2 Nadꞌ Pablo chṉabidꞌ leꞌ wzenagle dga niaꞌ leꞌ. Shi leꞌ weꞌle latj koogakeꞌ leꞌ seṉ daa le circuncisión, bibi zjanayin nale nonḻilallꞌle Crístonaꞌ, shi ṉaa.

3 Sto shii niaꞌ leꞌ, nottezə beṉꞌ wiꞌe latj koogakeꞌneꞌ seṉ daa le circuncisión chonan byen goneꞌ yogꞌḻoḻ daa na leyaꞌ.

4 Leꞌ chonle ka na leyaꞌ daa chakile yiyonan leꞌ beṉꞌ ḻi beṉꞌ shaoꞌ, Crístonanꞌ ba biḻaalaꞌole daa chakile kaꞌ, naꞌ ba bzoale kaꞌlə yeḻꞌ goklennaꞌ ben Chiozaꞌ c̱hele.

5 San netoꞌ, daa zoalen Espíritu c̱he Chiozaꞌ netoꞌ, nonntoꞌ lez yiyakntoꞌ beṉꞌ ḻi beṉꞌ shaoꞌ laweꞌnaꞌ daa nonḻilallꞌntoꞌ Crístonaꞌ.

6 Naꞌ shi nonḻilallꞌcho Cristo Jesúzaꞌ, aga bi zakii laweꞌnaꞌ shoꞌcho seṉ daa le circuncisión wa bi shoꞌchon. Daa zakii laweꞌnaꞌ gonḻilallꞌchoneꞌ naꞌ gakicho beṉꞌ.

7 Zejkzle wen lo nez ḻinaꞌ daa ba yoole, sheḻꞌkaꞌ. ¿No benllej benganzi leꞌ kwenc̱he bich chzenagle dillꞌ ḻinaꞌ?

8 Aga nak dga c̱he Chios, beenaꞌ gox wṉab leꞌ.

9 Dezə dillꞌ nan “latꞌzə levadúranaꞌ chisgolan doxen kwa c̱he yetxtilaꞌ”.

10 Nx̱enilallaa X̱anchonaꞌ gakleneꞌ leꞌ kwenc̱he bi shajḻeꞌle c̱he daa bi nak dillꞌ ḻi. Naꞌ Chiozaꞌ wsakꞌziꞌe nottezə beenaꞌ gonllej gonganileꞌ leꞌ.

11 Ka nak nadꞌ, leꞌ beṉꞌ bishꞌdawaa naꞌ leꞌ beṉꞌ zandawaa, sheḻꞌ ni niaꞌ chiyaḻꞌ shoꞌ beṉꞌ seṉ daa le circuncisión, aga wsakꞌziꞌ beṉꞌ Israelkaꞌ nadꞌ, sheḻꞌkaꞌ. Ḻaꞌ sheḻꞌ ni chonꞌ byen gongakeꞌn, bi gakzbangakileꞌ xtillꞌ Crístonaꞌ daa niaꞌ witeꞌ ḻee yag cruzaꞌ ni c̱hecho kwenc̱he gakcho beṉꞌ wen lao Chiozaꞌ, sheḻꞌkaꞌ.

12 Ka nak beṉꞌkaꞌ chdazə chongakeꞌ byen shoꞌ beṉꞌ seṉ daa le circuncisión, ¡wentelə sheḻꞌ wc̱hogtega kwingakeꞌ doloḻte ganaꞌ chgwee seṉnaꞌ!

13 Leꞌ beṉꞌ bishꞌdawaa naꞌ leꞌ beṉꞌ zandawaa, Chiozaꞌ gox wṉabeꞌ leꞌ kwenc̱he yiyell yilaꞌle lao dii malaꞌ. Naꞌ aga ni c̱he biyell bilaꞌle naꞌ gonzle kon daa nazə beli chen c̱helenaꞌ. San ḻi gaklen ljwell-le naꞌ ḻi gaki ljwell-le ganga.

14 Ḻaꞌ doxen daa na leyanꞌ choncho shi choncho daa bllia Chiozaꞌ biaꞌ daa na: “Chiyaḻꞌ gakiloꞌ bishꞌ ljwelloꞌnaꞌ ka chaki kwinoꞌ.”

15 Ḻi wsakꞌ bi tiḻ wsheshle kwenc̱he ki wzoaziꞌyaa ljwell-le naꞌ wlliayiꞌ ljwell-le.

16 Ki niaꞌ leꞌ ṉaa: ḻi gon ka cheeni Espíritu c̱he Chiozaꞌ, naꞌ bich gonle daa na beli chen c̱helenaꞌ.

17 Ḻaꞌ daa chzelallꞌ beli chennaꞌ bi nllaguin Espíritu c̱he Chiozaꞌ, naꞌ daa cheeni Espíritu c̱he Chiozaꞌ bi nllaguin daa chzelallꞌ beli chennaꞌ. Naꞌ ni to diiki bi nllagui ljwellin, naꞌ daan bi choeꞌgakan latj gonle daa chaklallꞌle.

18 Per shi chzenagcho daa na Espíritu c̱he Chiozaꞌ, bich zoacho xṉiꞌa leyaꞌ.

19 Nakbiaꞌcha diikin chon beṉꞌkaꞌ chzenaggakeꞌ daa cheꞌ beli chen c̱heꞌkaꞌ: chdalengakeꞌ xiiṉ xool beṉꞌ wa xiiṉ xyo beṉꞌ, chongakeꞌ daa nak dii zban, chibagakileꞌ gongakeꞌ yogꞌ daa na beli chen c̱heꞌkaꞌ,

20 choeꞌlaꞌogakeꞌ yaj yag, chḻangakeꞌ yeḻꞌ willaꞌnaꞌ, chakzbangakileꞌ beṉꞌ, chakdiḻ-lengakeꞌ beṉꞌ, chakxeꞌgakileꞌ beṉꞌ, chllaa chlokgakeꞌ, chibagakileꞌ to ḻezgakeꞌ gak wen c̱hegakeꞌ, chibagakileꞌ kwekgakeꞌ diḻ c̱hix̱ naꞌ gonte c̱heləgakeꞌ.

21 Nakgakeꞌ beṉꞌ xeꞌ, nakgakeꞌ wen xya, nakgakeꞌ beṉꞌ weezo, chajgakeꞌ ga chaḻꞌ lṉi naꞌ chzoll chnitgakileꞌ naꞌ chjeej chjtaogakeꞌ ka nḻaꞌ ka nte, naꞌ chongakeꞌ bichlə dii bi yejniꞌa. Naꞌ niaꞌ leꞌ sto shii, ka dillaa ba beꞌlenꞌ leꞌ, beṉꞌkaꞌ chon kaꞌ aga wak yillingakeꞌ ganaꞌ chṉabiaꞌ Chiozaꞌ.

22 San beṉꞌkaꞌ chzenaggakeꞌ daa na Espíritu c̱he Chiozaꞌ chakgakileꞌ bishꞌ ljwellgakeꞌ, chiba chizakꞌgakileꞌ, zoagakeꞌ mbalaz, napgakeꞌ yeḻꞌ chxenlallꞌ, chleꞌshiꞌgakileꞌ beṉꞌ, chongakeꞌ wen c̱he beṉꞌ, chongakeꞌ daa chc̱hebgakeꞌ,

23 nakgakeꞌ beṉꞌ gax̱jlallꞌ, naꞌ chṉabiaꞌ kwingakeꞌ. Naꞌ beṉꞌkaꞌ chon diiki aga bi ley de dii iṉan bi chongakeꞌ wen.

24 Naꞌ beṉꞌkaꞌ ba nak lallꞌ naꞌ Cristo Jesúzaꞌ bich choeꞌgakeꞌ latj iṉabiaꞌ beli chennaꞌ ḻegakeꞌ daa nakgakeꞌ ka beṉꞌ ba wit lawi daa chzelallꞌ beli chen c̱heꞌkaꞌ.

25 Shi ba yoo Espíritu c̱he Chiozaꞌ ḻoo yic̱hjlallꞌdoꞌchonaꞌ, chiyaḻꞌ weꞌcho latj iṉabiꞌe choꞌ.

26 Bi chiyaḻꞌ gakcho beṉꞌ chaꞌsib, ni bi chiyaḻꞌ wshagdiḻzə ljwellcho, ni bi gakxeꞌi ljwellcho.