3
Leꞌ beṉꞌ Galacia, beṉꞌ bi chajnii, ¿no wxiyeꞌz leꞌ? Kwasḻoḻ bliꞌ bsedintoꞌ leꞌ nantoꞌ Crístonaꞌ wxakꞌziꞌe ḻee yag cruzaꞌ ni c̱hecho.
2 Toz dii cheenidꞌ iṉabidꞌ leꞌ: ¿Ani c̱he daa chonle daa na leyanꞌ bidsoaꞌ Espíritu c̱he Chiozaꞌ ḻoo yic̱hjlallꞌdoꞌlenaꞌ? ¿Anti daa wyajḻeꞌle c̱he xtillꞌ Crístonaꞌ daa bliꞌ bsedidꞌ lenꞌ, lla?
3 ¡Ni latꞌ bi chajniile! Espíritu c̱he Chiozaꞌ wyoꞌe ḻoo yic̱hjlallꞌdoꞌlenaꞌ ka wzolo chonḻilallꞌle Crístonaꞌ. Naꞌ ṉaa chakile yiyakle beṉꞌ ḻi beṉꞌ shaoꞌ daa chonle ka na leyaꞌ.
4 ¿Anaꞌ bibi zjanayin yogꞌ yeḻꞌ zakꞌziꞌkaꞌ ba ben bleꞌile daa benḻilallꞌle Crístonaꞌ? Nonꞌ lez bi gakan kaꞌz.
5 Chiozaꞌ bzoeꞌ Espíritu c̱heꞌnaꞌ ḻoo yic̱hjlallꞌdoꞌlenaꞌ naꞌ bliileꞌ leꞌ yeḻꞌ wak c̱heꞌnaꞌ, aga ni c̱he daa chonle ka na leyanꞌ, san daa wyajḻeꞌle xtillꞌ Crístonanꞌ.
6 Ka ben dii Abrahamaꞌ, wyajḻiꞌe c̱he Chiozaꞌ, naꞌ daa wyajḻiꞌe, Chiozaꞌ wneꞌ gokeꞌ beṉꞌ ḻi beṉꞌ shaoꞌ laweꞌnaꞌ.
7 Chiyaḻꞌ iṉezile dga: beṉꞌkaꞌ chajḻeꞌ c̱he Chiozaꞌ, ḻegakenꞌ nakgakeꞌ dowalj xiiṉ dia c̱he dii Abrahamaꞌ.
8 Choꞌa Xtillꞌ Chiozaꞌ nan bllieꞌ biaꞌ c̱he beṉꞌkaꞌ bi nak beṉꞌ Israel lengakeꞌ yiyakgakeꞌ beṉꞌ ḻi beṉꞌ shaoꞌ laweꞌnaꞌ shi gonḻilallꞌgakeꞌneꞌ. Naꞌ biꞌe dillꞌ wen dillꞌ kobaꞌ kanaꞌ golleꞌ dii Abrahamaꞌ: “Ni c̱hoꞌ liꞌ gak wen c̱he yogꞌ beṉꞌ lleꞌ zbii zkaaṉ yell-lioni.”
9 Naꞌ Chiozaꞌ chonḻeeyeꞌ beṉꞌkaꞌ chonḻilallꞌ ḻeꞌ, ka beneꞌ c̱he dii Abrahamaꞌ daa benḻilallee ḻeꞌ.
10 Beṉꞌkaꞌ non lez gakgakeꞌ beṉꞌ wen daa chongakeꞌ daa na leyaꞌ, ba mbiayiꞌgakeꞌ. Ḻaꞌ Choꞌa Xtillꞌ Chiozaꞌ nan: “Ba nakten kwiayiꞌ beenaꞌ bi saki goneꞌ yogꞌḻoḻte daa nllia leyaꞌ biaꞌ.”
11 Naꞌ nakbiaꞌcha aga no nak beṉꞌ ḻi beṉꞌ shaoꞌ lao Chiozaꞌ daa choneꞌ daa na leyaꞌ. Choꞌa Xtillꞌ Chiozaꞌ nan: “Beenaꞌ nak beṉꞌ ḻi beṉꞌ shaoꞌ daa nonḻilallee nadꞌ, beenanꞌ ibaneꞌ.”
12 Naꞌ aga na leyaꞌ chiyaḻꞌ gonḻilallꞌcho Chiozaꞌ, san nan: “Nottezə beṉꞌ chon doxen ka na leyaꞌ siꞌe banez yeḻꞌ mban c̱heꞌnaꞌ.”
13 Crístonaꞌ wxakꞌziꞌe ḻee yag cruzaꞌ ka to beṉꞌ mal ni c̱hecho kwenc̱he bi kwiayiꞌcho daa bi choncho daa na leyaꞌ. Ḻaꞌ Choꞌa Xtillꞌ Chiozaꞌ nan: “Ba mbiayiꞌ beenaꞌ wwaḻꞌgakeꞌ to lo yag.”
14 Gok kaꞌ kwenc̱he ka leꞌ bi nakle beṉꞌ Israel lenle gonḻilallꞌleneꞌ, naꞌ Chiozaꞌ goneꞌ wen c̱hele ka bc̱hebeꞌ goneꞌ c̱he dii Abrahamaꞌ. Naꞌ shi gonḻilallꞌcho Cristo Jesúzaꞌ, Espíritu c̱he Chiozaꞌ soaleneꞌ choꞌ, kon ka bc̱hebeꞌ goneꞌ c̱hecho.
15 Leꞌ beṉꞌ bishꞌ naꞌ leꞌ beṉꞌ zanꞌ, cheenidꞌ wshaljlenꞌ leꞌ ka choncho choꞌ beṉꞌ yell-lio: Katꞌ to beṉꞌ goneꞌ to yish dii zakii naꞌ ba nakchan, aga no gak iṉa bibi zakaan ni bich gak wzancheꞌ choꞌa dillꞌkaꞌ ḻeꞌinnaꞌ.
16 Naꞌ kanꞌ nak daa bc̱heb Chiozaꞌ goneꞌ c̱he dii Abrahamaꞌ len xiiṉ dia c̱heꞌnaꞌ. Choꞌa Xtillꞌ Chiozaꞌ bi nan: “xiiṉ dia c̱heꞌkaꞌ”, san nan: “xiiṉ dia c̱heꞌnaꞌ”. Bi choeꞌn dillꞌ c̱he beṉꞌkaꞌ shesh shan lo dia c̱heꞌnaꞌ, san c̱he toz Crístonaꞌ, beenaꞌ golj lo dia c̱heꞌnanꞌ choꞌen dillꞌ.
17 Dga niaꞌ ṉaa zejin Chiozaꞌ bi bzoeꞌ kaꞌlə daa bc̱hebeꞌ goneꞌ c̱he dii Abrahamaꞌ ka biꞌe dii Moisézaꞌ ley c̱heꞌnaꞌ wde tap guiyoa shichoa yiz. Ḻaꞌkzi Chiozaꞌ biꞌe leyaꞌ, bi wlej yic̱hjeꞌ daa bc̱hebeꞌ goneꞌ c̱he dii Abrahamaꞌ.
18 Naꞌ shi chonan byen goncho daa na leyaꞌ goktgui ikaacho daa bc̱heb Chiozaꞌ goṉeꞌ, bich nakan daa bc̱hebeꞌ goṉeꞌ choꞌ kaꞌzə, shi ṉaa. Per Chiozaꞌ bc̱hebeꞌ wiꞌen dii Abrahamaꞌ kaꞌzə.
19 Shi kaꞌ nakan, ¿berac̱he beꞌ Chiozaꞌ leyaꞌ? Biꞌe leyaꞌ kwenc̱he gakbeꞌi beṉꞌ bi chongakeꞌ ka cheenileꞌ. Naꞌ bllieꞌ biaꞌ gonan llin shlak biṉꞌ yid Crístonaꞌ, beenaꞌ bc̱heb Chiozaꞌ galjə lo dia c̱he dii Abrahamaꞌ. Chiozaꞌ bc̱hineꞌ anjlkaꞌ beꞌgakeꞌ ley c̱heꞌnaꞌ dii Moisézaꞌ, naꞌ bc̱hineꞌ dii Moisézaꞌ bzajniileꞌ beṉꞌkaꞌ ka nan.
20 Naꞌ Chiozaꞌ bi byalljileꞌ beṉꞌ yoblə wzajniileꞌ dii Abrahamaꞌ daa bc̱hebeꞌ goneꞌ c̱heꞌ, san kwinkzeꞌ bzajniileꞌneꞌ.
21 ¿Achakile Chiozaꞌ bititjileꞌ xtilleenaꞌ daa bc̱hebeꞌ goneꞌ c̱he dii Abrahamaꞌ ka biꞌe ley c̱heꞌnaꞌ? Bi nakan kaꞌ. Ḻaꞌ sheḻꞌ leyaꞌ gak goṉan yeḻꞌ mban c̱hecho, ba biyakcho beṉꞌ ḻi beṉꞌ shaoꞌ daa choncho ka nan, sheḻꞌkaꞌ.
22 Choꞌa Xtillꞌ Chiozaꞌ nan yogꞌḻoḻ beṉꞌ ndakw nchejgakeꞌ lao saaxyanaꞌ, naꞌ beṉꞌkaꞌ gonḻilallꞌ Jesucrístonaꞌ gaki c̱hegakeꞌ daa ba bc̱heb Chiozaꞌ.
23 Kanaꞌ ziꞌ yid beenaꞌ gonḻilallꞌcho, naꞌ ntakw nc̱hej leyaꞌ netoꞌ beṉꞌ Israel, ax̱t ki Chiozaꞌ bliileꞌ netoꞌ Crístonanꞌ yisleꞌ beṉꞌkaꞌ gonḻilallꞌgakeꞌneꞌ.
24 Naꞌ leyaꞌ goklenan netoꞌ, gokan ka to beṉꞌ nak lallꞌ nee chap chwieꞌ xiiṉ beṉꞌ, ax̱t ki bid Crístonaꞌ benḻilallꞌntoꞌneꞌ naꞌ biyakntoꞌ beṉꞌ ḻi beṉꞌ shaoꞌ lao Chiozaꞌ.
25 Naꞌ ṉaa daa ba blaꞌ beenaꞌ nonḻilallꞌcho, bich chṉabiaꞌ leyaꞌ netoꞌ.
26 Daa ba nonḻilallꞌle Cristo Jesúzaꞌ, ba nakle xiiṉ Chiozaꞌ.
27 Yogꞌḻoḻ-le, leꞌ ba wchoale nisaꞌ daa nonḻilallꞌle Crístonaꞌ, ba billaꞌle naꞌ ba nsaꞌ c̱hele ka nsaꞌ c̱heꞌ daa nakleneꞌ toz.
28 Naꞌ choꞌ nakcho Crístonaꞌ txen, ḻaa beṉꞌ Israel, ḻaa beṉꞌ bi nak beṉꞌ Israel, ḻaa beṉꞌ ndoo lla yel choneꞌ xshin beṉꞌ, ḻaa beṉꞌ chon xshinkzeꞌ, ḻaa noolə, ḻaa beṉꞌ byo, ba nakcho toz.
29 Naꞌ shi nakcho lallꞌ naꞌ Crístonaꞌ, dii ḻicha nakcho xiiṉ dia c̱he dii Abrahamaꞌ, naꞌ lencho chidoḻꞌcho daa bc̱heb Chiozaꞌ goneꞌ c̱heꞌ.