5
Daa ba nakle xiiṉ Chios naꞌ chakileꞌ leꞌ, ḻi wsed gonle wen ka choneꞌ.
2 Chiyaḻꞌ soale gakile beṉꞌ, ka chaki Crístonaꞌ choꞌ. Daa chakileꞌ choꞌ, bzani kwineꞌ witeꞌ ni c̱hecho, naꞌ bibayi Chiozaꞌ daa beneꞌ kaꞌ, ka bibaileꞌ shii xḻaꞌ bayix̱ꞌdoꞌkaꞌ bzeygakeꞌ laweꞌnaꞌ kanaꞌ.
3 Bi chiyaḻꞌ selallꞌle iṉelen ljwell-le wa gonle bichlə dii zban, ni bi selallꞌle gatꞌ kweꞌile dii xen wal. Ni to diiki bi chiyaḻꞌ gak ladjlenaꞌ daa ba nakle lallꞌ naꞌ Chiozaꞌ.
4 Bi weꞌle dillꞌ zban, ni dillꞌ dii bi zakii ni dillꞌ dii bi yejniꞌalallii, ḻaꞌ aga dillꞌ ka diikin chiyaḻꞌ weꞌle, san chiyaḻꞌ weꞌle Chiozaꞌ yeḻꞌ chox̱ken.
5 Ḻaꞌ ba ṉezkzile ni to beṉꞌ chṉelen ljwellin, wa beṉꞌ chon bichlə dii zban, wa beṉꞌ chzelallꞌ gatꞌ kweꞌileꞌ dii xen, bi yillineꞌ yabanaꞌ ganaꞌ chṉabiaꞌ Crístonaꞌ len Chiozaꞌ. Beenaꞌ chzelallii gatꞌ kweꞌileꞌ dii xen, toz ka choneꞌ ka beenaꞌ choeꞌlaꞌo daa nak yaj yag.
6 Bi weꞌle latj no siyeꞌ leꞌ weꞌlenzeꞌ leꞌ dillꞌ dii bi zakii, ḻaꞌ beṉꞌkaꞌ chon chiya dii malki, ileꞌgakileꞌ yeḻꞌ zakꞌziꞌ xen c̱he Chiozaꞌ daa bi chzenaggakeꞌ c̱heꞌ.
7 Daan, bi chiyaḻꞌ ḻenle beṉꞌkaꞌ chon kaꞌ.
8 Kananꞌ, nc̱hoḻ nniti yic̱hjlallꞌdoꞌlenaꞌ, san ṉaa daa ba nakle X̱ancho Jesucrístonaꞌ txen, ba yoo beeniꞌ c̱heꞌnaꞌ ḻoo yic̱hjlallꞌdoꞌlenaꞌ, naꞌ chiyaḻꞌ soale gonle ḻega beṉꞌ ba yoo beeniꞌ c̱heꞌnaꞌ.
9 Ḻaꞌ beeniꞌ c̱heꞌnaꞌ chaklenan choꞌ gakcho beṉꞌ wen, naꞌ beṉꞌ ḻi beṉꞌ shaoꞌ, naꞌ beṉꞌ choeꞌ dillꞌ ḻi.
10 Ḻi se wṉeyi kwenc̱he iṉezile bi daa chazlalli X̱anchonaꞌ gonle.
11 Bi gonle txen diikaꞌ chon beṉꞌkaꞌ nc̱hoḻ nniti yic̱hjlallꞌdoꞌekaꞌ, ḻaꞌ bibi zakii daa chongakeꞌ, san ḻi gon ka yiyakbeꞌgakileꞌ bi chongakeꞌ wen.
12 Ḻaꞌ ax̱t chiyii chidoꞌicho weꞌcho dillꞌ c̱heyi diikaꞌ chongakeꞌ do ngashꞌzə.
13 Per yogꞌḻoḻ diikaꞌ choncho, chliꞌlaogakin lo beeniꞌ c̱he Chiozaꞌ nak nakgakan.
14 Ḻaꞌ beeniꞌ c̱heꞌnaꞌ chiliꞌn lao yogꞌte diikaꞌ choncho. Daakzan neꞌ:
Ḻi yiban, leꞌ nakle ka beṉꞌ ches;
naꞌ ḻi yiyas ladj beṉꞌ wetkaꞌ.
Naꞌ Crístonaꞌ kwee beeniꞌ c̱heꞌnaꞌ ḻoo yic̱hjlallꞌdoꞌlenaꞌ.
15 Naꞌ ḻi se wṉeyi wsaꞌ c̱hele wen, naꞌ bi gonzle ka beṉꞌ bi nteyi, san ḻi gakto ka beṉꞌ sinꞌ.
16 Ḻi gon ka dii le gonle dii wennaꞌ katꞌ de xḻatjin, ḻaꞌ llaki zoacho ḻe ba chiꞌchga dii malaꞌ.
17 Daan, bi chiyaḻꞌ gonle ka beṉꞌ bi nteyi, san chiyaḻꞌ shajniile daa cheeni X̱ancho Jesucrístonaꞌ goncho.
18 Bi soll ṉitile, ḻaꞌ beenaꞌ chzoll chniti choneꞌ chiya dii bi yejniꞌalallii. San ḻi weꞌ latj soa Espíritu Sántonaꞌ iṉabiꞌe ḻoo yic̱hjlallꞌdoꞌlenaꞌ.
19 Chiyaḻꞌ weꞌlen ljwell-le dillꞌ c̱he sálmokaꞌ, naꞌ goḻ-le dii koon X̱anchonaꞌ balaaṉ naꞌ bichlə dii iṉa Espíritu c̱he Chiozaꞌ goḻ-le. Naꞌ ḻi goḻ iṉe weꞌlaꞌole X̱ancho Crístonaꞌ do yic̱hj do lallꞌle.
20 Naꞌ daa nakcho X̱ancho Jesucrístonaꞌ txen, toshiizi chiyaḻꞌ weꞌle X̱acho Chiozaꞌ yeḻꞌ chox̱ken daa chakleneꞌ choꞌ lao yogꞌḻoḻte.
21 Chiyaḻꞌ wzex̱j yic̱hjle wzenag c̱he ljwell-le, daa chaple Crístonaꞌ balaaṉ.
22 Naꞌ ka leꞌ noolə zoa beṉꞌ c̱hele, chiyaḻꞌ wzex̱j yic̱hjle wzenagle c̱hegakeꞌ, ka chonle chzenagle c̱he X̱ancho Crístonaꞌ.
23 Ḻaꞌ beṉꞌ byonanꞌ chṉabiꞌe nool c̱heꞌnaꞌ, ka chon Crístonaꞌ chṉabiꞌe choꞌ nonḻilallꞌchoneꞌ, choꞌ ba bisleꞌ kwenc̱he bi kwiayiꞌcho. Chṉabiꞌe choꞌ, choꞌ zaklebicho kwerp c̱heꞌnaꞌ, ka chon yic̱hjchoni chṉabiꞌan kwerp c̱hechoni.
24 Naꞌ ka choꞌ nonḻilallꞌcho Crístonaꞌ naꞌ chzex̱j yic̱hjcho laweꞌnaꞌ, kaꞌkzan chiyaḻꞌ gon noolkaꞌ wzex̱j yic̱hjeꞌkaꞌ lao yogꞌḻoḻ daa iṉa beṉꞌ c̱heꞌkaꞌ.
25 Naꞌ ka leꞌ beṉꞌ byo zoa nool c̱hele, ḻi gaki nool c̱helekaꞌ, ka chon Crístonaꞌ chakileꞌ choꞌ nonḻilallꞌchoneꞌ naꞌ bzani kwineꞌ witeꞌ ni c̱hecho
26 kwenc̱he biyakcho beṉꞌ nxi nyech laweꞌnaꞌ. Bix̱is biyibeꞌ yic̱hjlallꞌdoꞌchonaꞌ ka wyajḻeꞌcho xtilleenaꞌ
27 kwenc̱he yibaileꞌ choꞌ nakcho lallꞌ nee katꞌ yillincho laweꞌnaꞌ naꞌ bibi ndaꞌ nchen yic̱hjlallꞌdoꞌchonaꞌ, san gakcho beṉꞌ nxi nyech, beṉꞌ bibi xtoḻiin de.
28 Naꞌ kaꞌkzə leꞌ beṉꞌ byo, leꞌ zoa nool c̱hele, chiyaḻꞌ gapshiile nool c̱helekaꞌ ka chapshii kwinle. Beenaꞌ chakileꞌ nool c̱heꞌnaꞌ, kwinkzenꞌ chakileꞌ.
29 Biga zoa beṉꞌ chwiileꞌ kwerp c̱heꞌnaꞌ, san chweej chwaweꞌn naꞌ chapshiꞌen, ka chon Crístonaꞌ chapshiꞌe choꞌ nakchoneꞌ txen,
30 ḻaꞌ to tocho nakcho ka tkwen wej kwerp c̱heꞌnaꞌ.
31 “Daan, wḻaa beṉꞌ byonaꞌ x̱axṉeenaꞌ katꞌ ikaa c̱heꞌ, naꞌ soaleneꞌ xooleꞌnaꞌ gakgakeꞌ toz.”
32 Dillꞌki ba wniaꞌ chzajniin leꞌ to dii zakꞌchgayi daa biṉꞌ iṉezileꞌ, ḻaꞌ chzajniin choꞌ ka chon Crístonaꞌ daa chakileꞌ choꞌ ba nakchoneꞌ toz.
33 Naꞌ ka leꞌ beṉꞌ byo, to tole chiyaḻꞌ gakileꞌ nool c̱helekaꞌ ka chaki kwinle. Naꞌ leꞌ noolə, chiyaḻꞌ gaple balaaṉ beṉꞌ c̱helekaꞌ.