6
Leꞌ beṉꞌ bishꞌdawaa naꞌ leꞌ beṉꞌ zandawaa, shi iṉezile to beenaꞌ nakle txen choneꞌ dii malaꞌ, ka leꞌ chzenagle c̱he Espíritu c̱he Chiozaꞌ chiyaḻꞌ gaklenleneꞌ kwenc̱he yigooshḻilallee, naꞌ bi gonileneꞌ ziꞌbiaꞌ. Naꞌ ḻi se wṉeyi c̱he kwinle kwenc̱he ki lenle yixople lao dii malaꞌ.
2 Ḻi gaklen ljwell-le bittezə dii chak c̱hele, ḻaꞌ kanꞌ cheeni Crístonaꞌ gonle.
3 Shi zoa beṉꞌ chon kwineꞌ beṉꞌ choo beṉꞌ xen, chziyeꞌz kwinenꞌ.
4 To tole chiyaḻꞌ yiya yiyiljle nak nsaꞌ c̱hele. Naꞌ shi ba chizoile chonle dii wennaꞌ, ḻi yiba yizaki, naꞌ bi iṉazle chonchle ka beṉꞌ yoblə.
5 Ḻaꞌ to tocho chiyaḻꞌ shoꞌ yic̱hjcho goncho daa naki c̱hecho.
6 Beṉꞌkaꞌ chzenag choꞌa xtillꞌ Chiozaꞌ chiyaḻꞌ weꞌgakeꞌ bi de c̱hegakeꞌ beenaꞌ chliꞌ chsedi ḻegakeꞌ.
7 Bi gakzile wak siyeꞌle Chiozaꞌ. Daa gaz kwekle ḻekzannanꞌ yiziꞌ yilaple.
8 Beenaꞌ choeꞌ choꞌa xbayi beli chennaꞌ, kwiayee daa chzenagueꞌ c̱heyin. San beenaꞌ chon ka cheeni Espíritu c̱he Chiozaꞌ, yiziꞌe banez yeḻꞌ mban zejḻi kaṉi daa chzenagueꞌ c̱heꞌ.
9 Bi chiyaḻꞌ lljx̱akicho goncho dii wennaꞌ, ḻaꞌ wllin lla yiziꞌchon banez kon shi bi yidiṉjicho.
10 Naꞌ daan, katꞌ de xḻatjin, chiyaḻꞌ gonicho wen yogꞌ beṉꞌ, naꞌ llialote beṉꞌkaꞌ nakcho toz nonḻilallꞌcho Crístonaꞌ.
11 Kwinꞌ chisyollꞌ chzejꞌ yishi.a Ḻi wwiakachi ka nak letr yeḻ c̱haꞌki.
12 Beṉꞌkaꞌ chonzə byen shoꞌle seṉ daa le circuncisión, chongakeꞌn kwenc̱hzə kono bi iṉa c̱hegakeꞌ, naꞌ kono wsakꞌziꞌ ḻegakeꞌ daa choeꞌgakeꞌ xtillꞌ Crístonaꞌ, beenaꞌ wit ḻee yag cruzaꞌ.
13 Ḻaꞌ ni beṉꞌkaꞌ yoo seṉnaꞌ bi chizogakileꞌ gongakeꞌ doxen ka na leyaꞌ. San cheenzgakileꞌ shoꞌle seṉnaꞌ kwenc̱he wshalj wshongakeꞌ ba bengakeꞌ gan yoolen.
14 Ka nak nadꞌ, biga cheenidꞌ wshalj wshonꞌ c̱he kwinꞌ, san wshalj wshonꞌ c̱he daa ben X̱ancho Jesucrístonaꞌ. Ḻaꞌ daa witeꞌ ḻee yag cruzaꞌ bich bi wṉeyi ziaꞌ shi bi iṉa beṉꞌ c̱haꞌ, naꞌ kaꞌkzə beṉꞌ yell-liokaꞌ bich ndegakeꞌ nadꞌ kwent.
15 Bibi zjanayin shoꞌcho seṉnaꞌ wa bi shoꞌchon, san daa ba bikob Chiozaꞌ yic̱hjlallꞌdoꞌchonanꞌ, ḻennanꞌ zakii.
16 Yiyeshꞌlallꞌshgayi Chiozaꞌ yogꞌḻoḻ beṉꞌkaꞌ chon ka ba wniaꞌ, naꞌ goneꞌ ka soagakeꞌ mbalaz, ḻaꞌ ḻegakenꞌ nakgakeꞌ dowalj beṉꞌ Israel, beṉꞌkaꞌ nak yell c̱heꞌ.
17 Naꞌ ṉaa, bich cheenidꞌ no kwekw nadꞌ dii zed, ḻaꞌ kwerp c̱haꞌni nsaꞌn yill c̱he yogꞌ diikaꞌ ba wxakꞌziꞌa daa chon xshin X̱ancho Jesúzaꞌ.
18 Leꞌ beṉꞌ bishꞌdawaa naꞌ leꞌ beṉꞌ zandawaa, X̱ancho Jesucrístonaꞌ soalenshgueꞌ yogꞌḻoḻtele naꞌ gaklenshgueꞌ leꞌ. Kanꞌ gakan.