4
Kin cheenidꞌ iṉiaꞌ leꞌ: biꞌnaꞌ gak lallꞌ naꞌbꞌ daa de c̱he x̱abaa, shlak ni neshꞌbꞌ toz ka zaklebibꞌ wen llinkaꞌ nap x̱abaa, ḻaꞌkzi ḻebanꞌ gaki c̱hebꞌ yogꞌḻoḻte dii de c̱heꞌ.
2 Naꞌ nzoa x̱abaa beṉꞌ chap chwiagakeꞌ ḻebꞌ naꞌ chgoogakeꞌ xṉezi yogꞌte dii gomꞌ ax̱t ki illinch llanaꞌ bllia x̱abaa biaꞌ bich soabꞌ xṉiꞌa beṉꞌkaꞌ.
3 Kaꞌkzan gok c̱hecho kanaꞌ biṉꞌ shajniicho, naꞌ wnocho diikaꞌ na beṉꞌ yell-lioki chonan byen goncho.
4 Naꞌ ka bllin lla, Chiozaꞌ bseḻee Xiiṉeꞌnaꞌ, wxan to nool ḻeꞌ, naꞌ wzoeꞌ xṉiꞌa ley c̱he dii Moisézaꞌ
5 kwenc̱he yisleꞌ nottezə beṉꞌ zoa xṉiꞌa leyaꞌ naꞌ yiyakeꞌ xiiṉ Chiozaꞌ.
6 Naꞌ daa ba nakcho xiiṉeꞌ, bseḻee Espíritu c̱he Xiiṉeꞌ Jesucrístonaꞌ ḻoo yic̱hjlallꞌdoꞌchoni, naꞌ Espíritunaꞌ choneꞌ kwenc̱he cheꞌcho Chiozaꞌ: “X̱adawaa.”
7 Naꞌ ṉaa, bich nakle ka beṉꞌ ndoo lla yel choneꞌ xshin beṉꞌ, san ba nakle xiiṉ Chiozaꞌ. Naꞌ daa ba nakle xiiṉeꞌ, ba nonle lez ikaale daa chidoḻꞌ beṉꞌkaꞌ nak xiiṉeꞌ.
8 Kanaꞌ biṉꞌ gombiaꞌle Chiozaꞌ, naꞌ wzoale xṉiꞌa diikaꞌ benḻilallꞌle, diikaꞌ bi nak dowalj chios.
9 Per ṉaa ba nombiaꞌle Chiozaꞌ, wa wench iṉacho ba nombiaꞌ Chiozaꞌ leꞌ, ¿berac̱he sto shii wzoazle xtillii diikaꞌ na beṉꞌ yell-lioki chonan byen gonle, diikaꞌ bibi zakii? ¿Acheenile yizoale xṉiꞌa diikaꞌ sto shiin?
10 Naꞌ lenzle chaple balaaṉ llakaꞌ, beoꞌkaꞌ, naꞌ katꞌ chibii lla yelkaꞌ, naꞌch yizkaꞌ, diikaꞌ chakile nakgakan dii llialo.
11 Ḻe chxollidꞌ shi gakdadz xshin Chiozaꞌ daa ba benꞌ ladjlenaꞌ.
12 Leꞌ beṉꞌ bishꞌdawaa naꞌ leꞌ beṉꞌ zandawaa, chatꞌyoidꞌ leꞌ gonle ka chonꞌ, ḻaꞌ nadꞌ ba benꞌ kwinꞌ ka leꞌ bi nole leyaꞌ naꞌ bich zoaꞌ xṉiꞌayinnaꞌ. Aga chllaan niaꞌ leꞌ kaꞌ, ḻaꞌ bigaṉꞌ bi gonile nadꞌ.
13 Leꞌkzə ṉezile ni c̱he to yillweꞌ dii bex̱ꞌ nadꞌ bgaaṉꞌ lall-lenaꞌ, naꞌ kanꞌ gok beꞌlenꞌ leꞌ dillꞌ wen dillꞌ kob c̱he Crístonaꞌ dii nech.
14 Naꞌ bi benile nadꞌ nakzi ni bi bzoale nadꞌ kaꞌlə ni c̱he yillweꞌnaꞌ gokꞌ, ḻaꞌkzi gokan to dii zed c̱hele. San bleble nadꞌ ka to anjl c̱he Chiozaꞌ wa ka kwin Cristo Jesúzaꞌ.
15 ¿Garaṉ yeḻꞌ chiba chizaki c̱helenaꞌ naple kanaꞌ wzoalenꞌ leꞌ? Ṉezidꞌ sheḻꞌ wxeꞌile kwej jalaolenaꞌ goṉlen nadꞌ kanaꞌ.
16 Naꞌ ṉaa, ¿achllaale nadꞌ daa ba wniaꞌ leꞌ dillꞌ ḻiki?
17 Beṉꞌkaꞌ bidliꞌ bidsedi leꞌ, aga do lallꞌgakenꞌ bliꞌ bsedgakileꞌ leꞌ. San daa cheenzgakileꞌ yiḻaale netonꞌ naꞌ gonle ḻegakeꞌ txen.
18 Nakkzan wen toshiizi soa beṉꞌ wliꞌ wsedileꞌ leꞌ kon shi gongakeꞌn do yic̱hj do lallgakeꞌ, kwenc̱he aga to katꞌ yidwiazꞌ leꞌ wliꞌ wsedidꞌ leꞌ.
19 Leꞌ xiiṉdawaa, sto shii chak c̱haꞌ ka chak c̱he noolaꞌ chllagloeꞌ saneꞌ biꞌdoꞌ c̱heꞌnaꞌ daa chiꞌ yic̱hjlikzꞌ gakle ka chazlallꞌ Crístonaꞌ.
20 Sheḻꞌ wxeꞌidꞌ ṉaate soalenꞌ leꞌ weꞌlenꞌ leꞌ dillꞌ goll-lallꞌ, ḻaꞌ bi chajniidꞌ bic̱he chonzle kaꞌ.
21 Ka leꞌ cheenile gonle daa na leyaꞌ, ḻi iṉashki nadꞌ: ¿abiṉꞌ yenile ka na leyaꞌ?
22 Choꞌen dillꞌ wzoa c̱hop xiiṉ dii Abrahamaꞌ: tobꞌ gok xiiṉ noolaꞌ wxiꞌgakeꞌ beneꞌ llin c̱heꞌkaꞌ, naꞌ stobꞌ gok xiiṉ beenaꞌ gok nool c̱heꞌ dowalj, beenaꞌ biga gok wen llin c̱he beṉꞌ.
23 Xiiṉ nool wen llin c̱heꞌkaꞌ wzoabꞌ daa wzoalen ljwellgakeꞌ. San noolaꞌ, beenaꞌ biga gok wen llin c̱he beṉꞌ, wzoa xiiṉeꞌ daa bc̱heb Chiozaꞌ wiꞌe to biꞌ c̱hegakeꞌ.
24 Daa gok c̱he noolkaꞌ c̱hop, chzajniin choꞌ c̱he c̱hop daa beꞌ Chiozaꞌ beṉꞌ Israelkaꞌ. Dii Agaraꞌ zaklebileꞌ leyaꞌ daa beꞌ Chiozaꞌ lo yaa Sinaínaꞌ. Naꞌ ḻenꞌ gokeꞌ xṉaꞌ beenaꞌ wdoo lla yel beneꞌ xshin beṉꞌ.
25 Naꞌ zaklebileꞌ yaa Sinaínaꞌ daa zoa Arábianaꞌ, naꞌ nakeꞌ ka yell Jerusalénnaꞌ daa zoa ṉaa. Ḻaꞌ yogꞌ beṉꞌkaꞌ chesh chalj yellaꞌ nakgakeꞌ ka beṉꞌ ndoo lla yel choneꞌ xshin beṉꞌ daa zoagakeꞌ chongakeꞌ daa na leyaꞌ.
26 San choꞌ lljazoacho Jerusalénnaꞌ daa zoa yabanaꞌ ganaꞌ zoa Chiozaꞌ, bi nakcho ka beṉꞌ ndoo lla yel choneꞌ xshin beṉꞌ, ḻaꞌ bi zoacho xṉiꞌa leyaꞌ.
27 Ḻaꞌ Choꞌa Xtillꞌ Chiozaꞌ nan:
Liꞌ nool will, beṉꞌ kono xiiṉin zoa, biba bizaki.
Liꞌ biṉꞌ tioꞌ lo yeḻꞌ zakꞌziꞌ c̱he yeḻꞌ san biꞌdoꞌ, besyaa yeḻꞌ chiba chizaki c̱hoꞌnaꞌ.
Ḻaꞌ noolaꞌ, beenaꞌ wchooṉlallꞌ beṉꞌ c̱heꞌnaꞌneꞌ,
soach xiiṉeꞌ aga ka beenaꞌ zoalen beṉꞌ c̱heꞌnaꞌ.
28 Naꞌ leꞌ beṉꞌ bishꞌdawaa naꞌ leꞌ beṉꞌ zandawaa, nakle ka dii Isaacaꞌ, beenaꞌ bc̱heb Chiozaꞌ wiꞌe dii Abrahamaꞌ.
29 Naꞌ ka gok kanaꞌ, biꞌnaꞌ golj daa wzoalen ljwellgakeꞌ, biya dii benibꞌ biꞌnaꞌ golj kon yeḻꞌ wak c̱he Espíritu c̱he Chiozaꞌ, kakzan chak ṉaa.
30 Naꞌ Choꞌa Xtillꞌ Chiozaꞌ nan: “Bilag noolaꞌ chon xshinoꞌnaꞌ len xiiṉeꞌnaꞌ. Ḻaꞌ bi lemꞌ ikaabꞌ daa chidoḻꞌ xiiṉ beenaꞌ biga gok wen llin c̱he beṉꞌ.”
31 Naꞌ ṉaa, leꞌ beṉꞌ bishꞌdawaa naꞌ leꞌ beṉꞌ zandawaa, aga nakchcho ka xiiṉ beenaꞌ wdoo lla yel beneꞌ xshin beṉꞌ, san nakcho ka xiiṉ beenaꞌ biga gok wen llin c̱he beṉꞌ.