2
Wde shdaꞌ yiz biyaa Jerusalénnaꞌ sto shii, naꞌ wzaꞌlen Bernabénaꞌ nadꞌ naꞌ ḻekzkaꞌ bc̱hiꞌa Títonaꞌ,
2 ḻaꞌ Chiozaꞌ beneꞌ ka wṉezidꞌ nan chiyaḻꞌ shaꞌ. Naꞌ jashaljlenꞌ beṉꞌkaꞌ chṉabiaꞌ lao beṉꞌkaꞌ nonḻilallꞌ Crístonaꞌ, naꞌ to nadꞌ to ḻegakeꞌ bzajniidꞌgakeꞌ ka nak dillꞌ wen dillꞌ kob c̱he Crístonaꞌ daa choeꞌlenꞌ beṉꞌkaꞌ bi nak beṉꞌ Israel. Ḻaꞌ goklallaa iṉezgakileꞌ bin chliꞌ chsedidꞌ kwenc̱he bi iṉagakeꞌ daa ba benꞌ naꞌ daa ni chonꞌ nakan dii bibi zakii.
3 Naꞌ ni Títonaꞌ, beenaꞌ zyaalenꞌ, naktieꞌ beṉꞌ griego, bi bengakeꞌ byen shoꞌe seṉ daa le circuncisión,
4 ḻaꞌkzi wzoa beṉꞌ aga do lallꞌgakeꞌ lengakeꞌ netoꞌ nx̱enilallꞌntoꞌ Cristo Jesúzaꞌ san bidwia bidyizgakeꞌ shi ni chonntoꞌ ka na ley daa bzej dii Moisézaꞌ. Ḻaꞌ goklallꞌgakeꞌ toshiizi idakw ichejntoꞌ gonntoꞌ doxen ka na leyaꞌ.
5 Naꞌ netoꞌ, biga benntoꞌ ka goklallꞌgakeꞌ, daa cheenintoꞌ iṉezile bich chonan byen gonle daa na leyaꞌ, san chiyaḻꞌ gonle daa na dillꞌ wen dillꞌ kob c̱he Crístonaꞌ daa nak dii ḻi.
6 Ka nak beṉꞌkaꞌ chṉabiaꞌ lao beṉꞌkaꞌ nonḻilallꞌ Crístonaꞌ yell Jerusalénnaꞌ, ḻaꞌkzi nakgakeꞌ beṉꞌ mbejlawin bitek ziaꞌ wṉeyi shi no nakgakeꞌ, ḻaꞌ yogꞌcho toz ka zakꞌcho lao Chiozaꞌ. Bi wnagakeꞌ chonan byen yishaa diikaꞌ chliꞌ chsedidꞌ c̱he Crístonaꞌ.
7 San gokbeꞌgakileꞌ Chiozaꞌ ba beneꞌ lallꞌ naꞌ wiꞌa dillꞌ wen dillꞌ kob c̱he Crístonaꞌ lao beṉꞌkaꞌ bi nak beṉꞌ Israel, ka beneꞌ c̱he Pédronaꞌ beneꞌ lallꞌ nee c̱hix̱jeꞌileꞌn beṉꞌ Israelkaꞌ.
8 Ḻaꞌ Chiozaꞌ, beenaꞌ wlejeꞌ Pédronaꞌ kwenc̱he nakeꞌ postl c̱heꞌ naꞌ c̱hix̱jeꞌileꞌ choꞌa xtilleenaꞌ beṉꞌ Israelkaꞌ, ḻekzenꞌ wlejeꞌ nadꞌ nakꞌ postl c̱heꞌ kwenc̱he c̱hix̱jeꞌidꞌ choꞌa xtilleenaꞌ beṉꞌkaꞌ bi nak beṉꞌ Israel.
9 Jacóbonaꞌ, Pédronaꞌ, naꞌch Juannaꞌ, beṉꞌkin mbejlaogakeꞌ lao beṉꞌkaꞌ nonḻilallꞌ Crístonaꞌ, ka gokbeꞌgakileꞌ chaklen Chiozaꞌ nadꞌ kwenc̱he chonꞌ xshineꞌnaꞌ, naꞌ bliꞌgakeꞌn chongakeꞌ nadꞌ naꞌ Bernabénaꞌ txen daa bex̱ꞌgakeꞌ naꞌntoꞌkaꞌ. Ḻaꞌ gokgakileꞌ wenan gonntoꞌ xshin Chiozaꞌ lao beṉꞌkaꞌ bi nak beṉꞌ Israel shlak chliꞌ chsedgakileꞌ beṉꞌ Israelkaꞌ.
10 Toz dii wnagakeꞌ netoꞌ nan chiyaḻꞌ yiyeshꞌlallintoꞌ beṉꞌ yeshꞌkaꞌ, naꞌ ḻeyeṉꞌkzannanꞌ ba yookzə yic̱hjꞌ gonꞌ do yic̱hj do lallaa.
11 Naꞌ ka bid Pédronaꞌ Antioquíanaꞌ, bsheshlenee, ḻaꞌ daa beneꞌ bi nakan wen.
12 Dii nech weej wdaoleneꞌ beṉꞌkaꞌ bi nak beṉꞌ Israel, per ka bid beṉꞌkaꞌ bseḻꞌ Jacóbonaꞌ, bsaneꞌ bich weej wdaoleneꞌ ḻegakeꞌ daa bllebeꞌ beṉꞌkaꞌ na chiyaḻꞌ shoꞌcho seṉ daa le circuncisión naꞌ goncho doxen ka na leyaꞌ.
13 Naꞌ beṉꞌ Israelkaꞌ lleꞌ naꞌ, beṉꞌkaꞌ ba nonḻilallꞌ Crístonaꞌ goklebgakileꞌ Pédronaꞌ bich weej wdaolengakeꞌ beṉꞌkaꞌ bi nak beṉꞌ Israel. Naꞌ ax̱t lenzə Bernabénaꞌ goklebileꞌ ḻegakeꞌ.
14 Naꞌ ka gokbeꞌidꞌ bi chongakeꞌ ka na dillꞌ wen dillꞌ kob c̱he Crístonaꞌ, naꞌ goshꞌ Pédronaꞌ lao yogꞌ beṉꞌkaꞌ lleꞌ naꞌ: “Len naktioꞌ beṉꞌ Israel, naꞌ ba wlej yic̱hjoꞌ ley c̱hechonaꞌ naꞌ ba wzolozoꞌ chonoꞌ txen beṉꞌkaꞌ bi nak beṉꞌ Israel. ¿Bic̱he cheenziloꞌ gonoꞌ byen gon beṉꞌki daa yoolocho choncho, choꞌ nakcho beṉꞌ Israel?”
15 Choꞌ nakcho beṉꞌ Israel ka goljtecho chakicho bi nakcho beṉꞌ saaxya ka beṉꞌ yellkaꞌ sto,
16 per ṉezicho ni tlishꞌ beṉꞌ bi nakeꞌ beṉꞌ ḻi beṉꞌ shaoꞌ lao Chiozaꞌ daa choneꞌ yogꞌ daa na ley c̱heꞌnaꞌ. San beenaꞌ gonḻilallee Jesucristonanꞌ yiyakeꞌ beṉꞌ ḻi beṉꞌ shaoꞌ laweꞌnaꞌ. Naꞌ ḻekzkaꞌ choꞌ ba benḻilallꞌcho Jesucrístonaꞌ kwenc̱he yiyakcho beṉꞌ ḻi beṉꞌ shaoꞌ lao Chiozaꞌ, naꞌ aga daa goncho daa na leyanꞌ. Ḻaꞌ aga no yiyak beṉꞌ ḻi beṉꞌ shaoꞌ lao Chiozaꞌ daa choneꞌ daa na leyaꞌ.
17 Daa cheenicho gakcho beṉꞌ ḻi beṉꞌ shaoꞌ lao Chiozaꞌ daa wit Crístonaꞌ ni c̱hecho, chakbeꞌicho lenkzcho choꞌ beṉꞌ Israelan nakcho beṉꞌ saaxya. Naꞌ daa chakbeꞌicho nakcho beṉꞌ saaxya, ¿azejin Crístonaꞌ noneꞌ choꞌ beṉꞌ saaxya? ¡Bi nakan kaꞌ!
18 Shi ba wlej yic̱hjꞌ leyaꞌ, naꞌ sto shii yiyonzaꞌn lez yiyonan nadꞌ beṉꞌ wen, naꞌ gapꞌ doḻꞌ lao Chiozaꞌ.
19 Nadꞌ nakꞌ ka beṉꞌ ba wit lao leyaꞌ daa bich chonꞌ ka nan, kwenc̱he gak soaꞌ gonꞌ ka cheeni Chiozaꞌ.
20 Nadꞌ nakꞌ ka beṉꞌ witlen Crístonaꞌ txen kanaꞌ witeꞌ ḻee yag cruzaꞌ. Daan, bich chonꞌ daa nazan c̱haꞌ san Crístonaꞌ zoeꞌ lo yeḻꞌ mban c̱haꞌni. Naꞌ daa chonḻilallaaneꞌ, shlak mbanꞌ chonꞌ daa cheeni Xiiṉ Chiozaꞌ, beenaꞌ gokileꞌ nadꞌ naꞌ bzani kwineꞌ witeꞌ ni c̱haꞌ.
21 Bi chzoaꞌ kaꞌlə yeḻꞌ chiyeshꞌlalli c̱he Chiozaꞌ daa bseḻee Crístonaꞌ. Ḻaꞌ sheḻꞌ leyaꞌ bizoyin biyonan choꞌ beṉꞌ ḻi beṉꞌ shaoꞌ, bi benan byen wit Crístonaꞌ ḻee yag cruzaꞌ, sheḻꞌkaꞌ.