13
Dga gak shoṉ shii yidwiaꞌ leꞌ. Ṉaach yidyenꞌ ka na choꞌa xtillꞌ Chiozaꞌ: Shi zoa beṉꞌ chaweꞌ xya c̱he to beṉꞌ, naꞌ bibi gak goneꞌ shi bi zoa c̱hop shoṉ beṉꞌ iṉagakeꞌ kanꞌ nakan.
2 Kanaꞌ bidwiaꞌ leꞌ de wchop shiyi, goshꞌ beṉꞌkaꞌ chongakeꞌ dii malaꞌ bich wwialozꞌ c̱hegakeꞌ. Naꞌ ṉaa zoaꞌ zitꞌ, ba niaꞌ leꞌ kaꞌ sto shii, bich siꞌxenꞌ katꞌ yidꞌ dii yoblə.
3 Gonꞌ kaꞌ ni c̱heyi daa cheenile ileꞌile shi lekzidaan choꞌa dillꞌ kon ka cheeni Crístonaꞌ. Ḻaꞌ Crístonaꞌ bi nakeꞌ ka beṉꞌ bibi gak gon ladjlenaꞌ, san napeꞌ yeḻꞌ wak kwenc̱he yigwee shḻi lallꞌle.
4 Dii ḻikzə Crístonaꞌ bḻex̱j yic̱hjeꞌ wdee ḻee yag cruzaꞌ ka beṉꞌ bi nap yeḻꞌ wak, per ṉaa zoaleneꞌ yeḻꞌ wak c̱he Chiozaꞌ. Naꞌ ḻekzkaꞌ netoꞌ lenntoꞌ Crístonaꞌ nakntoꞌ ka beṉꞌ bi nap yeḻꞌ wak, per daa nakntoꞌneꞌ txen ḻekzkaꞌ zoalenntoꞌ yeḻꞌ wak c̱he Chiozaꞌ kwenc̱he gonntoꞌ xshineꞌnaꞌ ladjlenaꞌ.
5 Ḻi yiya yiyilj kwinle shi dii ḻi ba nonḻilallꞌle Jesucrístonaꞌ. Naꞌ ḻi gakbeꞌyeṉii shi zoalenkzeꞌ leꞌ, wa shi bi nonḻilallꞌkzleneꞌ.
6 Naꞌ nontoꞌ lez gakbeꞌile zoalenkzeꞌ netoꞌ.
7 Chṉabintoꞌ Chiozaꞌ gakleneꞌ leꞌ bibi dii mal gonle. Aga chṉabintoꞌneꞌ dga kwenc̱hezə wliꞌ wzez c̱hentoꞌ ḻe wen benntoꞌ xshineꞌnaꞌ ladjlenaꞌ, san cheenintoꞌ gonle dii wennaꞌ daa chiyaḻꞌ gonle ḻaꞌkzi iṉa beṉꞌ bi chak gonntoꞌ xshin Chiozaꞌ.
8 Bi gak bi iṉantoꞌ c̱heyi daa nak dii ḻi, san zeelo chaklenntoꞌ kwenc̱he wliꞌchlawin.
9 Chibaintoꞌ shi leꞌ nakchale naꞌ bi chonan byen wc̱hinntoꞌ yeḻꞌ wṉabiaꞌnaꞌ nak lallꞌ naꞌntoꞌ, ḻaꞌkzi zoa beṉꞌ chleꞌileꞌ netoꞌ ka beṉꞌ bi nap yeḻꞌ wṉabiaꞌ. Naꞌ iṉabchintoꞌ Chiozaꞌ gakleneꞌ leꞌ gakle doxen ka cheenileꞌ.
10 Chzejꞌ leꞌ ṉaa kwenc̱he katꞌ yidꞌ bi iṉetekꞌ leꞌ zṉia. Ḻaꞌ X̱anchonaꞌ noṉeꞌ nadꞌ yeḻꞌ wṉabiaꞌ kwenc̱he gaklenꞌ leꞌ gakchale lo xṉez Chiozaꞌ, aga beṉeꞌn kwenc̱he wlliayaa leꞌ.
11 Dga zeelo niaꞌ leꞌ, leꞌ beṉꞌ bishꞌ naꞌ leꞌ beṉꞌ zanꞌ, llialallaa soale mbalaz naꞌ weꞌḻ-lallꞌle gakle doxen ka cheeni Chiozaꞌ. Ḻi wtip lallꞌle, ḻi gak toz naꞌ soalen ljwell-le mbalaz. Naꞌ Chiozaꞌ, beenaꞌ chakileꞌ choꞌ naꞌ chzoeꞌ choꞌ mbalaz, soaleneꞌ leꞌ.
12 Naꞌ ḻi wwap ljwell-le chiox ḻega beṉꞌ chaki ljwellin daa nakle lallꞌ naꞌ Chiozaꞌ.
13 Naꞌ yogꞌḻoḻ beṉꞌki ba bixi biyech lao Chiozaꞌ chwapgakeꞌ leꞌ chiox.
14 X̱ancho Jesucrístonaꞌ gaklenshgueꞌ leꞌ, naꞌ yeḻꞌ chaki c̱he Chiozaꞌ soalenan leꞌ, naꞌ Espíritu Santo c̱heꞌnaꞌ goneꞌ ka gakbeꞌile zoaleneꞌ leꞌ. Kanꞌ gakan.