4
Leꞌ beṉꞌ bishꞌdawaa naꞌ leꞌ beṉꞌ zandawaa, ḻe chakidꞌ leꞌ, naꞌ chzelallꞌchgaidꞌ ileꞌidꞌ leꞌ, naꞌ chiba chizakidꞌ daa nonḻilallꞌle Crístonaꞌ, naꞌ ni c̱hele leꞌ de to dii yiziꞌa banez. Ḻi soac̱hec̱h gonḻilallꞌle X̱anchonaꞌ.
2 Chatꞌyoidꞌ Evódianaꞌ len Síntiquenaꞌ yizoagakeꞌ wen daa nakgakeꞌ X̱anchonaꞌ txen.
3 Naꞌ liꞌ nakoꞌ nadꞌ txen do yic̱hj do lalloo choncho xshin Chiozaꞌ, chatꞌyoidꞌ liꞌ, gaklengachoꞌ beṉꞌ zanchoki. Ḻaꞌ ḻe ba bllaglogakenꞌ goklengakeꞌ nadꞌ beꞌntoꞌ dillꞌ wen dillꞌ kob c̱he Jesucrístonaꞌ, len Cleméntenaꞌ naꞌ beṉꞌkaꞌ sto benlench nadꞌ xshin Chiozaꞌ. Ba daꞌ lieꞌkaꞌ ḻee libr c̱he Chiozaꞌ ganaꞌ daꞌ le beṉꞌkaꞌ napgakeꞌ yeḻꞌ mban zejḻi kaṉi.
4 Ḻi yiba yizaki toshiizi daa nakle X̱ancho Crístonaꞌ txen. Naꞌ sto shii niaꞌ leꞌ: ¡ḻi yiba yizaki!
5 Ḻi wsaꞌ c̱hele xochi kwenc̱he yogꞌ beṉꞌ gakbeꞌgakileꞌ nakle beṉꞌ wen. Ba zoa gao yiyed X̱anchonaꞌ.
6 Bi kwekzə yic̱hjle bittez dii chak c̱hele, san ḻi weꞌḻwill Chiozaꞌ naꞌ ḻi gonan lallꞌ nee, naꞌ ḻi wiꞌe yeḻꞌ chox̱ken.
7 Naꞌ goneꞌ ka soale mbalaz ax̱t kono shajniikzi bic̱he zoale kaꞌ. Naꞌ yeḻꞌ zoa mbalazaꞌ wsol wṉitan dii zedaꞌ de ḻoo yic̱hjlallꞌdoꞌlekaꞌ daa nakle Cristo Jesúzaꞌ txen.
8 Naꞌ leꞌ beṉꞌ bishꞌ naꞌ leꞌ beṉꞌ zanꞌ, daa zeelote ṉaa, ḻi se wṉeyi c̱heyi daa nak dii ḻi, c̱he yogꞌḻoḻte dii chidoḻꞌ gapcho balaaṉ, c̱he yogꞌḻoḻ daa nak dii ḻi dii shaoꞌ, c̱he yogꞌḻoḻ dii bibi dii mal nsaꞌn, c̱he yogꞌ dii wenkaꞌ chon ka yibaicho, naꞌ c̱he yogꞌḻoḻ dii zeyi c̱heyin nakan wen. Ḻi se wṉeyi c̱he yogꞌḻoḻ diiki nak wen, diiki chidoḻꞌ weꞌcho xtilliin.
9 Ḻi gon daa ba bliꞌ bsedidꞌ leꞌ naꞌ daa benile wniaꞌ, naꞌ daa bleꞌile chonꞌ. Ḻennanꞌ ḻi gon, naꞌ Chios, beenaꞌ chon ka soacho mbalaz, soaleneꞌ leꞌ.
10 Chiba chizakchgaidꞌ lao X̱ancho Jesucrístonaꞌ daa bachga chizele wṉeyi c̱haꞌ dii yoblə. Bi niaꞌ ba goḻ-lallꞌle nadꞌ, san bi gotꞌ xḻatjinnanꞌ gaklentole nadꞌ.
11 Aga daa chyallj chc̱hinidaꞌn niaꞌ kaꞌ, ḻaꞌ ba nzedidꞌ gonꞌ banez kaꞌkꞌ dii de c̱haꞌ.
12 Ba ṉezidꞌ bi daa neꞌ soeꞌ lo yeḻꞌ yeshꞌ, naꞌ ḻekzkaꞌ ba ṉezidꞌ bi daa neꞌ soeꞌ lo yeḻꞌ wniaꞌ. Ba nzedidꞌ gonꞌ banez bittez dii chak c̱haꞌ, shi neḻj nllaꞌidꞌ wa shi chbiḻ chdonꞌ, shi dechga daa chyallj chc̱hinidꞌ wa shi shlas bibi dekzə.
13 Chzoidꞌ yogꞌḻoḻte dii chtiḻꞌ daa chaklen Crístonaꞌ nadꞌ.
14 Per ḻe wen benle daa goklenle nadꞌ lo dii lalljki chtiḻꞌ.
15 Naꞌ ṉezkzile kanaꞌ bizaa Macedónianaꞌ naꞌ wzoloaꞌ choꞌa dillꞌ wen dillꞌ kob c̱he Crístonaꞌ, totgui leꞌ lleꞌle Filipozaꞌ beṉle daa byalljidꞌ kwenc̱he jiꞌa choꞌa xtillꞌ Chiozaꞌ. Ḻaꞌ ni to beṉꞌkaꞌ ba nonḻilallꞌ Crístonaꞌ yellkaꞌ sto bi goklengakeꞌ nadꞌ.
16 Naꞌ kanaꞌ wzoaꞌ yell Tesalónicanaꞌ, zan shii bseḻꞌle dii byalljidꞌ.
17 Aga iṉacho chyiljꞌ bi goṉle nadꞌ, san cheenlidꞌ gatꞌch yeḻꞌ shaoꞌ c̱hele yabanaꞌ.
18 Epafrodítoni ba beṉeꞌ nadꞌ daa bseḻꞌlenleneꞌ, naꞌ ṉaa ba napꞌ yogꞌte daa chyalljidꞌ ax̱t ba chichooṉlan. Naꞌ chibayi Chiozaꞌ daa bseḻꞌlen, ka chibaileꞌ diikaꞌ chzani beṉꞌ choeꞌgakeꞌneꞌ, diikaꞌ chḻaꞌileꞌ zix̱ sia katꞌ chzeygakeꞌn laweꞌnaꞌ.
19 Chios c̱haꞌnaꞌ, beenaꞌ nap yogꞌḻoḻte dii wen dii shaoꞌkaꞌ, goṉeꞌ leꞌ yogꞌḻoḻ daa chyalljile daa nakle Cristo Jesúzaꞌ txen.
20 Toshiizi chiyaḻꞌ koocho X̱acho Chiozaꞌ balaaṉ. Kanꞌ nakan.
21 Ḻi wwapsha chiox yogꞌḻoḻ beṉꞌkaꞌ nak lallꞌ naꞌ Chiozaꞌ daa nongakeꞌ Cristo Jesúzaꞌ txen. Naꞌ ḻekzkaꞌ beṉꞌ bishꞌchoki zoalen nadꞌ ni, chwapgakeꞌ leꞌ chiox.
22 Naꞌ yogꞌḻoḻte beṉꞌkaꞌ nak lallꞌ naꞌ Chiozaꞌ ni chwapgakeꞌ leꞌ chiox, naꞌ beṉꞌkaꞌ chon xshin beṉꞌ wṉabiaꞌ Césaraꞌ, ḻeyeṉꞌgakeꞌ chwapgakeꞌ leꞌ chiox.
23 X̱ancho Jesucrístonaꞌ soalenshgueꞌ leꞌ naꞌ gakleneꞌ yogꞌḻoḻtele. Kanꞌ gakan.