3
Naꞌ ṉaa, leꞌ beṉꞌ bishꞌdawaa naꞌ leꞌ beṉꞌ zandawaa, ḻi yiba yizaki daa ba nonḻilallꞌle X̱anchonaꞌ. Nadꞌ bi chak zedidꞌ wzejꞌ leꞌ dii yoblə diikaꞌ ba wniakzꞌ leꞌ daa ṉezidꞌ waklenan leꞌ.
2 Ḻi wsakꞌ bi wzenagle c̱he beṉꞌ malkaꞌ, beṉꞌkaꞌ nazə chonan byen wc̱hogtekzə kwerp c̱hechonaꞌ shoꞌcho seṉ daa le circuncisión.
3 Ḻaꞌ choꞌyeṉꞌlan nakcho dowalj beṉꞌkaꞌ yoo seṉ, choꞌ choeꞌlaꞌocho Chiozaꞌ daa yoo Espíritu c̱heꞌnaꞌ ḻoo yic̱hjlallꞌdoꞌchonaꞌ naꞌ chiba chizakicho daa nakcho Cristo Jesúzaꞌ txen. Naꞌ bi noncho lez daa goni kwerp c̱hechoni gaklenan gakcho beṉꞌ wen lao Chiozaꞌ.
4 Niaꞌ kaꞌ ḻaꞌkzi de dii zan dii gak wx̱enilallaa c̱he kwinꞌ daa gonan ka ileꞌshii Chiozaꞌ nadꞌ. Shi no chakzi de dii gak wx̱enilallee c̱he kwineꞌ daa gonan ka ileꞌshii Chiozaꞌneꞌ, ¿alechlin nadꞌ?
5 Ka gokidꞌ x̱onꞌ lla, wloogakeꞌ kwerp c̱haꞌni seṉ daa le circuncisión. Nakꞌ beṉꞌ Israel, naꞌ goljꞌ lo dia c̱he dii Benjamínnaꞌ, naꞌ nakꞌ dowalj beṉꞌ hebreo ka x̱axṉaꞌkaꞌ, naꞌ bsedyeṉaa ley c̱hentoꞌnaꞌ naꞌ bzenagꞌ c̱heyin, naꞌ benlenꞌ fariseokaꞌ txen.
6 Daa ḻe wzechgaꞌ wṉeyi ley c̱he Chiozaꞌ, ax̱t gokidꞌ chonꞌ ka cheeni Chiozaꞌ daa bc̱hiꞌ bsakaa beṉꞌkaꞌ chonḻilallꞌgakeꞌ Jesúzaꞌ. Naꞌ benꞌ kon ka na leyaꞌ, naꞌ aga no gok iṉa bi benꞌ ka nan.
7 Kanaꞌn gokidꞌ ḻe zakꞌchgayi yogꞌ diikaꞌ, per ṉaa, daa ba nonḻilallaa Crístonaꞌ, chakbeꞌidꞌ bibi zakꞌgakan.
8 Naꞌ dii ḻi ṉezidꞌ bibi de dii zakꞌchi ka daa ba nombiaꞌ Cristo Jesúzaꞌ, beenaꞌ nak X̱anꞌ. Naꞌ daa ḻe chakidee, bich nx̱enilallaa yogꞌ diikaꞌ gokidꞌ ḻe zakꞌchga, san ba nongakaꞌn ka beb kwenc̱he gombiaꞌchꞌ Crístonaꞌ
9 naꞌ gakee txen. Aga daa chonꞌ daa na leyanꞌ nakꞌ beṉꞌ ḻi beṉꞌ shaoꞌ lao Chiozaꞌ, san daa nonḻilallaa Crístonanꞌ, ḻaꞌ beṉꞌkaꞌ chonḻilallꞌgakeꞌ Crístonaꞌ, Chiozaꞌ chiyoneꞌ ḻegakeꞌ beṉꞌ ḻi beṉꞌ shaoꞌ.
10 Cheenidꞌ gombiaꞌ Crístonaꞌ naꞌ yeḻꞌ wak c̱heꞌnaꞌ ka daa bliꞌe kanaꞌ bibaneꞌ ladj beṉꞌ wetkaꞌ, naꞌ cheenidꞌ izanidꞌ kwinꞌ gak c̱haꞌ ka gok c̱heꞌ daa wdieꞌ yeḻꞌ zakꞌziꞌkaꞌ naꞌ witeꞌ.
11 Naꞌ kaꞌ, nonꞌ lez idoḻaa yisban Chiozaꞌ nadꞌ ladj beṉꞌ wetkaꞌ.
12 Bi niaꞌ ba nombiꞌaneꞌ kwasḻoḻ wa ba chonꞌ kwasḻoḻ ka chazlallee. Per ni chonꞌ ka dii le kwenc̱he gak gonaꞌn, ḻaꞌ ni c̱he ḻennanꞌ gox wṉab Cristo Jesúzaꞌ nadꞌ.
13 Leꞌ beṉꞌ bishꞌ naꞌ leꞌ beṉꞌ zanꞌ, bi niaꞌ ba chonꞌ kwasḻoḻ ka chazlallee. Per de to dii chonꞌ, bich ziaꞌ wṉeyi c̱he diikaꞌ ba wde, san chonꞌ to dii byen kwenc̱he idoḻidꞌ dii wennaꞌ ziꞌ zaꞌ.
14 Ni chonꞌ ka dii le kwenc̱he yillinꞌ ganaꞌ ikaa daa goṉ Chiozaꞌ nadꞌ. Ḻaꞌ ni c̱heyinnanꞌ gox wṉabeꞌ nadꞌ kwenc̱he nakꞌ Crístonaꞌ txen.
15 Naꞌ kanꞌ chiyaḻꞌ secho wṉeyi yogꞌḻoḻcho, choꞌ ba nakchacho chonḻilallꞌchoneꞌ. Naꞌ shi bi zelen wṉeyi Chiozaꞌkzə wzajniileꞌn leꞌ.
16 Naꞌ daa llialote chiyaḻꞌ soatezi soacho goncho kon ka ba bzajnii Chiozaꞌ choꞌ.
17 Leꞌ beṉꞌ bishꞌ naꞌ leꞌ beṉꞌ zanꞌ, ḻi wsaꞌto c̱hele ka nsaꞌ c̱haꞌ, naꞌ ka nsaꞌ c̱he beṉꞌkaꞌ chon kon ka ba bliintoꞌ leꞌ gonle.
18 Zan shii ba wniaꞌ leꞌ, naꞌ ṉaa ax̱t chakyeshidꞌ niaꞌ leꞌ dga sto shii, zan beṉꞌ chongakeꞌ ka bibi zakii daa wit Crístonaꞌ ḻee yag cruzaꞌ daa bi nsaꞌ c̱hegakeꞌ wen.
19 Wllin lla kwiayiꞌ beṉꞌki daa choeꞌlaꞌogakeꞌ toz daa chṉab beli chen c̱heꞌkaꞌ, naꞌ chep chaꞌlallꞌlgakeꞌ c̱heyi daa chongakeꞌ lwaayi dii nan yidoꞌgakileꞌ. Kon lillinzi daa de yell-lioni zegakeꞌ wṉeyi.
20 San choꞌ, yabananꞌ nak lallcho. Naꞌ nanꞌ zizaꞌ X̱ancho Jesucrístonaꞌ, beenaꞌ chbezcho yisleꞌ choꞌ kwenc̱he bi kwiayiꞌcho.
21 Ḻenꞌ yishee kwerp c̱hechoki, diiki goollꞌ iteb, kwenc̱he yiyakan ka kwerp c̱heꞌnaꞌ daa ḻe zakii. Naꞌ goneꞌn kon yeḻꞌ wak c̱heꞌnaꞌ daa chṉabiaꞌleneꞌ lao yogꞌḻoḻte dii de.