12
Chonkzan byen wshalj wshonꞌ ḻaꞌkzi bibi gonꞌ gan. Naꞌ weꞌtochꞌ dillꞌ c̱heyi daa bleꞌdoꞌidꞌ naꞌ c̱heyi daa bliꞌyi X̱anchonaꞌ nadꞌ daa konoṉꞌ yen ileꞌkzi.
2 Nombiꞌa to beṉꞌa nakeꞌ Crístonaꞌ txen. Ba gok shdaꞌ yiz Crístonaꞌ bc̱hiꞌeneꞌ yabanaꞌ ax̱t ganaꞌ lliate Chiozaꞌ. Bi ṉezidꞌ shi wyajeꞌ do beli chen c̱heꞌnaꞌ, wa shi to bishbe c̱heꞌnaꞌzan wyaj. Toz Chiozaꞌ ṉezileꞌ
3 shi wyajeꞌ do beli chen c̱heꞌnaꞌ wa shi to bishbe c̱heꞌnaꞌzan wyaj, per ṉezidꞌ
4 bc̱he Chiozaꞌneꞌ yabanaꞌ ganaꞌ nak mbalaz inlleb. Naꞌ benileꞌ dillꞌ dii konoṉꞌ yenkzi, dii bi de lsens no wshaljan.
5 C̱he beenaꞌ gok c̱heyin kanꞌ wshalj wshonꞌ, san ka nak nadꞌ, aga bi de wshalj wshonꞌ ḻete wak wshalj wshonꞌ c̱heyi diikaꞌ chliꞌn bibi gak gonꞌ tobiaꞌlozꞌ.
6 Sheḻꞌ cheenidꞌ wshalj wshonꞌ, aga iṉacho chonꞌ ka beṉꞌ bi nteyin, ḻaꞌ dillꞌ ḻin choꞌa. Per bi gonꞌ kaꞌ, kwenc̱he kono ileꞌi nadꞌ beṉꞌ ḻe zakii daa ba bleꞌidꞌ diikaꞌ. Ḻaꞌ diikaꞌ chonꞌ naꞌ dillꞌkaꞌ choꞌa, ḻekzgakannanꞌ wliꞌgakan nakan nakꞌ.
7 Kwenc̱he bi gakꞌ beṉꞌ choo beṉꞌ xen lao yeḻꞌ mba yeḻꞌ shaoꞌ inllebkaꞌ ba bliꞌyi Crístonaꞌ nadꞌ, biꞌe latj blaꞌ to dii chzakꞌziꞌ nadꞌ, to dii bseḻꞌ Satanázaꞌ daa chzoaziꞌyaan nadꞌ, naꞌ chakꞌ ka beṉꞌ chadꞌ chbibeꞌ yeshꞌ.
8 Dga chak c̱haꞌ, shoṉ lin ba wṉabidꞌ X̱anchonaꞌ yikwaseꞌn.
9 Naꞌ wneꞌ nadꞌ: “Chaklə c̱hoꞌ zoalenkzꞌ liꞌ naꞌ gaklenꞌ liꞌ. Daazan chyalljiloꞌ. Ḻaꞌ yeḻꞌ wak c̱haꞌnaꞌ chliꞌch lawin katꞌ de daa chliꞌn bibi gak gonoꞌ tobiaꞌlozoꞌ.” Daan, chibachidꞌ wiꞌa dillꞌ c̱heyi diikaꞌ chliꞌn bibi gak gonꞌ tobiaꞌlozꞌ, kwenc̱he yeḻꞌ wak c̱he Crístonaꞌ soalenchan nadꞌ.
10 Naꞌ daa chakidꞌ Crístonaꞌ, chibaidꞌ katꞌ zaꞌ daa chliꞌn bibi chak gonꞌ tobiaꞌlozꞌ, katꞌ choni beṉꞌ nadꞌ zban, katꞌ chyallj chc̱hinidꞌ, katꞌ chsakꞌziꞌ beṉꞌ nadꞌ, naꞌ katꞌ de to dii lallj c̱haꞌ. Ḻaꞌ katꞌ zaꞌ daa chliꞌn bibi chak gonꞌ tobiaꞌlozꞌ, kanaꞌlan chakbeꞌidꞌ zoalench yeḻꞌ wak c̱he Crístonaꞌ nadꞌ.
11 Ba benꞌ ka beṉꞌ bi nteyi daa chshalj chshonꞌ c̱he kwinꞌ ni c̱hele, ḻaꞌ leꞌlan nan weꞌle dillꞌ nan chonꞌ wen. Ḻaꞌkzi bibi zakaa, aga chonch beṉꞌkaꞌ nale nak postl c̱hele ka nadꞌ, beṉꞌkaꞌ nale chajniꞌchgayi.
12 Daa wzoatezi wzoaꞌ benꞌ daa yoo lo naꞌ gonꞌ lao yogꞌ diikaꞌ btiḻꞌ naꞌ daa benꞌ yeḻꞌ wakkaꞌ ladjlenaꞌ, chliꞌn nakꞌ dowalj postl.
13 Bi gakileꞌ benidꞌ leꞌ nakzi aga ka beṉꞌkaꞌ nonḻilallꞌ Crístonaꞌ yell yoblə daa bi benidꞌ leꞌ zed bibi wkaa c̱hele. Bi nakan kaꞌ. Naꞌ ḻi siꞌxen c̱haꞌ shi bi benꞌ wen benꞌ kaꞌ.
14 Ba chonꞌ wṉeyi yidwiaꞌ leꞌ de wyoṉ shii, naꞌ ḻekzkaꞌ bi cheenidꞌ gonidꞌ leꞌ zed. Ḻaꞌ aga chzelallaa bi de c̱hele, san lenꞌ chzelallaa yidwiaꞌ. Ka chak c̱he beṉꞌ napeꞌ biꞌdoꞌ, aga ḻegakbanꞌ wweej wwaogakbꞌ ḻegakeꞌ, san x̱axṉaꞌbꞌkanꞌ segakeꞌ wṉeyi wweej wwaogakeꞌ ḻegakbꞌ. Kanꞌ chak c̱haꞌ c̱hele.
15 Do yic̱hj do lallaa izanidꞌ bi de c̱haꞌ, ax̱t yeḻꞌ mban c̱haꞌni izanidꞌ, kwenc̱he gak wen c̱hele. Ḻaꞌkzi nadꞌ ax̱t ga zeelo gakidꞌ leꞌ, widezile zizikchli gonile nadꞌ kazli.
16 Ṉezkzile aga bi zed benidꞌ leꞌ, per baḻ-le chakileꞌ biyiljlallꞌzanꞌ kwenc̱he wxiyaa leꞌ.
17 Wa ḻi iṉashki shi no beṉꞌkaꞌ ba bseḻaa ba wxiꞌ wkaagakeꞌ bi de c̱hele.
18 Goshꞌ Títonaꞌ yidwieꞌ leꞌ, naꞌ bseḻꞌlenee sto beṉꞌ nakcho txen. Ḻi iṉashkilja shi bi wxiꞌ wkaa Títonaꞌ c̱hele. Ṉezile bi nakan kaꞌ. Ḻaꞌ toz ka nsaꞌ c̱hentoꞌ naꞌ toz ka cheenintoꞌ gaklenntoꞌ leꞌ.
19 Shi chakileꞌ choeꞌntoꞌ dillꞌki kwenc̱he bibi saꞌlallꞌle c̱hentoꞌ, aga kanꞌ nakan. Choeꞌntoꞌ dillꞌ lao Chiozaꞌ daa nakntoꞌ Crístonaꞌ txen. Leꞌ beṉꞌ bishꞌdawaa naꞌ leꞌ beṉꞌ zandawaa, yogꞌḻoḻ diiki chonntoꞌ nakan dii gaklen leꞌ kwenc̱he gakchale lo xṉez Chiozaꞌ.
20 Chxollidꞌ katꞌ yidwiaꞌ leꞌ bi chonle ka cheenidꞌ gonle. Naꞌ leꞌ, aga wyazlallꞌle ka gonꞌ c̱hele ka yidꞌ ganaꞌ zoale shi ṉaa. Chxollidꞌ shi ka yidꞌ ba chdiḻ chsheshlenz ljwell-le, ba chakxeꞌzi ljwell-le, ba chllaaz ljwell-le, ba chonz c̱he c̱hezle, bizə ba chon chnaz c̱he ljwell-le, ba chc̱hitjzle dillꞌ c̱he ljwell-le, ba chep chaꞌlallꞌzle, naꞌ bichkzə nkaaniꞌa xṉezi daa chonle.
21 Ḻekzkaꞌ chxollidꞌ shi katꞌ yidwiaꞌ leꞌ sto shii, siꞌa yeḻꞌ ztoꞌ lao Chios c̱haꞌnaꞌ ni c̱hele, naꞌ kwellꞌ ni c̱hele. Ḻaꞌ zantele chonle dii malaꞌ, naꞌ biṉꞌ yiyaj yilenile diikaꞌ ba benlenle beli chen c̱helenaꞌ kon ka nazan c̱hele.