daa na x̱axṉaꞌlekaꞌ, ḻaꞌ kanꞌ chazlallꞌ X̱anchonaꞌ.
21 Naꞌ leꞌ chisgol chischoole, bi wsheshlenle xiiṉlekaꞌ konteḻe, kwenc̱he bi gakyeshꞌgakibꞌ.
22 Naꞌ leꞌ ndoo lla yel-le chonle xshin beṉꞌ, ḻi wzoa dillꞌ, ḻi gon yogꞌḻoḻ daa na beṉꞌkaꞌ nak x̱anle lo yell-lioni. Aga katꞌkaꞌ chwiazgakeꞌ gonle ka chilaḻi kwenc̱he ileꞌshiꞌgakileꞌ leꞌ, san do yic̱hj do lallꞌle ḻi gonan daa ba chall chlleble X̱ancho Crístonaꞌ.
23 Yogꞌḻoḻ daa gonle, ḻi gonan do yic̱hj do lallꞌle naꞌ ḻi gaktezi xshin X̱ancho Crístonanꞌ chonle naꞌ aga c̱he beṉꞌ yell-lion.
24 Ḻaꞌ ṉezkzile X̱ancho Crístonaꞌ, beenaꞌ nak dowalj X̱anle, goneꞌ ka yiziꞌle banez c̱he dii wennaꞌ chonle.
25 San beenaꞌ chon mal, ḻekzeꞌ ikee laxji dii malaꞌ choneꞌ, nottezə nakeꞌ.